Jerimaya 26 - Ạḍinya Iigbia

Ọmeremi aJerimaya esi ịiruen

¹ AJehoyakim ọony phọ aJosaya ạda bọ Juda íbia,

² bịn Ọmoogh-we phọ ụḅeni ịmi mọ, “Mẹera sịphe ogiga Otu Ịiḅereghi phọ kụ agbeelom oomo ịpe mị ạto bọ ạḅeni nyịna mọ ḅẹni weye phọ ạbuphe ọḍua bọ rạmha phọ aJuda kụ oru ọoḅereghi ịsien phọ. Kámuton rꞌeniin ịyaar.

³ Iini sịen awe phọ koler ri rụru bịn ọbile yogh ịkaraph areten phọ ạbidi. Eḍighi ịyaar dị bịdi ọwile, pọ mị kanme ni ologhi ạmi esi ịpe mị agbiighi bọ oogulemi ạbidi loor esi ịkaraph iiḍighi phọ ạbidi.”

⁴ Ọmoogh-we phọ ụḅeni ịmi ọḅeni awe phọ, “Mị Ọmoogh-we phọ mạḅem mọ nyina ẹmoogh ọnaghanan ạmi rꞌọdaphan ịtughemi phọ mị ịngo bọ inyina,

⁵ ḅịle kẹn rꞌoler ạruru ịpe abutelhedom mọ ạmi, ariil phọ rọkaaph bọ, bụphe mị ratom ghan bọ kiruom inyina. Nyina rꞌamem kẹ̋naghanan ghan ịpe bịdi rọkaaph bọ.

⁶ Eḍighi ịyaar dị nyina ẹrolom ni ẹ́naghanan phọ, pọ mị kaḍighi ni Otu Ịiḅereghi phọ ọphon ịpe mị aḍighi bọ Sailo, kụ oomo areelhe aḅirini phọ ọsighe ghan ḍien ẹmha phọ ẹphen ịdipho ẹmha dị moruule.”

⁷ Ạbupinyon rịkia phọ rꞌariil phọ ḅịle rꞌoomo awe phọ ụnaghan ni dị mị rạkaaph rạraar phọ ịphen phọ sịphe Otu Ịiḅereghi phọ,

⁸ kụ ịduon mị rọghaaph bọ rọmadan ịpe Ọmoogh-we phọ ạto bọ mọ mị ụkaaph phọ, bịn bịdi usiph ịmi bịn ọlooghi ghan mọ, “Nạ mạkpe oghiigh loor esi ịphen phọ!

⁹ Eeghe kụ iḍighi kụ nạ ạsighe bọ ḍien Ọmoogh-we phọ rạḅemom ghan mọ Otu Ịiḅereghi phọ ọphon kạtol ịdipho aSailo ḅịle kẹn mọ koogulemi ẹmha phọ ẹphen kụ mọ oye kátugh mun sịen phọ?” Ọpo kụ amem dị awe phọ ukoom ịmi.

¹⁰ Mem dị abuḍiemiom mọ aJuda ọnaghan bọ ịphen memite bọ, bịdi ụḍua ni sịphe otu ọdaam mọ kụ oogborion ọghi ẹpe Otu Ịiḅereghi phọ kụ ọrologhu sịdol phọ ạbidi sịphe oghol bọ mọ Omoom Ọnhu-aḍibuo phọ.

¹¹ Kụ ariil ạrikia phọ rꞌariil uḍien phọ ọḅeni buḍiemiom mọ rꞌawe phọ, “Oye phọ ọphon ạkpe osophonaan ịiruen aḍuugh loor esi dị ọdi mạghaaph ịkaraph ẹmha phọ ayira. Nyina ịnaghan ni rꞌareḅeri anyina.”

¹² Kụ mị ạḅem, “Ọmoogh-we phọ kụ urom ịmi ogbeelom ạtorotoro ịyaar lọ nyina ẹnaghan dị mị ạghaaph dị egbolomaam Otu Ịiḅereghi phọ ọphon rꞌẹmha phọ ẹphen.

