Jerimaya 36 - Ạḍinya Iigbia

ABaruk ạbal ḍikpooghineen ạḍinya sịphe Otu Ịiḅereghi phọ

¹ Lhạ dị emuneniom inya dị aJehoyakim ọony aJosaya aḍighi ọdaam-ẹmha aJuda, Ọmoogh-we phọ ụḅeni ni ịmi mọ,

² “Sịghe ḍikpooghineen ạḍinya kụ ạge sịphe phọ tọrobo ịyaar lọ mị ạḅeni nyịna ịlo Ịzirel rꞌaJuda rꞌoomo areelhe phọ. Gẹ tọrobo ịyaar lọ mị mạḅeni ghan nyịna kꞌẹḅel amem mọ mị ạḅaanaan bọ nyịna mem dị aJosaya kụ aḍighi ọdaam-ẹmha kụ ẹteeny nyịidipho.

³ Iini mem dị awe phọ aJuda ọnaghan ịlo oomo ophiemi phọ mị ạnya bọ oḍighi ạbidi, bịdi kọbileghi ni ịkaraph areten phọ ạbidi kụ mị kạsar ạbilenaan ẹkaraph eḍighinom mọ ạbidi rꞌạsipioghom mọ ạbidi.”

⁴ Kụ mị ạmagh Baruk ọony aNeraya kụ ạghaaph ghan ạḅeni nyọdi tọrobo ịpe Ọmoogh-we phọ mụḅeni bọ ịmi, kụ aBaruk ạge ghan oomo ịpe mị ạghaaph bọ loor ạḍinya.

⁵ Kụ mị ạngo nyọdi oromoghiom mọ ọphon: “Úmeera mun mọ mị ạghi ologhi Otu Ịiḅereghi phọ.

⁶ Kụ ọlo mị rạwa dị nạ kạghi sịphe phọ ẹnon amem lọ awe phọ odi dọl ọkaagh ẹḍogh. Nạ kạbal ḍịnya phọ ạḍien, ẹrol dị bịdi ọnaghan tọrobo ịpe Ọmoogh-we phọ mụḅeni bọ ịmi kụ mị ạḅeni bọ nyịna. Ḍighi ịphen phọ esi dị ạtorobo oye rꞌawe phọ aJuda dị mọḍua rạmha ạbidi kụ oru kọnaghan.

⁷ Iini bịdi kọoḅereghi Ọmoogh-we phọ kụ ọbileghi ịkaraph areten phọ ạbidi loor esi dị Ọmoogh-we phọ mạnya ọlhiom awe phọ ạbuen oboom ọghagh ologhi.”

⁸ Kụ aBaruk ạtuugh ni ạdaph ịpe mị mạḅem bọ kụ ạal ikpo ọnhu Ọmoogh-we phọ sịphe Otu Ịiḅereghi phọ.

⁹ Ụnwanyu phọ amuneniom bọ esugha phọ, lhạ dị eḍighi oogh dị aJehoyakim aḍighi ọdaam-ẹmha phọ aJuda, awe phọ ụrol li dọl ọkaagh ẹḍogh ọmooghom ọnma ighirigiir Ọmoogh-we phọ — awe phọ ạbuphe ọrol bọ Jeruselem rꞌoomo ạbuphe ọḍua bọ rạmha phọ aJuda kụ oru.

¹⁰ Pọ kụ amem dị oomo awe olher rụru rọnaghan ịdi aBaruk ạal bọ ạḍinya phọ oomo ịpe mị mạḅem bọ. Ọdi aḍighi ịphen phọ sịphe Otu Ịiḅereghi phọ, sịphe osoph phọ aGemaraya ọony aSafan ọgeeghia ogbo ogiga phọ. Osoph phọ ọdi ạrol ạga dị etuman eḍighom Omoom Ọnhu-aḍibuo ịsiphe Otu Ịiḅereghi phọ.

Ạal ḍịnya phọ ọḅeni bụo iiḍighi phọ

¹¹ AMikaya ọony phọ aGemaraya rꞌọony ọony aSafan ạnaghan ni ịdi aBaruk ạal sịphe ạḍinya phọ ịpe Ọmoogh-we phọ mạḅem bọ.

¹² Kụ ọdi ạghi ogiga ọdaam mọ aḍigh osoph ọgeeghia ogiga ọdaam mọ, esi dị oomo ạbuo iiḍighi phọ mookpomoghan. Elisama ọgeeghia phọ, aDelaya ọony aSemaya, Ẹlnatan ọony Akbor, aGemaraya ọony aSafan, ạZedekaya ọony aHananaya rꞌoomo ạbueri phọ awe iiḍighi phọ ụrologhu ni.

¹³ AMikaya ạḅeni bịdi oomo ịpe ọdi ạnaghan bọ dị aBaruk ạal bọ ạḅeni we phọ.

¹⁴ Kụ awe iiḍighi phọ orom Jehudi (ọony aNetanaya ọony ọony aSelemaya rꞌọony ọony ọony aKusi) mọ ạḅeni Baruk mọ ạpham ḍịnya phọ ọdi ạal bọ ạḅeni we phọ kụ arumom. ABaruk aruomaan bịdi ḍịnya phọ.

