Jerimaya 23 - Ạḍinya Iigbia

Oḍuom ologhi odi ni ẹpe risigh

¹ Ịpe eeghia ịdi ịiruen Ọmoogh-we phọ kebeeph esi ạbuphe mophiemi bọ kụ ọḅile rọwalalami weye phọ ọdi!

² Ịphen kụ ịdi Ọmoogh-we Ẹnaan phọ Ịzirel rạḅem ịdi egbolomaam bụen ọda bọ weye phọ, bụen phọ ọkpe bọ ọmaar ophogh awe phọ ọdi: “Nyina weye phọ ạmi répogh agey; nyina mephorogh bịdi ẹwalalami. Nyịidipho mị kịliom inyina loor esi ịkaraph phọ nyina meḍighi bọ.

³ Mị kaakpomoghi weye phọ ạmi osugha bọ ọḍuaghu ẹpe areelhe phọ mị ạwalalami bọ bịdi, kụ mị ạsighe bịdi aḅulemi ẹpe ẹmha phọ ạbidi. Bịdi kọmoogh ni ịbadi ạnmuny ọḅile oḍiza we.

⁴ Mị kạmaaghi ni weye dị kọda bịdi agey. Awe phọ ạmi kókiil mun ruugu, ḅịle kẹn mị kạ́ḅile mun ạliom bịdi. Mị, Ọmoogh-we phọ, kụ mạḅem.”

⁵ Ọmoogh-we phọ ạḅem mọ, “Amem retu ni dị mị kạsaḅar oye aruukuan ọlo ẹemara ẹemara aDevid kụ aḍighi ọdaam ẹmha. Ọdaam ẹmha phọ ọpo phọ kạsighe ni olegheri-ịyaar kụ apoghom weye phọ ạḅile aḍighi ghan ịpe eseleman bọ ẹḅile eḍighi elhiom sịen oomo ade phọ.

⁶ Mem mọ ọpo ọdi kạda bọ, ịyaar kẹ́eḅaghami weye phọ aJuda, ḅịle kẹn awe phọ Ịzirel kọtolom ni rꞌẹepho. Kokol ghan nyọdi ‘Ọmoogh-we phọ Ọpelia phọ ayoor.’”

⁷ Ọmoogh-we phọ rạḅem ghan, “Amem mọ retu ni dị awe kókunya mun esi aḍien phọ ạmi Ẹnaan phọ ẹpe edi ghan bọ bịn ọpo ạsighe bọ nmụny Ịzirel amitiom ẹpe ade phọ Ijipt.

⁸ Kpạripe ghụn bịdi kughol ghan ịmi kụ okunya ịdipho Ẹnaan phọ ẹpe edi ghan bọ bịn ọpo ạsighe bọ weye phọ Ịzirel amitiom ẹpe ade ephunom mọ, ḅịle kẹn rꞌẹpe oomo ịpheri phọ areelhe phọ ịpe mị ạwalalami bọ bịdi. Kụ bịdi ogbi orugh ịsien ade phọ ạbidi.”

Adom aJerimaya dị egbolomaam riil phọ Ẹnaan

⁹ Ekpom ạmi mẹezighiḍian, aruugu rusiph ni ịmi. Loor esi Ọmoogh-we phọ, loor esi ikpo ọnhu iigbia phọ ọdi, mị ạkigh oye dị amiim rakiigh, oye dị mạphughol muboom amiim.

¹⁰ Awe dị Ọmoogh-we phọ ụ́pamanam omuza sịen ade phọ; bịdi odi ghan dọl ịkaraph, ọḅile ọsighe ịikpo phọ ạbidi roḍighinom ịlo ẹḅeeraan. Loor ịdi Ọmoogh-we phọ maronyon, ade phọ edimom ọto ḅịle kẹn ạroogho phọ mạnuughi.

¹¹ Ọmoogh-we phọ rạḅem ghan, “Ariil phọ rꞌariil ạrikia phọ Ẹnaan úlegheri; mị masiphom bịdi dị roḍighi yogh ịkaraph ọkaraghi ịsiphe Otu Ịiḅereghi phọ.

¹² Areten phọ ạbidi kẹkorom ni ẹḅile ebil; mị kaḍighi ịdi bịdi kokpetaan omeel. Mị kaagulemi bịdi; amem ọliom ạbidi retu ni. Mị, Ọmoogh-we phọ, kụ mạḅem.

