Jerimaya 13 - Ạḍinya Iigbia

Asinika dị ọkolom alu

¹ Ọmoogh-we phọ ụḅeni ịmi mọ mị ụki uko sinika dị ọkolom ọyoghoyogho ukpe ụlogha; ạḅile ụḅeni ịmi mọ mị kúsumeeny nika phọ mụum.

² Kụ iḍighi kụ mị ạghi agho ạlogha.

³ Kụ Ọmoogh-we phọ ạḅile ụḅeni ịmi mọ,

⁴ “Kịa ẹpe Ọphiiny aYufratis ạaghi sinika phọ loor epogh, ẹpe asighiigh phọ.”

⁵ Kụ iḍighi kụ mị ạghi ạaghi sinika phọ atumeniom Ọphiiny aYufratis.

⁶ Rẹsighe mem kụ Ọmoogh-we phọ ụḅeni ịmi oḅula ẹpe aYufratis phọ ọsighe asinika phọ.

⁷ Kụ mị aḅula, kụ mem dị mị ạwa bọ ạmiin esi phọ mị ạaghi bọ sinika phọ, mị ụmiin mọ rọbegh bịn rẹfunyonu bịn ị́moogh mun ịyaar oḍighinom.

⁸ Kụ Ọmoogh-we phọ ạḅile ụḅaanaan ịmi kụ ạḅem mọ,

⁹ “Ịphen kụ ịdo ịdi mị kaagulemi bọ ophoophe aloor phọ aJuda rꞌogbogh ophoophe aloor phọ aJeruselem.

¹⁰ Ạbukaraph awe phọ ạbuen phọ úmeera ụ́naghanan ịmi. Bịdi odimom ni ọḅaar ẹmhu phọ ạbidi ḅịle kẹn rọoḅereghi, ọḅile okumu ịnon ạrumugh. Kụ iḍighi kụ bịdi kọtol ịduon asinika phọ ịphen phọ ị́moogh mun bọ ịyaar oḍighinom mọ.

¹¹ Ịdipho anika rạmaar ghan bọ kaḅol esin oye kụ ịdi mị ạwa mọ oomo awe phọ Ịzirel rꞌaJuda uḅol ịmi. Mị uḍighi ịphen phọ ọbo bịdi oḍighi weye ạmi ọḅile ọsighe ḍịseph rꞌarughuenian ọngo ḍien phọ ạmi; kụ ọlo bịdi ịmi ụ́naghanan.”

Izoki amiim mọ

¹² Ẹnaan Ọmoogh-we phọ ụḅeni ịmi mọ, “Jerimaya, ḅẹni weye phọ Ịzirel mọ omuzeḍi miim tọrotoro izoki amiim. Bịdi kọpagharanaan mọ bụno olegheri ni mọ ẹkpe ni omuzeḍi amiim tọrotoro izoki amiim.

¹³ Kụ agbi ọḅeni ạbidi mọ mị Ọmoogh-we phọ kamuzeḍi miim siloor awe ade phọ ạḍien tụtu amiim ạze bịdi: ạbudaam mọ, bụphe oḍighi bọ ẹemara ẹemara aDevid, rꞌariil ạrikia phọ, rꞌariil Ẹnaan phọ, ḅịle kẹn rꞌoomo awe phọ aJeruselem.

¹⁴ Kụ mị agbi nụun oḅomoghi ạbidi ịdipho izoki dị ọsighe iniin ọgurom iniin, bukumoor phọ, rꞌạbubam mọ, oye rọbile. Igbiririph rꞌọnma ighirigiir kétue ẹtol dị kikikima ịmi ọze ạbidi.”

AJerimaya ạpur rụru ịlo ophoophe aloor

¹⁵ Weye Ịzirel, Ọmoogh-we phọ mạghaaph! Isooromi siloor anyina ẹnaghanan nyọdi.