¹⁵ “Tọl ude,” bịdi ọḅem, “kụ ạal ḍịnya phọ ụḅeni iyoor.” Ịduon kụ ẹdi aBaruk ạtuugh aḍighi.

¹⁶ Mem dị ọdi mạal, oniin akiton aphogh nyoniin reten iikia, kụ ọḅeni Baruk mọ, “Yoor ọmoogh ọghi ọghaaph ịphen phọ ọḅeni ọdaam-ẹmha phọ.”

¹⁷ Kụ bịdi opuru nyọdi, “Ụḅeni iyoor nyịidipho, uḍighi ika kụ nạ ạge bọ oomo phọ ịphen? AJerimaya kụ ạḅeni nyịna ịlo ọge ḍụghum?”

¹⁸ Kụ aBaruk ạphagharanaan mọ, “AJerimaya ụḅeni ịmi tọrobo ekpo ọnhu lọ ọge sịen, kụ mị ạgeom iki loor ạḍinya phọ.”

¹⁹ Kụ bịdi ọḅeni nyọdi, “Nạ rꞌaJerimaya ẹmoogh ọghi ạaghian. Kémeera rꞌoniin oye alegheri esi lọ nyina edi.”

Ọdaam mọ ạsu ḍịnya phọ

²⁰ Awe iiḍighi phọ useere ni ḍịnya phọ osoph Elisama ọgeeghia ogiga ọdaam mọ, kụ ọghi ẹpe osoph ọdaam mọ; ịsiphe kụ ẹdi bịdi ọghaaph tọrobo ịyaar ọḅeni ọdaam mọ.

²¹ Kụ ọdaam mọ arom Jehudi mọ ạsighe ḍịnya phọ arumom. Ọdi ạghi osoph phọ Elisama, ạsighe ḍịnya phọ aru ạal ạḅeni ọdaam mọ rꞌoomo ạbuo iiḍighi dị ọmeregha okoom nyọdi.

²² Iḍighi mem ẹephoom kụ ọdaam mọ ạrol ologhi otu amem ẹephoom phọ ọdi ạanma ghan ạnian.

²³ Tọrobo amem lọ aJehudi mạal ịraar mꞌinya ạriikpigh ạman, ọdaam mọ ạsighe ghan ẹbam ẹleke asoph asumeeny ologhi ạnian phọ. Ọdi aḍighi ghan ịduon tụtu oomo ạḍinya phọ eemor.

²⁴ Kụ ọdaam mọ rꞌạbuo iiḍighi phọ, ọlo aghiilaan ḅịle aḍeenaan ọto ọ́rol.

²⁵ Ghạlamo ịduon Ẹlnatan, aDelaya rꞌaGemaraya ọoḅereghi ghan mọ kụ́su ḍịnya phọ, ọdaam mọ ọ́naghanan bịdi.

²⁶ Kụ ọdi ạto ạḅeni Jerameel ọkpana ọdi rꞌaSeraya ọony Ạzriel rꞌaSelemaya ọony Ạbdeel mọ oru usiph ịmi rꞌaBaruk ọgeeghia phọ ạmi. Kụ ọlo Ọmoogh-we phọ museere iyoor esi ịbooghian.

AJerimaya ạge ḍịnon ạḍinya

²⁷ Mem dị aJehoyakim ọdaam mọ mạsu ḍịnya phọ mị kụ ạḅem ghan bọ kụ aBaruk ạge, Ọmoogh-we phọ ụḅeni ịmi

²⁸ mọ mị ụsighe ḍịnon ạḍinya kụ ạge tọrobo ịyaar lọ ẹrol sịphe ạḍiḅel phọ.

²⁹ Ọmoogh-we phọ ụḅeni ịmi ọḅeni ọdaam mọ mọ, “Nạ mạsu ḍịnya phọ kụ nạ apuru aJerimaya ịpe eḍighi bọ kụ ọdi ạge bọ mọ ọdaam-ẹmha phọ ạBabilon katu apiemi de phọ ạḍien kụ ạze weye rꞌịnam mọ.

³⁰ Kụ nyịidipho mị Ọmoogh-we phọ rạḅeni nyịna, Jehoyakim ọdaam, mọ ẹemara ẹemara ạna kạ́da ọmar phọ aDevid. Nạ amugh nyịna kotebeeny erugh esi dị ogogo kạgur ootaany kụ ooto asoorom ḍughul.

³¹ Mị kạliom ni nyịna, ẹemara ẹemara ạna rꞌawe iiḍighi ạna loor ịkaraph phọ oomo phọ anyina eḍighi bọ. Sịphe ogbo oomo phọ anyina, nạ ḅịle rꞌawe aJeruselem rꞌawe aJuda, rꞌoniin oye kọ̋rol dị mạnaghanan ọphur aruru phọ ạmi. Loor ịduon phọ mị kiruomaan inyina ophiemi phọ mị ạpaarom bọ inyina.”

³² Kụ mị ạsighe ḍịnon ạḍinya kụ ạngo Baruk ọgeeghia phọ ạmi, kụ ọdi ạge tọrobo ịyaar lọ mị ạḅem. Ọdi ạge ni tọrobo ịyaar dị ẹrol loor ạḍiḅel ạḍinya phọ rꞌịnon ịdo asidom dị mị ạghaaph ạḅeni nyọdi.