Jerimaya 46 - Ạḍinya Iigbia

Ọkpar opu Ijipt ẹpe Kakemis

¹ Ọmoogh-we phọ ụḅaanaan ịmi ịlo areelhe phọ,

² emiigh kꞌIjipt. Ịphen kụ ịdi ọdi ạḅem ịlo ạbuo ẹgham mọ aNeko ọdaam mọ Ijipt, ọpo ạNebukadnezar ogbogh ọdaam mọ ạBabilon ạkpar bọ apu sịphe Kakemis etuman bọ Ọphiiny aYufratis lhạ dị emuneniom inya dị aJehoyakim mạda Juda.

³ “Ạbuo iiḍighi ẹgham mọ Ijipt ọlo, ‘Ịsighiogh ịsuaram anyina ẹnya ẹghi ẹgham!

⁴ Ịkparami iḍigh ạrusu eghiil phọ anyina eḍiku! Ịtol eeleeny kụ ezua roghoony ọsuaram mọ! Ikola ịsoph phọ anyina! Ẹkpologhian ịinya ẹgham!’

⁵ “Kụ ịphen mị rạmiin ghan bọ eeghe?” Ọmoogh-we phọ apuru. “Bịdi roḅulolom ọman rꞌeepuph. Monyuughi we ẹgham mọ ạbidi oḅulemi ọman; kụ aḍiigu resiph, bịdi okiil ịlo kotue okiil bịn kụ ọman úpogh.

⁶ Bụphe ọkpar bọ oghiil úkpetenaan, awe ẹgham mọ útue úsuma. Ẹpe ephunom mọ, ọgbal aYufratis, bịdi okpetaan omeleghu.

⁷ Ạnhian, ọphon phọ ạbugh bọ mụdi aNail, mụdi ọphiiny dị ạmuum rapunughu iigboom?

⁸ Ijipt kụ maphunughu mụdi aNail phọ, mụdi ọphiiny dị ạmuum rapeleghom iigboom. Ijipt ạḅem mọ, ‘Mị kapun ạminoghom oomo aḅirini phọ; mị kapiemi ni rạmha phọ rꞌawe phọ orughogh bọ sịphe.

⁹ Ịto ẹḅeni rụsu phọ mọ eghiil ḅịle mọ arughuugh idighila phọ eekila! Itom we ẹgham mọ ọghi, lephiri ạnmuny ạSudan rꞌạLibia dị ọphamagh ịsuaram, rꞌawe ạLidia dị ọmaar ọraph ạkumugh.’”

¹⁰ Arodon kụ aḍio Ọkar Ogbogh Ọmoogh-we Oomo Ịikpo phọ: rodon ọdi kaḅulemian; rodon ọdi kạliom bụmulogh-ḍien phọ ọdi. Elhool ẹgham ọdi kẹze bịdi kụ ẹper, kụ ẹpughol ịḅaal ạbidi tụtu ẹgbaanyan. Rodon Ẹnaan Oomo Ịikpo reḍighinom ịyaar aghuḍum bụphe ọdi mạteeny bọ ẹpe ephunom mọ, ọgbal aYufratis.

¹¹ Weye Ijipt, ịki ẹpe Gịliad ẹwa ọogho! Oomo ạroogho phọ anyina mephum ḍiibum; ịyaar dị kiikonom inyina ílho.

¹² Areelhe mẹnaghan ịlo aroofola phọ anyina; tọrobo oye mạnaghan emoghi phọ anyina. Oniin ọnyo ẹgham akpetaan nyoniin, kụ ịyal ạbidi omeleghu.

Eru ạNebukadnezar

¹³ Mem dị ạNebukadnezar ogbogh ọdaam mọ ạBabilon aru ozuom Ijipt, Ọmoogh-we phọ ụḅaanaan ni ịmi. Ọdi ạḅem mọ,

¹⁴ “Gbeel akitonom rạmha phọ Ijipt, ẹpe Migdol, Memfis rꞌaTapanes, ạḅeni we: ‘Ịnyaaghian ịlo okoronaan asiloor; oomo ịlo nyina ẹmoogh kopiemi epẹ ẹgham!

