Jerimaya 14 - Ạḍinya Iigbia

Ẹkuom ạmuum dị eḍigh ruugu

¹ Ọmoogh-we phọ ụḅeni ịmi ịdi egbolomaam ẹkuom ạmuum,

² “AJuda odi esi ọto; ạramha phọ ọdi remuughu, awe phọ ọdi ọmina oopho ude esi ọto, kụ aJeruselem ramoghi ghan kạwa ọloghonaan ạḍighaagh.

³ Ạbudaam mọ rotom ghan butelhedom ạbidi mọ ọghi ọwa mụum; bịdi rọki ghan ẹpe ariini ạmuum mọ, kụ ọlo rọ́miin ghan mụum; bịdi rotigheel ghan rꞌizoki dị ịyaar ologhi ílho. Kụ bịdi ọbooghi yogh risigh ạbidi, loor ịdi úlegheri mun ịlo oḍighi.

⁴ Loor esi dị ọlophia ụ́loph bọ kụ ade phọ mẹgharaghar bọ, mẹkaraghi rẹeḅaghami iloghi abuḅephom iizo phọ; bịdi ọbooghi yogh risigh ạbidi.

⁵ Ẹpe eḍum mọ ọya ọnuen dị ạmar mạwile omoom ọony phọ ọdi loor esi dị ạroogho ólho.

⁶ Ịnam adool dị edi ghan elegheḍum ẹmeera ạnyu ạraaḅaraph kụ repooghu úseere-ạsighe ịdipho ạsino; ariḍien phọ ạbidi ị́miin mun eten agey loor esi dị bịdi ị́moogh eḍien.

⁷ Awe phọ ạmi romoghi ghan kuphoghom ịmi, ‘Ghạlamo ịduon ịkaraph phọ ayoor eeleghaan bọ, ụlhoghonaan iyoor ḍịghaagh, Ọmoogh-we, ịdipho nạ maguanaan bọ ni Yoor mọḅitonaan ni nyịna ịbadi amem; yoor moḍighi ịkaraph esi ạna.

⁸ Nạ bịn kụ oḍuom ologhi phọ Ịzirel; nạ kụ rụphel ghan bọ iyoor esi ịiḅaghami. Iḍighi ika kụ nạ ạkigh bọ ooruen sịen ade phọ ayoor, ịdipho oye erelhe dị ạrol ḍiniin aḍughul-otu bịn?

⁹ Iḍighi ika kụ nạ ạkigh bọ oye dị osiph ekperenom, ịdipho oye ẹgham dị ụ́moogh ịikpo ọloghonaan ạḍighaagh? Agey phọ ni, Ọmoogh-we, nạ odi ni rꞌayoor! Yoor awe ạna; iyoor kútebeeny bịn.’”

¹⁰ Ọmoogh-we phọ rạḅem ghan ịlo awe phọ ạbuen phọ mọ, “Bịdi ọpomoghian oghiil ọḍua esi ạmi, ḅịle kẹn bịdi ụ́pamaghan siloor ạbidi. Kụ iḍighi kụ ologhi ạmi ọ́ḅaal esi ạbidi. Mị kạatughian ni ịpe bịdi ọpioman yogh bọ kụ mị ạliom bịdi loor esi ịkaraph phọ ạbidi.”

¹¹ Ọmoogh-we phọ ụḅeni ni ịmi mọ, “Ịmi kúpuru ọloghonaan ạḍighaagh weye phọ ạbuen.

¹² Ghạlamo bịdi ụkaagh ni ẹḍogh mị kạ́naghanan emoghi ọloghonaan ạḍighaagh phọ ạbidi; ḅịle kẹn ghạlamo bịdi ụphinyon ni rịkia oguom ạnian ḅịle rꞌạrikia ariiḍien, bịdi kọ́ḅaalami ologhi ạmi. Kpạripe ghụn mị kạziom bịdi ẹgham, ḅịle rꞌịgbakuro, ḅịle rꞌạreezegh.”

¹³ Kụ mị ạḅem, “Ọkar Ogbogh Ọmoogh-we phọ, nạ alegheri ni mọ ariil phọ rọḅeni ghan weye phọ mọ ẹgham rꞌịgbakuro kẹ́tol, loor esi dị nạ maguanaan mọ ẹepho bịn kụ kẹtol ghan sịen ade phọ ayoor.”