¹³ Mị mạmiin ni ịkaraph phọ ariil phọ aSameria moḍighi bọ; bịdi rokol ghan ḍien aBaal kụ kọghaaphom ḅịle kẹn awe phọ ạmi mọdaph bịdi ope eten.

¹⁴ Kụ ọlo mị mạmiin kẹn ni riil phọ ạbuphe aJeruselem dị oḍighi ịdi eeph epu sịen; bịdi role ghan ẹmha kọḅile ọgbaaghi ọkpe; bịdi rọloghonaan ghan ḍịghaagh weye mọ oḍighi yogh ịkaraph, bịn oye ólho mun dị ịkaraph ráḍighi. Esi ạmi bịdi obeeph aani ịdipho awe ạSodom rꞌaGomora.

¹⁵ “Loor ịduon phọ, ịphen kụ ịdi mị Ọmoogh-we Ẹnaan Oomo Ịikpo phọ ạḅem ịdi egbolomaam riil phọ aJeruselem: “Mị kạngo bịdi ireeny eghiḍim mọ ọraal ḅịle rꞌạmuum aḍuugh-aḍuugh mọ ọphughol, loor esi dị bịdi molheenye élegheri-Ẹnaan sịen ade phọ.”

¹⁶ Ọmoogh-we Ẹnaan Oomo Ịikpo phọ ạḅeni weye phọ aJeruselem, “Kéler rụru ịpe ariil phọ rọkaaph bọ; bịdi riikeleghi ni inyina. Bịdi rịḅeni ghan inyina rạraar ịitu-ologhi ạbidi kị́di mị mạḅem.

¹⁷ Weye phọ ạbuphe úmeera bọ ụ́naghanan ịpe mị mạḅem bọ, bịdi rọḅeni ghan mọ ịiḅaghami ílho. Ḅịle kẹn bịdi rọḅeni ghan weye dị ọḅaar ẹmhu mọ ịiḅaghami kẹ́ḅogh bịdi.”

¹⁸ Kụ mị ạḅem, “Rꞌoniin ọnyo ariil phọ ạbuen phọ ólho dị malhegheri ghan rạraar ịbooghian Ọmoogh-we phọ. Rꞌoniin ọnyo ạbidi kọ̋naghan ghan mụghumo ọnaghanan adom mọ ọdi, mụghumo kẹn olher ạruru esi ịpe ọdi ạḅem bọ.

¹⁹ Ọghagh-ologhi phọ ọdi ạkigh oghim, ogbogh oghim dị kakim ạnyu ạrumhu ạbukaraph awe phọ,

²⁰ kụ kásophe tụtu ọdi aḍighi oomo phọ ịpe ọdi magbiighi bọ oḍighi phọ. Siḍughul-otu dị retu awe phọ ọdi kọnaghan ni dị iikia kẹ́tol.”

²¹ Ọmoogh-we phọ ạḅem mọ, “Mị útom riil phọ ạbuen phọ, kụ bịdi ọghi bọ ni. Mị ụ́ngo bịdi dom, kụ bịdi ọsighe bọ ni ḍien phọ ạmi rọkaaphom.

²² Mụghumo bịdi ulegheri ni ịitughian phọ ạmi, ọbo bịdi mụkaaph ni dom mọ ạmi ọḅeni weye phọ ạmi, ḅịle kẹn muḍighi ni ịdi bịdi mụbile ḍịkaraph ạdol phọ ạbidi odi bọ ḅịle kẹn rꞌọwile yogh ịkaraph phọ bịdi roḍighi bọ.

²³ “Mị aḍighi Ẹnaan dị edi ghan tọrotoro esi, kéniin esi bịn.

²⁴ Oye kátue ạbooghian esi dị mị kátue ạmiin nyọdi. Nyina ílegheri mọ mị odi ni tọrotoro esi ẹpe kꞌạke rꞌịsien ade phọ ḍụghum?

²⁵ Mị alegheri ni ịpe ariil phọ ạbuen phọ mọghaaph bọ, bụen oghol bọ ḍien phọ ạmi rọgbaaghi ọkpe phọ, kụ rọḅem ghan bọ mọ mị kụ ụngo ni bụno dom mọ ạmi reten ạmalha-aḍughul.

²⁶ Ariil phọ ạbuen kọsighe ọkpe phọ ạbidi ookeleghiom weye phọ ạmi kꞌạpur-aḍio?