¹⁶ Ikueni Ọmoogh-we Ẹnaan phọ anyina, kụ egbi ọteeny amem dị ọdi kạsighe ufiri atu, kụ nyina ekpeteghaan ạnyu aruugum mọ; kụ egbi ọteeny amem dị ọdi kạsighe ḍịḅaal phọ nyina eḍuom bọ ologhi phọ atene ogbogh ufiri.

¹⁷ Eḍighi ịyaar dị nyina ị́naghanan, mị kamoghi ni esi ịbooghian loor esi ophoophe aloor phọ anyina. Mị kamoghi ni agey, kụ izin ạmi ekil, loor esi dị mọsighe weye Ọmoogh-we phọ rọkimom oḍighi ạrebene.

¹⁸ Ọmoogh-we phọ ụḅeni ịmi mọ, “Ḅẹni ọdaam-ẹmha phọ rꞌonhiin phọ ọdi mọ ọḍua sịphe ạsidol igbogh phọ ạbidi osoor, loor esi dị ịma aroghoony ọdaam-ẹmha phọ ạbidi mezunyonu sịphe ạrumhu phọ ạbidi emeleghu.

¹⁹ Awe ẹgham moghoonyom igbogh ạramha phọ aJuda edi bọ ẹpe esoorom mọ; oye kátue aten ạki ạteeny bịdi. Mọsighe oomo awe phọ aJuda rokeelom eeruen ekpisi.”

²⁰ Jeruselem, pogh. Awe ẹpomoghian phọ ạna mọḍua ẹpe ephunom mọ rotu! Odi ẹghen awe phọ ọngo bọ nyịna ophogh phọ, awe phọ ạna nạ ạtuan ghan bọ aphoophe loor phọ?

²¹ Nạ kạḅem mọ meeghia mem dị awe phọ ạbuphe nạ agbiom ghan bọ mọ ạrighiri ạna kụ mọkpar opu nyịna kụ ọḅile ọtooghi rọngo nyịna? Kepin ni esi ạna ịdipho ạnir lọ rạmar.

²² Eḍighi ịyaar lọ nạ apuru ịpe eḍighi bọ kụ oomo phọ ịphen phọ memitenaan bọ nyịna — ịpe eḍighi bọ kụ mọphanyi bọ ukpe phọ ạna bịn obiighi nyịna — ịtuan esi igbogh ịkaraph phọ ạna.

²³ Oḍiil oye katue ni anme ḍizu phọ ọdi ḍụghum, ḅịle kẹn ootiir katue ni agburagha ikpem mọ ịpe oti bọ loor phọ ọdi ḍụghum? Eḍighi ịyaar dị bịdi kotue ni, pọ nyina phọ ạbuen reḍighi ghan bọ ịkaraph phọ pọ ketue ni ẹtuugha oḍighi aani ịlo ẹnighe.

²⁴ Ọmoogh-we phọ kịwalalami inyina ịdipho ạroogho lọ ọsam kụ ookuugh ekpisi ophugh aphula.

²⁵ Ọdi mạḅem mọ ịphen phọ kụ keḍighi ọda anyina. Ịphen kụ ịdi ọdi magbiighi oḍighinom anyina, loor esi dị nyina mewula nyọdi bịn ẹsighe emooph anyina ẹkpasi esi ạrumugh ọkpe.

²⁶ Ọmoogh-we phọ rꞌaloor kạkporion ni rụsuoma phọ anyina kụ umugholoor isiph inyina.

²⁷ Ọdi mạmiin ni dị nyina reḍighi rạraar phọ ịpe ọdi aghel bọ. Ọdi mạmiin ni dị nyina ẹdaph rụmugh awe aruru phọ ẹpe ạraaḅaraph phọ rꞌẹpe iizo phọ, ịdipho oye lọ rapuru yogh ghan ạnir amatuman ọdi, rꞌịdipho olephiri ạsu lọ rạwa ọdaar ọya phọ. Weye aJeruselem, nyina mephe! Ạpur amem kụ nyina eseleman?