Jerimaya 37 - Ạḍinya Iigbia

Ịlom ạZedekaya esi aJerimaya

¹ ẠNebukadnezar ogbogh ọdaam mọ ạBabilon ạma Zẹdekaya ọony phọ aJosaya ọdaam mọ aJuda, mọ ạsighe dọl phọ aJehoyasin ọony phọ aJehoyakim aḍighi ọdaam.

² Kụ ọlo ạZedekaya ḅịle rꞌạbuo iiḍighi phọ ọdi rꞌawe phọ ụ́naghanan dom mọ Ọmoogh-we phọ ụḅeni bọ ịmi.

³ ẠZedekaya ọdaam mọ arom ni Jehukal ọony aSelemaya, ḅịle rꞌạZefanaya ọony aMaaseya oyil ạrikia phọ, mọ oru ụlhom ịmi ọoḅereghi Ẹnaan phọ ayoor Ọmoogh-we phọ ọngo eelhe phọ ayoor.

⁴ Mem mọ ọpo phọ ịmi kụ́lhogh ikoli ḅịle kẹn mị ratelhian ni weye phọ rꞌẹereegh.

⁵ Awe ẹgham ạBabilon phọ momiigh rokoom Jeruselem, kụ bịdi ọnaghan mọ ạbuo ẹgham Ijipt mọḅeeny ọku ade phọ Ijipt, kụ bịdi uḅula.

⁶ Kụ Ọmoogh-we Ẹnaan phọ Ịzirel ụḅeni ịmi

⁷ mọ ḅẹni Zẹdekaya mọ, “Awe ẹgham Ijipt phọ moḅetenu rotu ọlhoghonaan anyina ḍịghaagh, kụ ọlo bịdi koḅula ni.

⁸ Kụ awe ạBabilon phọ ọḅile otu ozuom ẹmha phọ ọsighe kụ ọsu nịan.

⁹ Mị Ọmoogh-we phọ rịphur inyina rụru mọ kéekeleghian siloor, ọotughian mọ awe ạBabilon phọ kóḅula mun. Bịdi koḅula ni.

¹⁰ Ghạlamo nyina ịkpar ri epu oomo awe ẹgham ạBabilon phọ, eḍighi dị bụdi oḍighima rạraar bịn kụ usugha, ọmina yogh sịphe arugbogo phọ ạbidi, awe phọ ạbuphe kọḅile ni oḅetenu otu ọsu ẹmha phọ ẹphen oguulemi ude.”

Mosiph Jerimaya ọlogh ikoli

¹¹ Awe ẹgham ạBabilon phọ uḅula ni, ọwile Jeruselem ịdi eḍighi bọ awe ẹgham Ijipt rotu.

¹² Kụ loor ịduon phọ mị amiigh ọḍua aJeruselem ọghi eelhe ạBenjamin ọsighe abin aruphua eghunotu phọ ạmi.

¹³ Kụ mem dị mị rosi Ọnhu-aḍibuo ạBenjamin, ọnyo oḍighi dị rapogh weye dị odi oḍighi sịphe, oye dị oghol mọ Irija ọony aSelemaya dị aḍighi ọony ọony aHananaya, ụmeremi ịmi kụ ạḅem mọ, “Nạ rasuma kạdaph weye ạBabilon!”

¹⁴ Mị ạphagharanaan mọ, “Kị́duon! Mị rásuma.” Kụ ọlo Irija ịmi ụ́naghanan. Kpạripe ghụn ọdi usiph ịmi kụ ạghiomaan weye iiḍighi phọ.

¹⁵ Bịdi ụghagham ni ịmi ologhi kụ ọto mọ ukuphogh ịmi kụ ụkasaghiom ịmi otu ạJonatan ọgeeghia ogiga ọdaam mọ, ọpo motene bọ otu ọdi otu ikoli.

¹⁶ Ụkasaghiom ịmi otu ikoli dị odi eeḍian otu phọ kụ useere ịmi sịphe ḍiboom amem.

¹⁷ Rẹsighe mem kụ ạZedekaya ọdaam mọ arom uruom ịmi, kụ sịphe otu ọdaam mọ, upuru ịmi reten ịbooghian mọ, “Adom kꞌỌmoogh-we phọ edi ni ḍụghum?” “Edi ni,” mị ạphagharanaan kụ ạloghom mọ, “Kọḅogh ni nyịna ọngo ọdaam eelhe phọ ạBabilon.”

¹⁸ Kụ mị apuru, “Ọghen ologh kụ ọdi mị asoor bọ esi ạna ḅịle rꞌesi ạbuo iiḍighi phọ ạna rꞌawe phọ ạna dị aḍighi bọ ịdi nạ ụlogh ịmi ikoli?

¹⁹ Eeghe kụ imitenaan riil phọ ạna bụphe ọḅeni bọ nyịna mọ ọdaam mọ ạBabilon nyịna ḅịle rꞌeelhe phọ ạna kázuom mọ?

²⁰ Kụ nyịidipho, ogbogh ọde ạmi, mị rạaḅereghi nyịna ọnaghanan ạmi oḍighi ịlo mị ạlom. Kạ́le, kúḅulemi mun ịmi ẹpe ikoli phọ sịphe otu phọ ẠJonatan. Nạ aḍighi ịduon, pọ agey phọ ni mị kamugh ni sịphe phọ.”

²¹ Kụ ạZedekaya ọdaam mọ ạto mọ ụkasaghiom ịmi sịphe ogbo ogiga phọ. Mị ạrol sịphe, kụ tọrobo aḍio bịdi ụngo ghan ịmi eniin eeḅoghoḍi ạbred dị ọsighe esi phọ rọpophoghi ghan bọ, tụtu oomo ạbred ịsiphe ẹmha phọ amuneen.