²⁷ Bịdi rogbi ghan mọ ạmalha phọ bụno rọgba ghan bọ kaḍighi ni ịdi awe phọ ạmi kuwula ịmi, ịdipho ạburude phọ ạbidi uwula bọ ịmi bịn ọdaph Baal.

²⁸ Oyil dị ạmalha mạlha ạkpe ni ọḅem mọ ọno ạmalha ni bịn, kụ ọlo oyil dị ạnaghan dom ạmi ạkpe ni ogbeelom adom mọ ạḍiphe phọ agey. Eeghia ạsuo kụ ọdi ọsighe ikpu kụ ọtomaam ịbiakpa?

²⁹ Adom mọ ạmi ẹkigh nịan, ḅịle kẹn rꞌạmana dị kọguroghom rạna oḅomoghi.

³⁰ Mị akiriom ni riil phọ ạbuphe oniin ạsighe bọ ikpo ọnhu oniin kụ agbeelom mụdi adom ạmi.

³¹ Mị akiriom kẹn ni riil phọ ạbuphe rọkaaph ghan bọ ịitughian ạbidi kụ ọḅem mọ ịḍua esi ạmi.

³² Iler rụru ịphen mị Ọmoogh-we phọ rạḅem bọ! Mị akiriom ni riil phọ ạbuphe rọgba ghan bọ mạlha ọkpe phọ ạbidi. Bịdi obaga rọgba ghan mạlha ọkpe phọ ạbidi kookeleghiom weye phọ ạmi. Mị kụ bịdi útom mụghumo ọto ọngo ạbidi mọ ọghi, ḅịle kẹn bịdi úḍighi ọloghonaan ạḍighaagh esi awe phọ ạmi rꞌẹnum. Mị, Ọmoogh-we phọ, kụ mạḅem.”

Adool Ọmoogh-we phọ

³³ Ọmoogh-we phọ ụḅeni ịmi, “Jerimaya, mem lọ oniin oye phọ ạmi, mụghumo oyil, mụghumo oyil ạrikia kụ apuru nyịna mọ, ‘Eeghia kụ adom Ọmoogh-we phọ?’ nạ kạḅeni nyọdi, ‘Nạ aḍighi ni dool esi Ọmoogh-we phọ, kụ ọdi kamutonaan ni nyịna.’

³⁴ Eḍighi ịyaar dị oniin oye phọ ạmi, mụghumo oyil, mụghumo oyil ạrikia kụ ạḅem, ‘Adool Ọmoogh-we phọ’, pọ mị kạliom ni nyọdi rꞌọto kꞌọdi.

³⁵ Kpạripe ghụn, ẹkpe dị oniin kapuru ghan rịghiri phọ ọdi ḅịle kẹn rꞌasiya phọ ọdi, ‘Ọmoogh-we phọ mạngo eeghia odọ ọphagharanaan? Ọmoogh-we phọ ạḅem ika?’

³⁶ Kụ iḍighi kụ bịdi kụ́ḅem ghan mun mọ ‘adool Ọmoogh-we phọ’, loor esi dị oye lọ ạḅem ịduon phọ, pọ mị kaḍighi ni ịdi adom mọ ạmi kẹkaraghi nụun eḍighi dool esi ọdi. Awe phọ mọopu ikpo ọnhu Ẹnaan phọ ạbidi, Ẹnaan phọ ẹpe edi ghan bọ bịn, Ẹnaan Oomo Ịikpo Ọmoogh-we phọ.

³⁷ Jerimaya, puru riil phọ, ‘Eeghia ọphagharanaan kụ ẹdi Ọmoogh-we phọ ịngo bọ inyina? Ọmoogh-we phọ ạḅem mọ meeghia?’

³⁸ Kụ eḍighi ịyaar dị bịdi opel ịto phọ ạmi kụ ọḅem ikpo ọnhu phọ ịphen ‘adool Ọmoogh-we phọ’, pọ ḅẹni bịdi mọ

³⁹ iikia ílho mị kạson ni bịdi atoph ạkele, bịdi ḅịle rꞌẹmha phọ mị ạngo bọ bịdi rꞌạburude ạburude phọ ạbidi.

⁴⁰ Mị kasiphe bịdi umugholoor dị eekuna ílho, ạḅile amuton bịdi eephoogh dị kóbula.”