Jerimaya 32 - Ạḍinya Iigbia

AJerimaya ako de

¹ Ọmoogh-we phọ ụḅaanaan ịmi lhạ phọ ạḍiphe emuneniom bọ ḍioph ạsia phọ emiigh mem mọ ạZedekaya ạda bọ Juda, ạḍien phọ iḍighi lhạ dị emuneniom ḍioph rꞌọphaanya ạsia dị ạNebukadnezar mạda Bạbilonia.

² Mem mọ ọpo awe ẹgham ọdaam-ẹmha phọ ạBabilon mokpobiom Jeruselem kụ kẹn musiph ịmi ọkasiom ologhi ogiga ọdaam-ẹmha phọ.

³ ẠZedekaya ọdaam mọ musiph ịmi ạlogh ikoli sịphe, ịdi eḍighi bọ mị ụḅeni we phọ mọ Ọmoogh-we phọ mạḅem mọ, “Mị kaḍighi ịdi ọdaam-ẹmha phọ ạBabilon kạsighe egbogh ẹmha phọ ẹphen.

⁴ Ḅịle kẹn mọ ạZedekaya ọdaam mọ kákpetenaan. Kọḅogh ni nyọdi ọngo ọdaam eelhe phọ ạBabilon; ịyal ạbidi kọmiinan risigh rꞌarisigh kụ ọdi ạḅaanaan nyọdi rꞌaloor.

⁵ Kọsighe ni Zẹdekaya ọkimom Bạbilonia, kụ ọdi kạtol ẹpe tụtu mị aḍighi nyọdi ịlo mị kaḍighi. Ghạlamo ọdi eenan rꞌawe ạBabilon, kẹ́nighenom nyọdi. Mị Ọmoogh-we phọ kụ mạḅem.”

⁶ Ọmoogh-we phọ ụḅeni ịmi mọ

⁷ aHanamel ọony aSalum umor ọde ạmi katu esi ạmi loor esi dị ọdi rụwa ịmi ogho ade ọdi ẹpe Anatot sịphe eelhe ạBenjamin, ịdi eḍighi bọ mị kụ ọnyo asiya ọdi dị atuman kụ ạmoogh elhiom ogho.

⁸ Kụ, ịdipho Ọmoogh-we phọ mạḅem bọ, aHanamel aru ni ụteeny ịmi sịphe ogbo ogiga phọ kụ ụḅeni ịmi ogho ade phọ. Kụ mị alegheri mọ Ọmoogh-we phọ mạkar ụḅaanaan ịmi.

⁹ Mị agho de phọ ḍịghaagh aHanamel kụ ạto ẹemor ikpoki phọ omerenyan bọ ạngo nyọdi; umerenyan osiemi ḍioph rꞌoḍual ipoḍi asilva.

¹⁰ Mị ạdaphari ḍịghaagh ạmi ạḅile ạdaphari oba elegh ḍịnya ibool phọ, oye dị ạrol aani ạdaphari kẹn ḍịghaagh, kụ ạto ẹemor ikpoki phọ ạnyu ọtoom ẹemor phọ.

¹¹ Kụ mị ạsighe ịyal phọ ạrinya ibool phọ — ạḍiphe elegh phọ rꞌịpe ọmerenyan bọ, rꞌạḍiphe elegh ụ́logh bọ —

¹² kụ ạngo ịyal phọ ịne Baruk ọony aNeraya rꞌọony ọony aMaseya. Mị ụḅogh ni rịnya phọ ạngo nyọdi sịphe risigh aHanamel rꞌạbuphe ọdaphari yogh bọ rạghaagh ḍịnya ibool phọ rꞌạbuphe ọrologhu bọ ude sịphe ogiga phọ mem mọ ọpo phọ.

¹³ Risigh oomo phọ ạbidi, mị ạḅeni Baruk mọ,

¹⁴ “Egbogh Ẹnaan phọ Ịzirel Ọmoogh-we phọ mạto ạḅeni nyịna ọsighe ạrinya ibool ade phọ ịphen, ḍịphe ọlogh bọ elegh phọ rꞌạḍiphe ụ́logh bọ elegh phọ, kụ ọlogh ịyal phọ ịdi ologhi izoki dị ọlhemom ạḅay, ọbo ẹmaar ẹrol sịa dị retu.