¹⁵ Uḍighi ika kụ egbogh eru phọ anyina Apis emeel bọ? Ọmoogh-we phọ kụ anyu nyọdi aler ude!’

¹⁶ Awe ẹgham anyina mokpetaan omeleghu; oniin ạḅeni nyoniin, ‘Gboogborion! Ogheel ọteeny we ayira okpetenaan rolhool ẹgham ạmulogh-ḍien phọ.’

¹⁷ “Ịngo ọdaam mọ Ijipt ḍimoom aḍien — ‘Ọko-ạḍiaḅa Oye Iituma Dị Maroph Ọgel Ọdi.’

¹⁸ Mị Ẹnaan Oomo Ịikpo Ọmoogh-we phọ, mị kụ ọdaam. Mị kụ Ẹnaan phọ edi ghan bọ. Ịdipho Eegum aTabor epeleghom bọ rạaḅaraph phọ kụ Eegum ạKarmel ephoph bọ epeleghom ọphiiny phọ, ịdipho kụ ẹdi ịikpo ọpo kizuom bọ inyina kẹtol.

¹⁹ Ịnya mẹteeny kisiphi inyina ọḍuanam, nyina awe phọ Ijipt! Memfis kotene ọkpagha, esi dị meegulaan dị oye kạ́tol.

²⁰ Ijipt ạkigh ḍigey ạnam dị ạgay ẹpe ephunom mọ azuom rạtanyi.

²¹ Ghạlamo awe ẹgham ọdi dị ophir bịn ị́logh ḍịghaagh, ụghigh ịbam ạnmuny ạsinam. Bịdi ụ́meera úbe; oomo ạbidi ugum ọman kụ oghiil. Aḍio ịiruen ạbidi mesi, amem oogulaan ạbidi.

²² Ijipt moghiil osuma, ọḅa ghan ḍịaḅa ẹkaraph-ịyaar, mem dị ạbuo ẹgham ạmulogh-ḍien phọ rokpekian. Bịdi ozuom bịdi rꞌasikubu, mụdi awe dị roler ireeny

²³ kụ ropiemi egbogh ẹekpua. Awe ạbidi oḍiza ọpughan ogbi; ạbuo ẹgham ạbidi oḍiza opu igurubia.

²⁴ Moofolomi we phọ Ijipt; awe ephunom mọ mọkpar opu bịdi. Mị Ọmoogh-we phọ kụ mạḅem.”

²⁵ Ọmoogh-we Egbogh Ẹnaan phọ Ịzirel ạḅem mọ, “Mị kạliom ni Ạmon eru phọ aTebes, ạḅaram Ijipt rꞌaruru ạbidi rꞌạraalha ạbidi. Mị kạsighe ni ọdaam-ẹmha phọ Ijipt rꞌoomo ạbulo ọkpasi oḍuom ologhi ạbidi esi ọdi,

²⁶ kụ ạḅogh bịdi ạngo bụphe rọwa bọ ọze ạbidi, ạngo Nẹbukadnezar ogbogh ọdaam mọ ạBabilon rꞌạbuo ẹgham ọdi. Kụ rẹsighe mem, awe kọḅile ni ọtol sịphe Ijipt, ịdipho bịdi ọrol ghan bọ mem dị eten. Mị Ọmoogh-we phọ kụ mạḅem.”

Ọmoogh-we phọ kạpel weye ọdi

²⁷ “Weye ạmi, kẹ́moogh oghiilaan, we Ịzirel, képiigha. Mị kịtagharan ni inyina ẹpe ạḍiikela ade phọ, ẹpe nyina edi bọ dọl ikoli phọ. Nyina ketigheel li ẹmha anyina kụ ẹtol rꞌẹepho; nyina kẹ́moogh ookpereghian, kụ oye kíḍighi inyina ịlo oghiilaan.

²⁸ Mị katu ni ịteeny inyina kụ ịphel inyina. Mị kapiemi ni oomo areelhe phọ ẹpe mị mịiwalami bọ inyina kụ ọlo mị inyina kíphiemi. Mị kạ́bile ọliom anyina; kụ ọlo mem dị mị ịlhiom inyina, mị kapogh ni esi akpo ukpe. Mị Ọmoogh-we phọ, kụ mạḅem.”