Jerimaya 42 - Ạḍinya Iigbia

Awe phọ ọlom Jerimaya ọoḅereghinaan ạbidi

¹ Kụ aJohanan ọony aKaria ḅịle rꞌAzaraya ọony aHosaya rꞌoomo ạbueri phọ abuḍiemiom ẹgham mọ rꞌạbukirokiro awe uru ni

² kụ ụḅeni ịmi mọ, “Seseeny, ḍighi ịpe yoor ọḅeni bọ nyịna! Kol ẹmhu ayoor ạaḅereghi Ọmoogh-we Ẹnaan phọ ayira. Ḅẹeḅereghinaan oomo phọ ayoor okpetenaan bọ. Amem ịrol li dị yoor oḍiza, kụ nyịidipho ịyal-ikpo ayoor bịn kụ usugha, ịduon nạ rạmiin bọ ni.

³ Ḅẹeḅereghi Ọmoogh-we Ẹnaan phọ ayira dị ọdi kuḍeenaan iyoor eten rꞌịlo yoor koḍighi.”

⁴ Mị ạphagharanaan, “Ọkar agey phọ ni, mị kạaḅereghi Ọmoogh-we Ẹnaan phọ ayira, ịdipho nyina mẹlhom bọ, kụ tọrobo ịlo ọdi ạḅem, mị kịḅeni ni inyina. Mị inyina ịyaar kạ̋aghinaan.”

⁵ Kụ bịdi ogbi ọḅeni ạmi mọ, “Ọmoogh-we phọ ạmeera enye ayoor eḍighi ịyaar dị yoor ụ́naghanan oomo ịto phọ Ọmoogh-we Ẹnaan phọ ayira rakol bọ ẹmhu ayoor kạngo nyịna.

⁶ Ịḅeeraan iyoor, iyoor ị́ḅeeraan, yoor kọnaghanan ni Ọmoogh-we Ẹnaan phọ ayira, ọpo yoor ọḅem bọ mọ kol ẹmhu ayoor ạaḅereghi phọ. Oomo ạraraar kịnighenaan ni iyoor eḍighi ịyaar lọ yoor ọnaghanan nyọdi.”

Ọphagharanaan Ọmoogh-we phọ esi ịiḅereghi phọ aJerimaya

⁷ Ḍioph Aḍughul-otu reten kụ Ọmoogh-we phọ ụḅaanaan ịmi;

⁸ kụ mị aakpomoghi Johanan, oomo abuḍiemiom ẹgham mọ, bụdi ọrolan rꞌọdi, rꞌoomo ạbueri phọ awe phọ.

⁹ Mị ạḅeni bịdi mọ, “Ọmoogh-we Ẹnaan phọ Ịzirel, ọpo nyina irom bọ ịmi ọghi ịlom mọ mạḅem mọ,

¹⁰ ‘Eḍighi ịyaar dị edi ni ologhi anyina ọrol ịsien ade phọ ạḍien, pọ mị kiphighi ni inyina, mị inyina kíler, mị kịmeremi inyina, mị inyina kíruphuron. Ophiemi phọ mị iruomaan bọ inyina mụngo ịmi iboom ịminimiin.

¹¹ Kékiilaan mun ọdaam ẹmha phọ ạBabilon. Mị odi ni rꞌanyina, kụ mị kịtagharan ni inyina ạsighe esi ịikpo phọ ọdi.

¹² Loor esi dị mị ạmoogh ọnma ighirigiir, mị kaḍighi ịdi ọdi kịnma inyina ighirigiir, ọbo nyina esi otu. Mị Ọmoogh-we phọ kụ mạḅem.’

^13-15 “Kụ nyina awe phọ ạbuphe esugha bọ ẹphen Juda, kẹ́ḅaar ẹmhu esi Ọmoogh-we Ẹnaan phọ anyina kụ ẹḅem mọ nyina kẹ́tol sịen ade phọ aḍien. Kẹ́ḅem mọ, ‘Eeye, yoor kọki ọtol ẹpe Ijipt, ekpisi dị yoor kọ́miin mun ẹgham kꞌagee-pọ, ḅịle mꞌọnaghan ạḍimagh ọghi ẹgham ḅịle mꞌọrol ọkoony.’ Nyina ẹḅem ịduon, pọ Ọmoogh-we Egbogh Ẹnaan phọ Ịzirel ạḅem mọ, ‘Eḍighi ịyaar dị nyina ẹnya ọghi ọrol ẹpe Ijipt,

¹⁶ pọ ẹgham mọ nyina rekiilaan bọ kịteeny ni inyina kụ ọkoony phọ nyina rẹ́wa bọ kịdaph ni inyina kụ nyina kemuughu ẹpe Ijipt.

¹⁷ Oomo awe phọ ọnya bọ ọghi ọrol ẹpe Ijipt komuughu ni, iini erugh ẹgham mꞌesi ạdol ọkoony mꞌẹzegh. Rꞌoniin kạ́tol dị kakpetenaan. Rꞌoniin kạ́ḍua esi igbogh ịiḅaghami phọ mị katuomaan bọ bịdi.’

¹⁸ “Ọmoogh-we Ẹnaan phọ Ịzirel ạḅem mọ, ‘Ịdipho ọghagh ologhi phọ ạmi rꞌophin ologhi phọ ạmi azuom bọ weye aJeruselem, iniin phọ ịne kụ ẹdi ophin ologhi ạmi kizuom inyina eḍighi ịyaar lọ nyina egheel Ijipt. Nyina keḍighi we dị kebeeph iboom ọmiin; awe kiphogh ghan inyina ọḅitonaan kụ aḍien anyina eḍighi itonyonaan. Nyina esi phọ ịsien kẹ́miin mun.’”

¹⁹ Kụ mị ạḅile ạghaaph, “Ọmoogh-we phọ mịḅeni inyina awe phọ ạbuphe osugha bọ ẹphen Juda mọ kékeel ẹpe Ijipt. Kụ mị rịphur inyina rụru nyịidipho

²⁰ mọ nyina remeel keḍighinaan oboom ọpioman. Nyina ịlom ịmi ọoḅereghinaan anyina Ọmoogh-we Ẹnaan phọ ayira, kụ ẹḅile eguanaan mọ nyina keḍighi tọrobo ịlo ọdi ạto.

²¹ Kụ nyịidipho, mị mịḅeni inyina, kụ nyina rẹḅaar ẹmhu oomo ạraraar lọ Ọmoogh-we Ẹnaan phọ ayira urom ịmi ọḅeni anyina.

²² Kụ ịduon phọ, ilegheri ịduon: nyina kemuughu ni, iini erugh ẹgham ḅịle mꞌesi ạdol ọkoony ḅịle mꞌesi ẹzegh sịphe ade phọ nyina rẹwa bọ ogheel ọrol phọ.”