Jerimaya 15 - Ạḍinya Iigbia

Awe phọ aJuda mophe

¹ Kụ Ọmoogh-we phọ ụḅeni ịmi mọ, “Ghạlamo aMozis rꞌạSamuel kụ uru ni ọmeera sịen kụ ụuḅereghian ịmi, mị kạ́nma ighirigiir weye phọ ạbuen. Ḅẹni bịdi ọḍua; ḅẹni bịdi mọ ọḍua risigh ạmi.

² Mem lọ bịdi opuru nyịna ekpisi phọ ẹpe bịdi kọki bọ, ḅẹni bịdi mọ mị mạḅem mọ: “Buniin mọḅogh ọngo mọ omuughu esi ẹzegh — ẹpe kụ esi dị bịdi kọki! Bụnon mọḅogh ọngo mọ omuughu erugh ẹgham — ẹpe kụ esi dị bịdi kọki! Buniin mọḅogh ọngo mọ omuughu esi ọkoony — ẹpe kụ esi dị bịdi kọki! Bụnon mọḅogh ọngo dị kosiphi bịdi odoghoḍi ikoli — ẹpe kụ esi dị bịdi kọki!

³ “Mị Ọmoogh-we phọ magbiighi ạman mọ inya ọdo iikia ịkaraph kụ kemitenaan bịdi: kọze bịdi erugh ẹgham; asuogh kụ kẹkogh ḍizu phọ ạbidi ẹḍuanam; ịnun kụ kẹba bịdi, ḅịle kẹn ilhom ịnam kụ kẹba ịyaar lọ esugha.

⁴ Mị kaḍighi ni ịdi keḍigh ruugu ọmiin ạbidi esi oomo awe aḅirini phọ loor esi ịpe ạManase ọony phọ ạHezekaya aḍighi yogh bọ ẹpe Jeruselem mem mọ ọpo ọdi aḍighi bọ ọdaam-ẹmha aJuda.”

⁵ Ọmoogh-we phọ ạḅem mọ, “Nyina awe aJeruselem, ạnhian kụ kịnma bọ inyina ighirigiir phọ, ḅịle kẹn ạnhian kụ kạmoogh ọto loor ẹmhu anyina? Ạnhian kụ kạmeera bọ akori opuru ịlo nyina edi?

⁶ Nyina mighel ịmi; nyina mịgumom ịmi ọman. Kụ iḍighi kụ mị mạgbuton ḍịghaagh ạmi ọogbighiḍi inyina loor esi dị mị útue mun ụ́pamaghan ọghagh ologhi phọ ạmi.

⁷ Esi ạtorotoro ẹmha sịen ade phọ mị itebeeny inyina ạngo ookuugh ịdipho ọpherepher. Mị iigulemi inyina, weye ạmi, mị ụze nmụny phọ anyina loor esi dị nyina ị́bile bọ ịkaraph areten phọ anyina.

⁸ Arukpukele ạnmariir dị odi sịen ade phọ anyina opel ịisaar ọgbal ọphiiny. Mị ụze ni ugheel ạnmuny phọ anyina ạḅile aḍighi ịdi aburunhiin phọ ạbidi ọmiinom. Mị ụgur bịdi ekperenom rꞌeephina ḅịle rꞌaruugu.

⁹ Onhiin phọ ọpo oḍual ạnmuny phọ ọdi omuughu bọ amuzaan ni ḍuugh, bịn rapooghu úseere-ạsighe. Ootaany ạnir phọ maten ufiri; momuton nyọdi eephoogh ḅịle kẹn ọngo ịiḅaghami ekpom mọ ọdi. Mị kạngo ni ọgel kụ ẹpomoghian phọ anyina ạze oomo ạbuphe osugha bọ ropooghu. Mị, Ọmoogh-we phọ, kụ mạḅem.”

AJerimaya ạkaaph ịiḅaghami phọ ọdi ạḅeni Ọmoogh-we phọ

¹⁰ Ologhi ạmi ọ́ḅaal! Eeghe kụ iḍighi kụ onhiin phọ ạmi ụmar bọ ịmi sịen aḅirini phọ nụun? Mị rạtuan ghan ọruonu kạḅile ạnunuan rꞌạtorotoro oye sịen ade phọ. Mị kọ̋ngo ghan oye ọmugh; kụ mị kọ̋lhe ghan ọmugh; kụ tọrotoro oye rụgurughi ghan ịmi.

