Jerimaya 2 - Ạḍinya Iigbia

Ẹnaan ẹmaar ri repogh Ịzirel

¹ Ọmoogh-we phọ ụḅeni ni ịmi

² mọ gbeelom dom mọ aḍien ạḅeni tọrotoro oye lọ odi Jeruselem. “Mị ạatughian ni omeeraam dị nyina ẹmoogh ghan mem ẹghoroghor phọ anyina, ịpe nyina ịphomoghian bọ ịmi mem mọ pụruku yira ạalan bọ. Nyina ịdaph ni ịmi ẹpe ẹdala phọ, ẹpe ade phọ oye kőḅeph ghan bọ.

³ Ịzirel, nyina iḍighi bụo ạmi bịn; nyina iḍighi we iigbia ạmi. Mị ụngo ghan ịminimiin ạḅile aagulemi tọrotoro oye lọ iḍighi inyina ịyaar lọ ị́nighe. Mị Ọmoogh-we phọ kụ ụghaaph.”

Ịkaraph ạburude ạburude Ịzirel

⁴ Iler rụru ẹnaghan dom Ọmoogh-we phọ, nyina ẹemara ẹemara phọ ạJekob, nyina arughunughun phọ Ịzirel.

⁵ Ọmoogh-we phọ rapuru ghan mọ, “Ạburude ạburude phọ anyina ụmiin eeghe ịkaraph loor ạmi? Eeghe kụ iḍighi kụ bịdi ọḍua bọ esi ạmi? Bịdi ụuḅereghi ghan ruru dị ị́moogh ịyaar oḍighinom bịn bịdi phọ kẹn ụ́moogh mun ịyaar oḍighinom.

⁶ Bịdi ịmi ụ́sighe mun ụ́manami ịyaar ghạlamo ịduon mị kụ ạtagharan bọ ni bịdi ḍịghaagh Ijipt ạḅile aḍiemiom bịdi ẹpe ẹdala phọ: ade ophugh, ade dị ẹgharaghar ẹḅile eḍighi ooto rꞌosooromineen, ekpisi dị oye kőrugh ghan ḅịle oye kꞌekulha kạ́ki.

⁷ Mị ụsighe bịdi asiemi ekpisi ade ẹnuum mọ bịdi ọghelom ibugha ekpisi phọ ḅịle rꞌịnon igey ạraraar ekpisi phọ. Kụ bịdi ụbile ghụn oogulemi de phọ ạmi; ọḅile ọopu eelhe phọ mị ạngo bọ bịdi.

⁸ Ạbupinyon rịkia phọ úpuru mọ, ‘Ọmoogh-we phọ odi ẹghen?’ Ariil ạrikia phọ ạmi ịmi úlegheri. Ạbuo ịtooghi phọ muruphiom ịmi ẹgham; ariil phọ Ẹnaan ọḅile okol ḍien aBaal kụ rọkaaphom ghan ọḅile rọoḅereghi ghan ruru dị ị́moogh ịyaar oḍighinom.

Aḍighiton Ọmoogh-we phọ rꞌawe phọ ọdi

⁹ “Kụ iḍighi kụ mị Ọmoogh-we phọ kạḅile ạgba aagbunion ḍighiton phọ ạmi rꞌawe phọ ạmi. Mị kạkaaph ịpe ạnmuny ạnmuny phọ ạbidi uḍighi bọ ịmi.

¹⁰ Kịa ẹpe erumuḍio phọ remeel ghan bọ ạghi asi ẹpe ekpolobi ạSaipros, ạḅile arom oye ạghi ẹpe erumuḍio phọ remite ghan bọ ẹpe ade phọ aKedar. Nạ kạmiin ni mọ ịyaar dị ẹrol ịduon ke̋mite ghan.

¹¹ Ẹnon eelhe ke̋nme ghan rụmugh ạbidi, ghạlamo ịdipho bịdi íḍighi bọ ni igey ạrumugh. Kụ ọlo awe phọ ạmi mọsighe ịnon ạrumugh uunmenenom ịmi, Ẹnaan phọ ẹpe ẹngo bọ bịdi rughuenian phọ, ọḅile rokumu rụmugh dị ịyaar kétue eḍighinaan bịdi.

