Jerimaya 27 - Ạḍinya Iigbia

AJerimaya ạgban ọfeguma

¹ Pụruku ạZedekaya ọony aJosaya aḍighi ọdaam-ẹmha aJuda, bịn Ọmoogh-we phọ ụḅeni ịmi

² mọ mị ụsighe ọfeguma ozu ẹnam rꞌipoḍi oreeny dị ẹgbagh ụgban orum ạmi.

³ Kụ Ọmoogh-we phọ ụḅeni ịmi mọ mị ụngo dom ikpolom aruuruen dị oru Jeruselem ọmiin ạZedekaya ọdaam ẹmha phọ mọ bịdi ọghiomonaan bụdaam mọ Idom, Mọab, Amon, Taya rꞌaSaidon.

⁴ Ọmoogh-we Egbogh Ẹnaan phọ Ịzirel ụḅeni ịmi ọto ọngo ạbidi mọ ọḅeni bụdaam ẹmha phọ ạbidi mọ Ọmoogh-we phọ mạḅem:

⁵ Esi igbogh ịikpo phọ ạmi rꞌịnyaam ạmi kụ mị ạlhem bọ aḅirini phọ, weye, rꞌịnam dị edi sịphe ade phọ; kụ ẹdi mị ạngo tọrobo oye lọ mị kụ ạsaḅar.

⁶ Mị kụ useere bọ oomo areelhe phọ eeḍian otelhedom mọ ạmi Nẹbukadnezar ogbogh ọdaam mọ ạBabilon, kụ mị maḍighi ịdi ghạlamo rꞌilhom ịnam mọ kesooromi loor ẹngo nyọdi.

⁷ Oomo areelhe kekumu nyọdi ẹḅile ekumu kẹn mọony ọdi rꞌọony ọony ọdi tụtu ẹteeny amem dị eelhe phọ ọdi kemeel. Kụ eelhe phọ ọdi kekumu ẹngo reelhe dị ẹmoogh ịikpo rꞌigbogh ạbudaam.

⁸ “Kụ eḍighi ịyaar dị eelhe, mꞌọmar, késooromi loor ẹ́ngo ịtooghi phọ ọdi, pọ mị kạsighe ẹgham, ọkoony rꞌẹzegh kụ ạliom eelhe phọ tụtu mị ạngo ọgel ạNebukadnezar mọ aphiemi bịdi ạman.

⁹ Kẹ́naghanan riil phọ anyina rꞌạtorobo oye lọ ạḅem mọ ọno katue ni ạmiin uḍien, mꞌesi ạramalha, mꞌesi ọmagh aruwaloor awe lọ momuughu, mꞌesi ịiḍaany. Oomo ạbidi ịḅeni inyina mọ késooromi siloor ẹngo ọdaam-eelhe phọ ạBabilon.

¹⁰ Bịdi riikeleghi ni inyina kụ koḍighi ịdi kịsighe inyina ọḍuanam ọki ekpisi dị ẹkelan rere phọ anyina. Mị kiphorogh inyina ạkele kụ iphiemi inyina.

¹¹ Kụ eḍighi ịyaar dị eelhe ẹrol dị esooromi loor kụ ẹngo ọdaam-eelhe phọ ạBabilon kụ ekumu nyọdi, pọ mị kameera ni mọ bịdi ọrol sịphe ade phọ ọdi, oḅeph iizo ọḅile orugh sịphe phọ. Mị, Ọmoogh-we phọ, kụ mạḅem.”

¹² Mị ụḅeni kẹn ni ịduon Zẹdekaya ọdaam mọ aJuda mọ, “Sooromi loor ạngo ọdaam eelhe phọ ạBabilon. Kumu nyọdi rꞌaweye ọdi, bịn nạ kạtol li abia.

¹³ Iḍighi ika kụ ẹgham mꞌọkoony mꞌẹzegh keghiigh bọ nyịna rꞌawe phọ ạna? Ịphen kụ ịdi Ọmoogh-we phọ mạḅem mọ kemitenaan tọrobo eelhe dị ọdaam mọ ạbidi úsooromi loor ụ́ngo ọdaam eelhe phọ ạBabilon.

¹⁴ Kẹ́naghanan riil lọ ịḅeni inyina mọ kéler loor anyina ẹngo nyọdi. Bịdi riikeleghi ni inyina.

¹⁵ Ọmoogh-we phọ rꞌaloor mạḅem ni mọ ọno kụ bịdi órom kụ bịdi mọsighe ḍien ọno rọgbaam ọkpe kịḅeni inyina. Loor ịduon phọ ọdi kiphorogh ni inyina, ạḅile ịze inyina, rꞌariil phọ rọgba ghan bọ ọkpe phọ ọphon.”

¹⁶ Pọ kụ amem dị mị ạḅeni bụpinyon rịkia phọ rꞌawe phọ mọ Ọmoogh-we phọ mạḅem mọ: “Kẹ́naghanan riil phọ ọḅem bọ mọ kébia kụ oḅulemi ruphua Otu Ịiḅereghi phọ ịpe mosiemi bọ ẹpe Bạbilonia. Bịdi rịgbaam inyina ọkpe.

¹⁷ Kẹ́naghanan bịdi. Isooromi loor ẹngo ọdaam eelhe phọ ạBabilon bịn nyina kẹtol li, ọbo ẹmha phọ ẹphen keḍighi ghan bọ ekpolom ạraraar dị ẹphuughi.

¹⁸ Eḍighi ịyaar dị bịdi ọkar ri oru riil dị ọpham ni dom mọ ạmi, mịnighe dị bịdi mụlom mọ mị Ọmoogh-we Oomo Ịikpo phọ kúmeera awe ọsighiogh ruphua Otu Ịiḅereghi phọ rꞌogiga ọdaam mọ ogheelom ẹpe Bạbilonia.”

^19-20 (Mem mọ ọpo ạNebukadnezar ogbogh ọdaam mọ ạsighe bọ Jehoyasin ọony aJehoyakim ọdaam mọ aJuda ḅịle rꞌabuḍiemiom awe phọ aJuda rꞌaJeruselem ạghimom ẹpe Bạbilonia, ọdi ạwile ni ịmeremiom mọ, bạfu dị oḍighinom enaba, rughuugh-ude dị ẹmoogh idighila, rꞌịnon aruphua Otu Ịiḅereghi phọ.)

²¹ “Ịnaghan ịphen mị Ọmoogh-we Egbogh Ẹnaan phọ Ịzirel rạḅem ghan bọ ịlo aruphua phọ ọwile bọ sịphe Otu Ịiḅereghi phọ ḅịle rꞌogiga ọdaam mọ ẹpe Jeruselem:

²² Kọsighiogh ni ọkimom ẹpe Bạbilonia osereghi tụtu mị akiririom aphogh. Kụ mị agbi nụun ọsighe ạbidi oḅulemi kụ osereghi ịsien esi phọ ẹphen. Mị, Ọmoogh-we phọ, kụ mạḅem.”