Jerimaya 17 - Ạḍinya Iigbia

Ịkaraph rꞌạmaliom mọ aJuda

¹ Ọmoogh-we phọ rạḅem mọ, “Nyina awe aJuda, ịkaraph phọ anyina ọsighe ọgeom dị aḍighi okuron kụ ọgeom; ọsighe ni ọsiosio ạdayamon kụ ọkaam ọlogh sịphe iloghi phọ anyina ḅịle kẹn rꞌọgbal arenmeny ạrikia phọ anyina.

² Awe phọ anyina rọoḅereghi ghan sịphe arenmeny phọ rꞌigbudu um-ạke Asera ọgbal ạtorotoro oreeny, rꞌạnyu ạraaḅaraph,

³ ḅịle kẹn rꞌạnyu aruugum ẹpe ẹdala ade phọ. Mị kaḍighi ịdi ẹpomoghian phọ anyina kọsighiogh ọḍuanam ẹelha phọ rꞌaruphua phọ anyina loor esi oomo ịkaraph phọ nyina meḍighi bọ sịen oomo phọ ade phọ anyina.

⁴ Kịkpianaan inyina ọwile ade phọ mị ịngo bọ inyina, ḅịle kẹn mị kaḍighi ịdi nyina kekumu ẹpomoghian phọ anyina rikpisi dị nyina ílegheri, loor esi dị ọghagh ologhi phọ ạmi ạkigh nịan dị kẹgber kꞌagee-pọ.”

Ịbadi asidogh

⁵ Ọmoogh-we phọ rạḅem, “Mị kasoph ni ọoruen apume oye lọ ụwile ịmi kụ ạsighe emooph ọdi ạkpasi esi oye, esi ịnyaam oye dị ramugh ghan ni.

⁶ Ọdi ạkigh ekpu eḍum dị edi de ophugh, ekpu eḍum dị edi esi ẹdala dị ạmuum úlho, de dị eḍighi boph dị ẹnon ịyaar rési ghan. Egey ịyaar kémitenaan ghan nyọdi.

⁷ “Kụ ọlo mị kạseph ni oye lọ ạsighe emooph ọdi ạkpasi esi ạmi.

⁸ Ọdi ạkigh oreeny dị rasi ọgbal ọphiiny kụ ạsighe sịni phọ ạghiom ẹpe ạmuum mọ. Oḅio ọdi kákaph mem lọ aḍio phọ ẹghologhol, loor esi dị ạrinya phọ ọdi edi gbadaam. Oḅio ọdi kákaph mem lọ ọlophia ụ́loph. Ọdi ramuum ghan iimuma bịn.

⁹ “Ạnhian kụ katue ạnaghanan ologhi oye? Ịyaar areekeleghian dị eeleeny ílho; ẹzegh phọ ọdi epel ookonom.

¹⁰ Mị Ọmoogh-we phọ kụ rạwaaghi ghan ịitughian phọ kạḅile aphogh iloghi phọ awe. Mị raḍighi ghan kạngo oye ọdaphan dọl phọ ọdi rꞌịpe ọdi raḍighi bọ.”

¹¹ Oye dị ạmoogh ikpoki reten iigbegheḍiom ạkigh ẹnun dị eḅom reghelhe dị ọdi kụ údoghoḍi. Amem dị aghuḍum mạkaraghi rạdugh esi ẹdi kụ ikpoki phọ ọdi epe, eekuna phọ ọdi kaḍighi uwelologhi.

¹² Otu Ịiḅereghi phọ ayira ạkigh ạgada ịtooghi arughuenian, dị ạmeera ạnyu eegum dị ephoph kꞌemiighom mọ.

¹³ Ọmoogh-we, nạ kụ oḍuom ologhi phọ Ịzirel; kosiphe ni umugholoor oomo awe lọ ọḅitonaan nyịna. Bịdi kope ịdipho asiḍien lọ ọge esi ophugh, loor esi dị bịdi mọḅitonaan nyịna Ọmoogh-we phọ aḍighi bọ okol ạmubo ạmuum.

AJerimaya ạlom Ọmoogh-we phọ ọloghonaan ạḍighaagh

¹⁴ Ọmoogh-we, uukonom ịmi bịn mị kạkaraghi ni amoon; ụtagharan ịmi bịn mị kạkaraghi ni akpetenaan. Nạ kụ ọdi mị raboomi ghan bọ!

¹⁵ Awe phọ rụḅeni ghan ịmi mọ, “Edi ẹghen ịpe Ọmoogh-we phọ ụpaarogh bọ iyoor? Ọdi aḍighi amitiom nyịidipho!”