¹² Kụ iḍighi kụ mị ạto ạngo mọ okuaḍio phọ aphiigha ịlo aruugu, amaghagha ạḅile aḍighi ịlo aruugu,

¹³ loor esi dị awe phọ ạmi moḍighi ịyal ọdo ịkaraph: bịdi mụwile ịmi ọḍua, okol ạmuukia ạmuum mọ, kụ bịdi mọghi oguphogh riini, riini dị kétue ẹpam mụum rꞌẹnum rꞌẹnum.

Ịikpia ẹ́naghan phọ Ịzirel

¹⁴ “Ịzirel kẹ́bene; Ụ́maram nyọdi dọl ạrebene. Kụ eeghe kụ iḍighi bọ kụ ạbumulogh-ḍien phọ ọdi ọtomoghi bọ nyọdi?

¹⁵ Bịdi rogbophoghu ghan kophoghom nyọdi ịdipho ạnam-dịka; bịdi motene de phọ ọdi de ophugh, ḅịle ạramha phọ meegulaan, oomo awe phọ mosumughu.

¹⁶ Ii, aweye phọ aMemfis rꞌaTapanes mokar ọkeeghi ẹmhu phọ ọdi.

¹⁷ Ịzirel, nạ kụ ụwa ni ịphen phọ! Nạ ụwile ịmi ạḍua, Ẹnaan phọ ạna Ọmoogh-we phọ, mem dị mị aḍiemiom ni nyịna rạkiom.

¹⁸ Nạ ụutughian ọmoogh eeghia ạsuo kụ ạghi bọ ẹpe Ijipt ọphughol ạmuum Ọphiiny aNail phọ? Nạ ụutughian ọmoogh eeghia ạsuo kụ ạghi bọ ẹpe Asiria ọphughol ạmuum Ọphiiny aYufratis phọ?

¹⁹ Ịkaraph phọ ạna kẹliom ni nyịna, kụ ọwile ạmi phọ nạ ạwile bọ kesoph ni ọoruen ephume nyịna. Nạ kalegheri ni eghiḍim dị ẹdi rꞌịdi eeph ọwile ạmi Ọkar Ogbogh Ọmoogh-we phọ, ḅịle rꞌịduon nạ ịmi ụ́naghanan mun bọ. Mị Ọkar Egbogh Ẹnaan Oomo Ịikpo Ọmoogh-we phọ kụ ụḅem.”

Ịzirel úmeera ụ́uḅereghi Ọmoogh-we phọ

²⁰ Ọkar Ogbogh Ọmoogh-we phọ ạḅem mọ, “Ịzirel, mebia ni nạ aghel bọ ịtooghi phọ ạmi; Nạ ómeera mun ụnaghanan ịmi ọḅile ụuḅereghi ịmi. Ạnyu ạtorotoro ẹeḅaraph rꞌeeḍian ạtorotoro oreeny, nạ rạaḅereghi ghan rụmugh ẹmaria.

²¹ Mị ụzuph nyịna ịdipho ooḅi oreeny avain, ikpo phọ ọsighe bọ ọzuph ịkar kẹn ni ẹnighe. Kụ ọlo mịin ịdi nạ manmia! Nạ ạkigh ọḅoria oreeny avain dị ụ́moogh ịyaar oḍighinom.

²² Ghạlamo nạ ụsighe sạḅa dị ạnighe iboom kụ awuraam mụum, mị kạmiin ni ẹenir phọ ẹbiph bọ nyịna loor esi ịkaraph phọ ạna.

²³ Nạ kaḍighi ika kụ ạḅem bọ mọ nạ ọ́opuan loor phọ ạna, mọ nạ kꞌekulha ọ́oḅereghi Baal? Pogh aani ịpe nạ ạpioman bọ ẹpe eḍiiny phọ; mịin ịpe nạ aḍighi bọ. Nạ ạkigh ẹnam ạkamel dị oye ụ́moogh kụ rạwa mọ olephiri phọ ạdaar nyịno, rakilighuan ghan bịn,

²⁴ akiil aḍigh ẹpe ẹdala phọ. Mem mọ ọpo ọdi rạwa bọ mọ ọdaar nyịno, ạnhian kụ katue ạpamaghan nyọdi? Olephiri dị rạwa nyọdi ọ́moogh ịiḅaghami; ẹteeny ọdaar phọ kạmiin ni nyọdi bịn ạdaar.

