Jerimaya 20 - Ạḍinya Iigbia

Ịikonoghian phọ aJerimaya rꞌaPashur oyil ạrikia phọ

¹ Mem dị oyil ạrikia Pashur ọony phọ Imer — ọdi kụ ogbogh oye ịtooghi sịphe Otu Ịiḅereghi phọ — ạnaghan bọ ịphen mị agbeelom bọ,

² ọdi ạto ni ạngo mọ ukuphogh ịmi ọḅile ụphaḍi ịmi oseere otumeniom ịsiphe oghol bọ mọ Ọnhu-aḍibuo ạBenjamin sịphe Otu Ịiḅereghi phọ.

³ Ḍịroor aḍio dị etum pạ, mem dị aPashur mạakpo izime phọ ụphaḍiom bọ ịmi, kụ mị ạḅeni nyọdi mọ, “Ọmoogh-we phọ nyịna óghol mọ aPashur. Ḍien dị ọdi mạngo nyịna okol mọ ‘Aruugu tọrobo esi’.

⁴ Ọmoogh-we phọ rꞌaloor kụ mạḅem: ‘Mị kaḍighi ịdi nạ kaḍighi ruugu ạngo loor phọ ạna ḅịle kẹn rꞌesi ạrighiri ạna, kụ nạ kạmiin ni dị elhool ẹgham ẹpomoghian phọ kẹze oomo phọ ạbidi. Mị kạḅogh oomo awe phọ aJuda ạlogh ḍịghaagh ọdaam-ẹmha phọ ạBabilon; ọdi kasiphi buniin aḍighi weye ikoli kụ ạpam akeelom ẹpe ẹmha phọ ọdi, kụ ọdi ạze buniin.

⁵ Mị kạngo kẹn ni ọgel mọ ẹpomoghian phọ ạbidi aru awum oomo ẹelha ẹmha phọ ẹphen, ạḅile ạsighiogh ruphua phọ ạbidi, ghạlamo rꞌikpoki ọdaam-ẹmha phọ aJuda, ọḅile otool oomo ạraraar phọ okeelom Bạbilonia.

⁶ Ịlo ạna, Pashur, kosiph ni nyịna ḅịle kẹn rꞌoomo ọto kꞌạna okeelom Bạbilonia. Nạ kamugh ni ọḅile oḍi nyịna ẹpe, ọḅaram oomo ạrighiri phọ ạna bụen nạ mạgbaaghi bọ ọkpe phọ ạḅeni.’”

AJerimaya ạkaaph ịiḅaghami ọdi ạḅeni Ọmoogh-we phọ

⁷ Ọmoogh-we, nạ muukeleghi ịmi, ḅịle kẹn mị mạmoogh mabi. Nạ kụ ụmoogh ịikpo upu ịmi, ḅịle kẹn nạ mạkpar upu ịmi. Tọrotoro oye rurulughi ghan ịmi, bịdi rụnmoghoghoom ghan ịmi oomo aḍio phọ.

⁸ Tọro amem lọ mị ạghaaph ịyaar, mị rạlooghi ghan mọ, “Igbagbaar-o! Oogulemi-o!” Ọmoogh-we, awe rụmilogh ghan ịmi kọḅile uutuuny ịmi oomo amem loor esi dị mị ragbeelom ghan bọ dom mọ ạna.

⁹ Kụ ọlo mem dị mị ạḅem mọ, “Mị kabula Ọmoogh-we phọ ḅịle kẹn mị kákol mun ḍien phọ ọdi ạkaaph ịyaar,” bịn adom mọ ạna mẹghigh nịan dị reemor ẹpe ologhi aloor phọ ạmi. Mị ạkparagha oḅoronom, kụ mị útue úḅoronom.

¹⁰ Mị ạnaghan ni dị awe roophola yogh, “Aruugu odi ni tọrotoro esi! Kụ iḍighi kụ ịgua ọghi ọghaaph ịkaraph ịlo ọdi ọḅeni bụo ịtooghi phọ!” Ghạlamo ọkaraghi ạrighiri ạmi bịn rokori ghan ọmiin emeel ạmi. Bịdi rọḅem ghan mọ, “Iini yira kotue ni ookeleghi nyọdi, osiph oḍighi oḅulemian.”

¹¹ Kụ ọlo nạ, Ọmoogh-we, odi ni rꞌạmi rꞌiboom mọ ịikpo phọ ạna, ḅịle kẹn ạbuphe rụgbiphoghom bọ ịmi komeleghu ni. Komuton bịdi eephoogh kꞌagee-pọ, loor esi dị bịdi kótue oḍighi ịyaar. Kótue obula omutonaan eephoogh phọ ạbidi.

¹² Kụ ọlo, Egbogh Ẹnaan Oomo Ịikpo Ọmoogh-we phọ, nạ kụ rapogh ghan ọkaraghi ịpe awe ọrol bọ; nạ kụ ulegheri ịpe edi bọ sịphe iloghi phọ ạbidi rꞌịitughian phọ ạbidi. Kụ iḍighi kụ mị rạwa ni ọmiin ịpe nạ kaḅulemian bọ ẹpomoghian phọ ạmi, loor esi dị mị mạḅogh ḍighiton phọ ạmi ạlogh rạghaagh ạna.

¹³ Ịmooronaan Ọmoogh-we phọ sụor! Iboom Ọmoogh-we phọ. Ọdi kụ rạtagharan ghan oye lọ rọkpiloghom sịphe ḍịghaagh ạbukaraph awe phọ.

¹⁴ Itulughi ḍio phọ ạḍiphe ụmar bọ ịmi! Ibula ḍio phọ ạḍiphe onhiin phọ ạmi ụmar bọ ịmi.

¹⁵ Itulughi oye phọ ọpo aḍighi bọ ịdi ologhi ọde ạmi ạḅaal mem mọ ọdi ạghi bọ ạḅeni, “Mọmar olephiri! Nạ mạmoogh olephiri ọony!”

¹⁶ Oye phọ ạghigh rạmha phọ ịpe Ọmoogh-we phọ aagulemi bọ ighirigiir ụ́nma bọ. Oye phọ ạnaghan ghan emoghi eephina ḍịroor ạḅile ạnaghan ḍịolho ẹgham mem ootaany,

¹⁷ loor esi dị oye phọ ịmi úghiigh kụ ogbi ọmar ạmi. Ọbo otu-ọony onhiin phọ ạmi maḍighi oḍi ạmi.

¹⁸ Eeghe kụ iḍighi kụ ụmar bọ ịmi? Ịtuan mọ mị ụmoogh ịiḅaghami rꞌọto, ukureri ghuḍum mọ ạmi rꞌumugholoor ḍụghum?