¹¹ Ọmoogh-we, meera ni oomo igurughian phọ ạbidi eḍighi ekol eḍighi ịyaar dị mị úkumu nyịna agey, eḍighi ịyaar dị mị kőghol ghan ẹmhu ẹpomoghian phọ ạmi ạaḅereghian nyịna mem mọ ọpo bịdi ọrol bọ esi ịiḅaghami phọ.

¹² (Oye ólho dị katue abun okuron, eḍighi nụun ni okuron phọ ọpo ạḍua bọ ẹpe ephunom mọ kụ aru, okuron phọ ọpo okironom bọ enaba phọ.)

¹³ Ọmoogh-we phọ ụḅeni ịmi mọ, “Mị katom ẹpomoghian mọ oru orool ẹelha phọ rꞌaruphua awe phọ ạmi ọḍuanam pịdi ọliom bịdi esi ịkaraph phọ bịdi moḍighi yogh bọ sịen ade phọ.

¹⁴ Mị kaḍighi ịdi bịdi kokumu ẹpomoghian phọ ạbidi eeruen ekpisi, loor esi dị ạghelhe phọ ạmi ạkigh nịan, dị keemor kꞌagee-pọ.”

¹⁵ Kụ mị ạḅem mọ, “Ọmoogh-we, nạ ạnaghanan ni. Ụutughian ni ịmi ạḅile ụlhoghonaan ịmi ḍịghaagh. Meera ni mị uḍighi uḅulemian bụphe ụgbiphoghom bọ ịmi. Káḅoronom mun bịdi ọbo bịdi kughiigh ghan bọ ịmi. Tụutughian ni mọ ụtuan ẹmhu ạna kụ uḍighi bọ ịmi ọdorodo phọ.

¹⁶ Nạ ụḅaanaan ni ịmi kụ mị ulher ri aḅeri ạnaghan tọrotoro ekpo ọnhu. Mị ọlo ạna Egbogh Ẹnaan Oomo Ịikpo Ọmoogh-we phọ; kụ iḍighi kụ ikpo ọnhu phọ ạna emuzeḍi iboh rꞌọḅaal ologhi sịphe ologhi phọ ạmi.

¹⁷ Mị ụ́kelom mem mọ ạmi rꞌạbunon awe, ọmilogh ạreer ḅịle rꞌọmoogh ịma amem. Esi ọnaghanan ịtooghi phọ ạna mị ụrol ghan ḍịo ạmi bịn rꞌọghagh ologhi.

¹⁸ Eeghe kụ iḍighi kụ mị rạmiinom bọ? Eeghe kụ iḍighi kụ útue mun bọ úukonom riisi phọ ạmi? Eeghe kụ iḍighi kụ bịdi ímeera mun bọ íkeel? Nạ ragbiighi ghan obi ạmi ịdipho aḍikol lọ ạmuum amuneen mem aghozogh ḍụghum?”

¹⁹ Esi ịphen phọ Ọmoogh-we phọ ạphagharanaan, “Eḍighi ịyaar lọ nạ arigheel, mị kạsighe ni nyịna aḅulemi, kụ nạ ạḅile aḍighi otelhedom ạmi. Eḍighi ịyaar dị kpạripe rꞌọghaaph ịlo arolologhi kụ nạ ạḅile ghan agbeelom dom dị ẹmoogh ịyaar oḍighinom, pọ nạ kạḅile ni aḍighi oyil ạmi. Awe phọ koḅula ni esi ạna, ḅịle kẹn ẹekpia dị nạ kụ kạki ọteeny ạbidi kẹ́tol.

²⁰ Mị kaḍighi ni ịdi nạ kạkigh iikpe enaba esi ạbidi. Bịdi koruphiom ghan ni nyịna ẹgham, kụ ọlo bịdi kótue ọkpar opu nyịna. Mị kạtolan ni rꞌạna aako ghan nyịna ạḅile ạpham nyịna.

²¹ Mị kạtagharan ni nyịna rạghaagh ạbukaraph awe igbagbaar. Mị, Ọmoogh-we phọ, kụ mạḅem.”