²⁵ Ịzirel, aruwol ạna kị́kola loor esi erelhe, ḅịle kẹn ẹḍogh ạna kị́karaghar loor esi ọwa ịnon ạrumugh. Kụ ọlo nạ ạḅem mọ, ‘Eeye! Mị kátue abula. Mị mạphomoghian iiruen ạrumugh kụ mị kạdaph ni bịdi.’”

Ịzirel ạkpe ni ọlhiom

²⁶ Ọmoogh-we phọ ạḅem mọ, “Ịdipho roofolomi ghan bọ ọḅa lọ osiph, ịduon kụ ịdi koofolomi oomo awe phọ Ịzirel — bụdaam mọ anyina rꞌạbuo ịtooghi phọ, bụpinyon rịkia phọ rꞌariil phọ anyina.

²⁷ Koofolomi ni oomo anyina — nyina phọ ẹḅem bọ mọ oreeny kụ ọde anyina ḅịle mọ aḍighiigh kụ onhiin anyina. Ịphen phọ kemite loor esi dị nyina mẹḍua esi ạmi kpạripe rꞌoru esi ạmi. Kụ ạri mem lọ nyina edi esi ịiḅaghami, nyina rịmagh ghan ịmi oru ọphel anyina.

²⁸ “Edi ẹghen ạrumugh phọ nyina ẹkaaghinaan bọ siloor phọ anyina? Mem lọ nyina edi esi ịiḅaghami, bịdi oru ịphel inyina — mụghumo bịdi otue! Juda, nyina ẹmoogh ịbadi ạrumugh ịdipho nyina ẹmoogh bọ ịbadi igbogh ạramha phọ.

²⁹ Ịiḅaghami phọ anyina eeghe? Eeghe kụ iḍighi kụ nyina miruphiom bọ ịmi ẹgham mọ?

³⁰ Mị ịliom ni inyina, kụ ọlo ạsuo ọ́rol; nyina ímeera mọ mị iilemi inyina. Nyina mẹze riil phọ anyina ịdipho ạnam-dịka dị ịyaar repin ologhi.

³¹ “Nyina aweye Ịzirel, iler rụru ẹnaghan ịphen mị rạkaaph bọ. Mịna ạkigh de ophugh esi anyina ḍụghum, ịdipho ade ufiri dị eḍighi ooto rꞌosooromineen? Eeghe kụ iḍighi bọ kụ nyina ẹḅem bọ mọ nyina keḍighi ịlo ịḅeeraan inyina, mọ nyina réḅula mun esi ạmi?

³² Esina ọnyani katue ni abula ịkuta iḅo phọ ọdi ḍụghum, ọbo kẹn ọnyani dị ophin katue ni abula ạsuoma apinien phọ ọdi ḍụghum? Kụ ọlo awe phọ ạmi muwula ịmi siḍughul-otu dị kótue mun ogbi.

³³ Nyina ẹkaraghi ni ẹmaar ọwa ạnmariir. Ghạlamo ọnyani dị ụ́moogh ịyaar oḍighinom katue ni ạtuugha ịyaar ḍịghaagh anyina.

³⁴ Ịḅaal arukulom rꞌịḅaal awe dị mạar ụ́piom ẹbiph ni rụsuoma phọ anyina, kị́ḅaal ạruḅa. “Kụ ghạlamo esi oomo phọ ịphen phọ ni,

³⁵ nạ rạḅem ghan mọ, ‘Mị ịyaar ụ́piom; ọkaraghi agey phọ ni Ọmoogh-we phọ ịmi rạ́kagham mun ologhi.’ Kụ ọlo mị Ọmoogh-we phọ kạliom ni nyịna loor esi dị nạ rạparanaan ghan mọ nạ ịkaraph óḍighi.

³⁶ Nạ maafola loor ọoḅereghi ạrumugh ịnon areelhe. Ijipt kobi ni nyịna ịdipho Asiria obi bọ nyịna.

³⁷ Nạ kạbile ni Ijipt rꞌumugholoor. Mị Ọmoogh-we phọ maghel bụphe nạ aḍuom bọ ologhi phọ; nạ kạ́moogh rꞌịyaar ḍịghaagh ạbidi.”