¹³ Ẹkpianaan dị nyina kenme dọl phọ nyina edi bọ ḅịle rꞌạraraar phọ nyina reḍighi bọ, ẹnaghanan ghụn Ọmoogh-we Ẹnaan phọ anyina. Eḍighi ịyaar lọ nyina ekiton, ọdi kanme ni ologhi phọ ọdi esi ịpe ọdi ạḅem bọ mọ ọno kiigulemi inyina phọ.

¹⁴ Ạmi ạmi, mị odi ḍịghaagh anyina. Iḍighi ịmi ịlo nyina ephogh mọ ẹnighe ni.

¹⁵ Kụ ọlo ilegheri ekuphom owol mọ: eḍighi ịyaar dị nyina ighiigh ịmi, pọ erugh miphum inyina rꞌawe ẹmha phọ ẹphen esi oghiigh oye dị mạar ụ́piom, loor esi dị Ọmoogh-we phọ ni kụ urom ịmi ọghaaph ọphurom anyina rụru.”

¹⁶ Pọ kụ amem dị abuḍiemiom mọ rꞌawe phọ ọḅeni bụpinyon rịkia phọ rꞌariil phọ, “Oye phọ ọphon aghol ghan ḍien Ọmoogh-we Ẹnaan phọ ayira kụ ạghaaph ghan bọ ụḅeni iyira; ọdi ọ́kpe oghiigh.”

¹⁷ Ịphen phọ reten, kụ abuniin ikumoor awe oḅerenu ọmeera kụ ọḅeni weye phọ ạbuphe mookpomoghan bọ,

¹⁸ “Mem mọ ọpo ạHezekaya kụ ạda bọ Juda, aMaika oyil phọ ọpo aMoreset ạḅeni ni oomo phọ awe phọ mọ Ẹnaan Ọmoogh-we Oomo Ịikpo phọ mạḅem mọ, “‘Koḅeph eḍien Zạyon ịdipho ozo, aJeruselem kaḍighi egu ạraraar lọ moogulemi, Ḅịle kẹn eegbolom Otu Ịiḅereghi phọ keten ẹekpua.’

¹⁹ “ẠHezekaya ọdaam mọ ḅịle rꞌawe phọ aJuda úkiigh Maika. Kpạripe ghụn ạHezekaya ạlogh ni eegu Ọmoogh-we phọ kụ ạwa ghan oḍighi ghan ịlo kẹḅeeraan nyọdi. Kụ Ọmoogh-we phọ anme ni ologhi phọ ọdi esi ịpe ọdi ạḅem bọ mọ ọno kaagulemi bịdi phọ. Nyịidipho yira rọwa ọsighe igbogh ịiḅaghami ọngo asiloor ayira.”

²⁰ (Ọnon oye ạrol kẹn ni, aYuraya ọony aSemaya ọlo ẹpe Kịriat Jiarim, dị aghol ḍien Ọmoogh-we phọ kụ ạghaaphanaan ịkaraph ẹmha phọ ẹphen ḅịle rꞌeelhe phọ ịdipho aJerimaya ạghaaph ghan bọ.

²¹ Mem dị aJehoyakim ọdaam mọ rꞌawe ẹgham mọ ọdi rꞌạbuo ịtooghi phọ ọdi ọnaghan bọ ịpe aYuraya ạḅem bọ, ọdaam mọ ạwa ni oghiigh ọdi kụ ọlo aYuraya ạnaghan ni ịpe ọdi rạwa bọ oḍighi phọ, kụ ọdi aghiilaan ni kụ asuma agheel ẹpe Ijipt.

²² Loor ịphen phọ aJehoyakim ọdaam mọ arom ni Ẹlnatan ọony Akbor rꞌạbunon awe mọ ọghi ẹpe Ijipt osiph aYuraya.

²³ Kụ bịdi osiph nyọdi oruomonaan Jehoyakim ọdaam mọ, kụ ọdi ạto mọ oghiigh Yuraya ọsighe ḍizu phọ otebeeny sịphe ẹkaraph eḍum ẹmha phọ.)

²⁴ Kụ ọlo loor esi dị Ahikam ọony phọ aSafan uḍighan bọ ịmi, ịmi ụ́ḅogh ụ́ngo weye phọ mọ oghiigh.