¹⁶ Ọmoogh-we, mị nyịna ụ́kpuughiom oogulemi ạbidi; mị ụ́wa mọ ịiḅaghami ẹteeny bịdi. Ọmoogh-we, nạ alegheri ni ịphen phọ; nạ alegheri ni ịphen mị mạḅem bọ.

¹⁷ Kúḍighi ịmi ịlo aruugu nạ bịn kụ esi ịbooghian ạmi mem lọ ịiḅaghami eru.

¹⁸ Muton eephoogh bụphe rụgbiphoghom bọ ịmi, kụ ọlo ụgur ịmi ạsighe, Ọmoogh-we. Muzeḍinaan bịdi ruugu, kụ ọlo kúḍighi ịmi ịlo aruugu. Ḅomoghi bịdi ạḅile aagulemi bịdi.

Ịlo ooko ghan aḍio ophooghian phọ

¹⁹ Ọmoogh-we phọ ụḅeni ịmi mọ, “Jerimaya, kịa agbeelom dom mọ ạmi sịphe Ọnhu-aḍibuo Awe phọ, sịphe ạbudaam mọ aJuda rọḍua ghan bọ koḍigh ọḅile ọḍua omite sịphe ẹmha phọ; kụ agbi ọghi oomo ịpheri phọ ạrunhu-aḍibuo phọ aJeruselem.

²⁰ Ḅẹni bụdaam ẹmha phọ ḅịle kẹn rꞌoomo awe phọ aJuda rꞌạtorotoro oye lọ arugh Jeruselem ạḅile rakiton ghan rụnhu-aḍibuo phọ ịphen phọ, mọ olher rụru ọnaghan ịphen mị kạḅem bọ.

²¹ Ḅẹni bịdi mọ eḍighi ịyaar lọ bịdi ọphomoghian ni sighuḍum ạbidi, pọ bịdi kútool ghan dool ḍio ophooghian phọ, bịdi kútool ghan ịyaar úḍighom rụnhu-aḍibuo phọ aJeruselem,

²² mụghumo orool ịyaar omitiom sịphe aruutu phọ ạbidi ḍio ophooghian phọ. Bịdi kụ́ḅogh ịyaar úḍighi ḍio ophooghian phọ; bịdi ooko ghan ịdipho aḍio iigbia, ịdipho mị ạto bọ ạngo bụrude ạburude phọ ạbidi.

²³ Ạburude ạburude phọ ạbidi ịmi ụ́naghanan. Kpạripe ghụn bịdi ụḅaar ẹmhu; bịdi ịmi ụ́naghanan mụghumo ọtuugha esi ạmi.

²⁴ “Ḅẹni weye phọ ạbuen mọ bịdi ọnaghanan ịtooghi phọ ạmi. Bịdi kútool dool uḍighom rụnhu-aḍibuo ẹmha phọ ẹphen ḍio ophooghian phọ. Bịdi ooko ghan ḍio ophooghian phọ ịdipho aḍio iigbia ḅịle kẹn bịdi kụ́ḅogh ịyaar úḍighi.

²⁵ Ọpo kụ amem dị ạbudaam-ẹmha rꞌạbuo ịtooghi phọ ạbidi koḍiku rụnhu-aḍibuo phọ aJeruselem kụ ọmoogh aani ịikpo ọtooghi ịdipho aDevid ạmoogh ghan bọ. Kọḅophoghan rꞌawe phọ aJuda rꞌaJeruselem, kụ bịdi oḍiku rụsu rꞌarughuugh-ude, ḅịle kẹn awe komuza ghan ni ẹmha phọ aJeruselem.

²⁶ Awe kọḍua ni rạmha phọ aJuda ḅịle kẹn rꞌạramha phọ ịpe ekoom bọ Jeruselem otu; bịdi kọḍua ni ẹpe eelhe phọ ạBenjamin, ẹpe iizin ạraaḅaraph phọ, ẹpe aruugum mọ rꞌẹpe esoorom mọ aJuda kụ otu. Bịdi kọsighe ni otu sịphe Otu Ịiḅereghi phọ ạmi rịkia oguom ạnian, rꞌinmo ịbiakpa rꞌịnsens kụ ọḅaram ruunmo ọsephian.

²⁷ Kụ ọlo ẹkpe ni dị bịdi kụnaghanan ịmi ọḅile ooko ḍio ophooghian phọ ịdipho aḍio iigbia. Bịdi kútool dool úḍighom rụnhu-aḍibuo phọ aJeruselem ḍio phọ ạḍiphe phọ; eḍighi ịyaar dị bịdi orool oḍighom, mị kạlogh nịan rụnhu-aḍibuo phọ aJeruselem. Ạnian kụ kele rigiga ọdaam-ẹmha phọ aJeruselem, kụ oye ólho dị katue aḍime nịan phọ.”