Jerimaya 34 - Ạḍinya Iigbia

Adom dị ọghiom Zẹdekaya

¹ Ọmoogh-we phọ ụḅaanaan ni ịmi mem dị ạNebukadnezar ogbogh ọdaam mọ ạBabilon rꞌawe ẹgham mọ ọdi, rꞌaḍita awe ẹgham ịnon areelhe rꞌạbunon aweye dị odi eeḍian ọdi ọḅile oḍighan rꞌọdi, ozuom ghan Jeruselem rꞌạramha phọ etuman bọ sịphe.

² Ọmoogh-we Ẹnaan phọ Ịzirel ụḅeni ịmi ọghi ọḅeni Zẹdekaya ọdaam mọ aJuda mọ, “Mị Ọmoogh-we phọ kạḅogh ẹmha phọ ẹphen ạngo ọdaam-ẹmha phọ ạBabilon kụ ọdi ạsu nịan apiemi.

³ Nạ kákpetenaan; kosiph ni nyịna kụ ọḅogh ọngo nyọdi. Nạ kạmiin ni nyọdi risigh rꞌarisigh kụ ạḅaanaan nyọdi, kụ nạ agbi ọghi ạBabilon.

⁴ Zẹdekaya, nạghan ịphen mị rạḅeni bọ nyịna. Kóghiigh nyịna erugh ẹgham.

⁵ Nạ kamugh rꞌẹepho, kụ ịdipho awe ọsu bọ ịnsens mem dị roḍi bụrude ạburude ạna dị oḍighi bụdaam kụ egbi ọteeny ạna, iniin phọ ni kụ ẹdi bịdi kọsuanaan nyịna ịnsens. Bịdi komoghinaan ni nyịna kụ ọḅem mọ, ‘Ọdaam mọ ayoor mamugh!’ Mị Ọmoogh-we phọ kụ mạḅem.”

⁶ Kụ mị ạghi Jeruselem ạḅeni dom mọ ạḍien ạZedekaya ọdaam mọ,

⁷ mem dị awe ẹgham ọdaam eelhe phọ ạBabilon rozuom ẹmha phọ. Awe ẹgham mọ ụḅile kẹn ozuom Lakis rꞌAzeka, igina ạramha aJuda dị esugha dị ẹmoogh ịikpo.

Areekeleghian dị ookeleghiom rẹbene

⁸ ẠZedekaya ọdaam mọ rꞌawe phọ aJeruselem umerenyan osereghi ẹereegh

⁹ weye aHibru ạbidi lọ oḍighi ghan rẹbene, lephiri rꞌạnmariir, ọbo oye kạpam ghan bọ nịiniin oye ọlo Ịzirel aḍighi ẹbene.

¹⁰ Oomo awe phọ rꞌabuḍiemiom mọ ạbidi omeeraam osereghi ạrebene ạbidi dọl ẹereegh, kọ́pam mun bịdi mọ ạrebene. Bịdi usereghi ni bịdi,

¹¹ mọony amem bịn bịdi onme iloghi ạbidi, ọḅile ọsighiogh bịdi, kụ ọkpaariom bịdi ọḅile oḍighi ạrebene.

^12-13 Kụ Ọmoogh-we Ẹnaan phọ Ịzirel ụḅeni ịmi ọḅeni awe phọ mọ, “Mị ughiran ịyo rꞌạburude ạburude anyina mem dị mị ạtagharan bịdi ẹpe Ijipt kụ ạatoghion bịdi esi ạdol ạrebene. Mị ụḅeni bịdi mọ

¹⁴ tọrobo amem dị ẹman oḍual ạsia bịdi koseere ghan dọl ẹereegh tọrobo ẹbene ọnyo aHibru dị maḍighinaan rꞌạbidi odiiny ạsia, kụ ạburude ạburude anyina úler rụru ụ́naghanan ịmi ḅịle mꞌọnaghan ịlo mị ạḅem.

¹⁵ Esi asiḍughul-otu dị pụruku eten nyina inme iloghi anyina kụ eḍighi ịdi ịḅeeraan ịmi. Oomo phọ anyina emeeraam osereghi ạrebene ạbuo Ịzirel dọl ẹereegh kụ nyina eghiran ịyo risigh ạmi sịphe Otu Ịiḅereghi phọ ruuseeny ghan bọ ịmi.

¹⁶ Kụ nyina mẹḅile kẹn enme iloghi kụ ẹḅile iifolomi ịmi. Oomo phọ anyina mẹḅile kẹn ẹsighiogh rẹbene phọ bụphe nyina esereghi bọ ịdipho bịdi ọwa bọ, kụ nyina ẹkpaariom bịdi ọḅile kẹn oḍighi rẹbene.

¹⁷ Kụ nyịidipho, mị, Ọmoogh-we phọ, ạḅem mọ nyina mẹḅaar ẹmhu esi ạmi; nyina ke̋sereghi bumor phọ anyina we Ịzirel phọ dọl ẹereegh. Ọkar agey, mẹteeny mị kịngo inyina dọl ẹereegh: ẹereegh omugh esi ẹgham, ẹzegh rꞌọkoony. Mị kaḍighi ịdi tọrobo eelhe ịsien aḅirini phọ kokiilaan ọmiin ịpe mị iḍighi bọ inyina.

^18-19 Awe iiḍighi aJuda rꞌaJeruselem, ḅịle rꞌạbuo iiḍighi ogiga ọdaam mọ, ariil ạrikia phọ rꞌoomo abuḍiemiom mọ ughiran ịyo rꞌạmi mọ bịdi kotelhe ghan igbo ịyal arukulha aḍilephiri ạnam dị bịdi osoph ịyal arukulha. Kụ ọlo bịdi oogbonyon ịyo phọ bịn ụ́daph ịpe ọghaaph bọ. Kụ mị kaḍighi we phọ ạbuen ịdipho oḍighi bọ ḍilephiri ạnam mọ.

²⁰ Mị kạḅogh bịdi ạngo bụmulogh-ḍien phọ ạbidi, bụphe rọwa bọ ọze ạbidi, kụ ruzu awe ạbidi dị momuughu ịnun rꞌilhom ịnam kụ kẹba.

²¹ Mị kạḅile ạḅogh Zẹdekaya ọdaam mọ aJuda rꞌawe iiḍighi phọ ọdi ạngo bụphe rọwa bọ ọze ạbidi. Mị kạḅogh bịdi ạngo we ẹgham mọ ạBabilon, bụphe mọwile bọ ozuom ghan anyina.

²² Mị kạto ạḅeni kụ bịdi kotigheel sịen ẹmha phọ ẹphen. Bịdi kozuom ni, ọsighe, kụ ọsu nịan oogulemi. Mị kaḍighi rạmha phọ aJuda mụdi ade ịisaar dị oye útugh. Mị, Ọmoogh-we phọ, kụ mạḅem.”