Jerimaya 43 - Ạḍinya Iigbia

Ọsighe aJerimaya rokeelom Ijipt

¹ Mị rọghaaph rọḅeni bịdi oomo ạraraar phọ Ọmoogh-we Ẹnaan phọ ạbidi urom bọ ịmi ọḅeni ạbidi,

² kụ Azaria ọony aHosaya rꞌaJohanan ọony aKaria rꞌoomo ạbueri phọ awe ophoophe aloor phọ ụḅeni ịmi mọ, “Nạ rạgba ghan ọkpe. Ọmoogh-we Ẹnaan phọ ayira órom nyịna ọḅeni ayoor mọ yoor kúkeel ụtol ẹpe Ijipt.

³ ABaruk ọony aNeraya kụ ạkpuughiom nyịna esi ayoor, ọbo awe ạBabilon phọ ọmoogh ịikpo upu iyoor kụ ụze iyoor ḅịle mꞌọpham ayoor ogheelom ạBabilon.”

⁴ Pọ kụ ịyaar phọ aJohanan mꞌoniin ogbogh ọnyo ẹgham mꞌoniin ạbueri phọ awe phọ, dị ạnaghanan ịto Ọmoogh-we phọ ọrol ịsiphe ade phọ aJuda ọ́rol.

⁵ Kụ aJohanan rꞌoomo abuḍiemiom ẹgham mọ ookoroghi oomo awe lọ osugha sịphe Juda ogheelom ẹpe Ijipt, ọḅaram oomo awe phọ ọḍua bọ rikpisi lọ bịdi ọwalala origheleghu:

⁶ alephiri phọ, nmạriir phọ, nmụny phọ rꞌạnmanyaan ọdaam mọ. Bịdi ụsighe tọrobo ọlo ạNebuzaradan, oḍiemiom ẹgham mọ, ạwile mọ aGedalaya aphogh ghan, ọḅaram Baruk rꞌạmi.

⁷ Bịdi ụḅaar ẹmhu esi ịto Ọmoogh-we phọ kụ ọghi ẹpe Ijipt tụtu osi ẹmha aTapanes.

⁸ Sịphe kụ ẹdi Ọmoogh-we phọ ụḅeni ịmi mọ,

⁹ “Jerimaya, sịghe sighiigh dị ẹbugh ạghi aḍi sịphe eeḍian eten phọ rotelhe ghan bọ koḍigh otu ịtooghi phọ sịen ẹmha phọ. Ḍighi ni ịdi ạbunon awe phọ Ịzirel kọmiin mem mọ nạ raḍighi bọ.

¹⁰ Kụ agbi ọḅeni ạbidi mọ mị Ọmoogh-we Egbogh Ẹnaan phọ Ịzirel kạsighe otelhedom ạmi Nẹbukadnezar ọdaam eelhe phọ ạBabilon atumom. Ịsien, ạnyu asighiigh phọ iphẹn nạ maḍi bọ, kụ ẹdi ọdi kaseere ạgada ọdaam mọ ọdi ạḅile agim ogbogo ạbudaam mọ ọdi ạnyu asighiigh phọ ịphen nạ maḍi bọ.

¹¹ ẠNebukadnezar katu ni ạkpar apu Ijipt. Awe phọ ạbuphe mọda bọ mọ komughom ẹzegh phọ, komughom ni ẹzegh, ḅịle bụphe mọda bọ mọ osiphi bịdi ọḍuanam ịlo awe ikoli phọ kosiphi ni ọḍuanam ịlo awe ikoli, rꞌạbuphe mọda bọ mọ ọze bụno erugh ẹgham kọze ni erugh ẹgham.

¹² Mị kạsu ni nịan ruutu aruru phọ Ijipt, kụ ọdaam eelhe phọ ạBabilon ạtu ạsu ịkaaghineen ạrumugh phọ ạbidi mụghumo ọpham ọḍuanam. Ịdipho opoghom iyool-ịga rạkpigh ghan bọ ighuugh kạsighe loor arukpe ọdi, ịdipho kụ ẹdi ọdaam mọ ạBabilon kạkpigh ạḅaalami de phọ Ijipt kụ agbi ogheel rꞌọkpar opu.

¹³ Ọdi kapiemi ni igbaany asighiigh igbudu phọ ịsiphe Hẹliopolis ẹpe Ijipt kụ ạsu aguulemi ruutu aruru phọ Ijipt.”