¹⁵ Ọmoogh-we Egbogh Ẹnaan phọ Ịzirel mạḅem mọ kọḅile ni oko ghan ruutu, rere, rꞌiizo iimuma avain sịen ade phọ aḍien.”

Ịiḅereghi aJerimaya

¹⁶ Rọḅogh rịnya ibool ade phọ rọngo Baruk kụ mị ạaḅereghi mọ

¹⁷ “Ọkar Ogbogh Ọmoogh-we, nạ ụlhem de phọ rꞌokuaḍio phọ rꞌịikpo ạna rꞌịnyaam ạna; ịyaar ílho dị ẹkparanaan nyịna.

¹⁸ Nạ maḍeenaan ẹphomoghian dị rébi ghan ạngo ịbadi ạsimuunir, kụ ọlo mạḅile kẹn ni ạliom weye loor ịkaraph ạburude rꞌaburunhiin phọ ạbidi. Nạ kụ Egbogh Ẹnaan dị ẹmoogh ịikpo, Ọmoogh-we phọ.

¹⁹ Nạ kụ oye ịma igbiighi dị raḍighi ghan igbogh ạraraar. Nạ ạmiin tọrobo ịyaar lọ awe oḍighi, kụ nạ rạngo ghan ruunmo lọ ẹkpianaan rꞌeḍighinom ạraraar phọ ạbidi.

²⁰ Mem dị mebia ni iboom, nạ uḍighi ni ịiḍaany rꞌiiḍighi aḍiigu ẹpe Ijipt, kụ nạ raḍighi ghan ni kꞌarodon, sịen Ịzirel ḅịle rꞌigbo oomo ịnon areelhe, kụ ịduon phọ molegheri nyịna oomo ariikpisi.

²¹ Loor esi ịiḍaany rꞌiiḍighi aḍiigu dị ẹngo oghiilaan bụmulogh-ḍien ayoor, nạ ụsighe ịikpo ạna rꞌịnyaam ạna kụ ạsighe weye ạna Ịzirel ạḍuanam ẹpe Ijipt.

²² Nạ ạngo bịdi de ẹnuum, ịdipho nạ maguanaan bọ bụrude ạburude phọ ạbidi.

²³ Kụ mem dị bịdi osi sịen ade phọ ạḍien rọmoogh, bịn bịdi ụ́naghanan mun ịtooghi phọ ạna, ụ́ḅile ụ́daph ịtughemi phọ ạna; bịdi úḍighi rꞌeniin ịyaar lọ nạ ạto ạḅeni bịdi mọ oḍighi. Loor ịduon phọ kụ nạ ạsighe oomo oogulaan phọ ọphon aruomaan bịdi.

²⁴ “Awe ạBabilon phọ mokoom oomo ẹmha phọ okpobiom ọmoogh, kụ mọnya rozuom. Ẹgham, ạdol ọkoony rꞌẹzegh keḍighi ịdi ẹmha phọ keḍigh rạghaagh ạbidi. Nạ kạmiin ni mọ oomo phọ ịpe nạ ạḅem bọ memite.

²⁵ Ghạlamo ịduon phọ, Ọkar Ogbogh Ọmoogh-we, nạ kụ ụḅeni bọ ịmi ogho ade phọ esi dị awe ọrol aani, ghạlamo ịduon ẹmha phọ rẹwa bọ ni omeel oḍigh ạraghaagh awe ạBabilon.”

²⁶ Kụ Ọmoogh-we phọ ụḅeni ni ịmi mọ,

²⁷ “Mị kụ Ọmoogh-we Ẹnaan phọ oomo awe. Ịyaar ílho dị ịkparanaan ịmi.

²⁸ Mị kạḅogh ni ẹmha phọ ẹphen ạngo Nẹbukadnezar ogbogh ọdaam mọ ạBabilon rꞌawe ẹgham ọdi; bịdi kọsighe ni

²⁹ kụ ọsu nịan. Bịdi kọsu ni ẹmha phọ ọḅile ọḅaram ruutu lọ awe mọrol ghan oḍighi ịlo kẹkagh ologhi ạmi esi ọsuughi ịnsens ọngo aBaal ẹpe ạnyu aruutu phọ ọḅile omoroghi miim ọngo ịnon aruru.

³⁰ Kꞌẹḅel emiighom mọ awe phọ Ịzirel rꞌawe phọ aJuda moḍighi ghan ni ịdi ị́nighe dị kiḍighi ịmi ịlo ophin ologhi.