¹⁴ Kụ ọlo Ọmoogh-we phọ ạphagharanaan mọ, “Ariil phọ rọgba ghan ọkpe esi aḍien phọ ạmi; mị bịdi útom, mị kẹn ụ́to ịyaar ụ́ḅeni bịdi ḅịle kẹn rꞌeniin ekpo ọnhu mị ụ́ḅeni bịdi. Ịmiin phọ bịdi rọmiin ghan bọ koghol ị́ḍua esi ạmi kụ eru; ịmiin phọ ạbidi eḍighi ịitu-ologhi dị ị́moogh ịyaar oḍighinom.

¹⁵ Mị Ọmoogh-we phọ rạḅeni ghan nyịna ịpe mị kaḍighi bọ riil phọ ạbuphe mị útom bọ kụ rọkaaph ghan bọ esi aḍien phọ ạmi kọḅem mọ ẹgham rꞌịgbakuro kẹ́tol sịen ade phọ ạḍien — mị kạze bịdi esi ẹgham rꞌịgbakuro.

¹⁶ Awe phọ bịdi mọḅeni bọ rạraar phọ ịphen phọ komugh aani kẹn ni eniin phọ eten phọ. Ruzu phọ ạbidi kotebeneghi roḅodo aJeruselem, kụ oye kạ́tol oḍiighi ạbidi. Ịphen phọ kemitenaan oomo phọ ạbidi — ẹḅaram nmạriir rꞌạnmuny rꞌạnmanyaan ạbidi. Mị kaḍighi ni ịdi ịkaraph phọ ạbidi kẹkpe bịdi.”

¹⁷ Ọmoogh-we phọ ạto ụḅeni ịmi ọghaaph ọḅeni awe phọ ịlo ọto phọ ạmi mọ: “Eḍighi ni ịdi izin kekil ghan riḍien ạmi ḍughul rꞌootaany, eḍighi ni ịdi mị kásophe emoghi loor esi dị awe phọ ạmi moḍighima eboom ịyaar kụ rẹeḅaghami ni iboom.

¹⁸ Mem lọ mị ạghi ẹpe iizo phọ, mị rạmiin ghan iḍim dị ọze ẹpe ẹgham mọ; mem lọ mị ạghi aḍigh rạmha phọ, mị rạmiin ghan ni weye dị ọkoony rạze. Ariil rꞌariil ạrikia phọ oḍighi ni oḍighi phọ ạbidi kụ ọlo bịdi úlegheri ịpe bịdi roḍighi bọ.”

Awe phọ ọoḅereghian Ọmoogh-we phọ

¹⁹ Ọmoogh-we, nạ mạkaraghi akel Juda ḍụghum? Awe phọ ạZayon okia ni nyịna ḍụghum? Eeghe kụ iḍighi kụ nạ muḍighi bọ iyoor ịyaar elegh dị ịlo ookonom ílho bọ? Yoor ụwa ghan ẹepho, kụ ọlo igey ílho; yoor uḍuom ghan ologhi ọmoogh eekonom, kụ ọlo aruugu kụ ạḅile ghụn aru.

²⁰ Yoor moḍighi ịkaraph esi ạna Ọmoogh-we phọ; yoor moruphughian ịkaraph ayoor ḅịle kẹn rꞌịkaraph ạburude ạburude phọ ayoor.

²¹ Tụutughian ruguanaan phọ ạna bịn iyoor kụ́ḅitonaan; kạ́sighe roofola ạngo Jeruselem, esi ạgada eegu phọ ạna. Kạ́pue ịyo phọ nạ ughiran bọ iyoor.

²² Rꞌeniin eru areelhe phọ kétue ẹngo ọlophia; okuaḍio phọ rꞌaloor ọdi bịn kátue aḍighi ịdi ọlophia kạloph. Yoor mọsighe oḍuom ologhi ayoor ọkpasi esi ạna, Ọmoogh-we Ẹnaan phọ ayoor, loor esi dị nạ kụ raḍighi ghan bọ rạraar phọ ịphen.