³¹ Kꞌaḍio phọ ẹmha phọ ẹphen emite bọ, awe phọ ruḍighi ghan ịmi rạraar oboom ophin ologhi. Mị mạḅem mọ mị kapiemi ẹmha phọ

³² loor oomo ịkaraph phọ ịpe awe aJuda rꞌaJeruselem ḅịle rꞌạbudaam mọ rꞌariil ạrikia phọ rꞌariil phọ ạbidi moḍighi yogh bọ.

³³ Bịdi ụgumom ịmi ọman; kụ ghạlamo ịduon mị ạphamanam bọ ni ọtughemi ạbidi, bịdi úmeera ni ụ́naghanan ḅịle ụ́tuugha.

³⁴ Bịdi ụkar ghụn kụ ọḅamaghi ịkaaghineen ạraraar isa phọ ạbidi sịphe Otu Ịiḅereghi phọ ọlogh bọ ooseeny ghan ạmi, kụ bịdi mọopu,

³⁵ Bịdi mọkaanaan renmeny Baal sịphe Eḍiiny aHinom, oḍighinom ịyaar aghuḍum nmụny rꞌạnmanyaan ạbidi ọngo eru ạMolek. Mị ụ́to ụ́ḅeni mọ oḍighi ịphen, kụ íḍigh kẹn ologhi ạmi mọ bịdi koḍighi ịdi awe aJuda koḍighi ịkaraph dị ẹrol ịduon.”

Oguanaan oḍuom ologhi

³⁶ Ẹnaan phọ Ịzirel Ọmoogh-we phọ ụḅeni ni ịmi: “Jerimaya, awe phọ rọḅem ghan mọ ẹgham, ạdol ọkoony rꞌẹzegh keḍighi ịdi ẹmha phọ ẹphen kemeel eḍigh rạghaagh ọdaam-ẹmha phọ ạBabilon. Nyịidipho nạghanan ịnon ịdi mị kạḅile ạkaaph.

³⁷ Mị kaakpomoghi ni we phọ ọḍua bọ oomo areelhe phọ mị ạawalalami bọ bịdi rꞌophin ologhi phọ, kụ mị ạsighe bịdi atu esi phọ ịsien kụ aḍighi ịdi bịdi kọtol rꞌẹepho.

³⁸ Kụ bịdi koḍighi weye ạmi, kụ mị kaḍighi Ẹnaan ạbidi.

³⁹ Eniin ẹephua kụ ẹdi mị kạngo bịdi: ọngo ạmi eghuan oomo amem, ịlo kẹnighenaan bịdi rꞌạnmuny ạnmuny ạbidi.

⁴⁰ Mị kakiran rꞌạbidi ịyo dị kẹtol kꞌagee-pọ. Mị kásophe oḍighinaan ghan ạbidi igey ạraraar, kụ mị aḍighi ịdi bịdi kughiilaan ghan ịmi rꞌoomo ologhi ạbidi, bịn bịdi kọ́ḍua mun loor ạmi.

⁴¹ Rꞌọḅaal ologhi kụ mị aḍighinaan ghan bịdi igey ạraraar, kụ mị aseere bịdi amiighemi sịen ade phọ ạḍien.

⁴² “Ịdipho mị mạsighe bọ ịminimiin phọ ịphen aruomaan we phọ ạbuen, ịduon kụ ẹdi mị kạngo bịdi oomo igey ạraraar phọ mị maguanaan bọ.

⁴³ Awe phọ rọḅem ghan mọ ade phọ ạḍien kẹkigh de ịisaar dị awe rꞌịnam útugh, kụ kọḅogh ọngo weye ạBabilon. Kụ ọlo kọḅile ni oko rere sịen ade phọ ạḍien.

⁴⁴ Awe kokooghi ni rere, kụ ọge rịnya ibool, ọdaphari rạghaagh ạbidi ghisigh awe dị ọrol sịphe ọmiin aani. Ịphen phọ kemite ẹpe eelhe ạBenjamin, sịphe ịbam ạramha phọ ekoom bọ Jeruselem, sịphe igbogh ạramha phọ aJuda, rꞌạramha ịigaany ạraaḅaraph phọ, rꞌariisi ọḍua kụ ọsiiny aroogbolom mọ rꞌẹpe esoorom aJuda. Mị kạḅile ni aḅulemi we phọ sịphe ade phọ ạbidi. Mị Ọmoogh-we phọ kụ mạḅem.”