Jerimaya 10 - Ạḍinya Iigbia

Ịiḅereghi dị ị́nighe rꞌịdi ẹnighe

¹ Weye phọ Ịzirel, ịnaghan dom dị Ọmoogh-we phọ kịḅeni inyina.

² Ọdi ạḅem mọ, “Kẹ́daph reten ịnon areelhe; iikia ạraraar dị nyina kẹmiin ẹpe okuaḍio phọ inyina kị́iḅaghami, ghạlamo ịnon areelhe ughiilaan ni.

³ Ịiḅereghi awe phọ ạbuen phọ ị́moogh ịyaar oḍighinom. Oler oreeny ẹpe ẹekpua phọ; ọkaam-ạmaka phọ ạsighe rạraar oḍighi phọ ọdi kụ ạkaam,

⁴ kụ ọsighe silva rꞌagol ọdamaghi. Kụ ọsighe iḍugh ọkanagh ọbo kameel ghan bọ.

⁵ Ọdo ịkaaghineen ạraraar phọ ịphen phọ ẹkigh ịyaar dị ophune esi ozo egusi ophoroghom ịnun; bịdi kétue ẹḅa, bịdi kétue etelhe emuton lọ oye aphophe. Kékiilaan ghan bịdi; bịdi inyina ịyaar kétue eḍighi, ḅịle kẹn bịdi igey inyina kétue eḍighi.”

⁶ Ọmoogh-we, oye dị ạghigh nyịna ólho; nạ kụ ogbogh, ḅịle kẹn aḍien phọ ạna ẹbugh ẹḅile ẹmoogh ịikpo.

⁷ Ạnhian kụ ẹdi nyịna kákueni bọ, ọdaam oomo areelhe phọ? Nạ ạkpe ni oghueni. Oye dị kọtomaam nyịna ólho esi oomo awe olegheri-ịyaar areelhe phọ mụghumo ạbudaam mọ ạbidi.

⁸ Oomo phọ ạbidi arolologhi. Ịyaar dị ọsighe oreeny kụ ọkaam kẹtughemi bịdi eeghia?

⁹ Ịkaaghineen aruru phọ ạbidi ọsighe silva dị ọsighe ẹpe Spen ḅịle kẹn rꞌagol dị ọsighe ẹpe Ufaz kụ ọdamaghiom, oomo phọ ịdi awe dị ọmaar mạka kụ ụkaaghi; Ọsighe rukpe oodor rꞌenu dị olo kụ ọmaar oonmenemi.

¹⁰ Kụ ọlo nạ Ọmoogh-we phọ kụ ọkar Ẹnaan, nạ kụ Ẹnaan phọ ẹpe edi ghan bọ bịn, ḅịle kẹn rꞌọdaam kꞌagee-pọ. Mem lọ nạ ạghagh ologhi, aḅirini phọ rapiigha ghan ni; areelhe phọ kótue ọmerenyan ọghagh ologhi phọ ạna.

¹¹ (Nyina awe phọ, ịḅeni bịdi mọ ạrumugh phọ kụ ị́lem bọ kẹ phọ rꞌade phọ kụ kopiemi ni bịdi. Bịdi kọ́moogh mun esi ọrol sịen ade phọ.)

Ạḍuor oboom Ẹnaan

¹² Ọmoogh-we phọ kụ ạlhem de phọ esi ịikpo phọ ọdi; esi olegheri-ịyaar phọ ọdi ọdi ạlhem aḅirini phọ ạḅile amitiom okuaḍio phọ.

¹³ Ọdi ạto bịn ạmuum ẹpe okuaḍio phọ amoogha; ọdi ạsighe ọotu ẹpe aruukuna ade phọ atu. Ọdi kụ raḍighi ghan ịdi aḍio rẹmepheghian ghan mem dị ọlophia rạloph kạḅile ạsighe oghim aru.

¹⁴ Awe phọ rọmiin ịphen phọ bịn moḍighi bụo arolologhi; bụphe rọka ghan bọ rạraar kọoḅereghi moyegele, loor esi dị ạrumugh phọ bịdi ọka bọ kígey ḅịle kẹn ị́moogh ghuḍum.

¹⁵ Bịdi ị́moogh ịyaar oḍighinom kụ ẹkpe ni ọḅitonaan; koogulemi ni bịdi mem lọ Ọmoogh-we phọ aru ọkpilighi ạbidi.

¹⁶ Ẹnaan phọ ạJekob ọ́ghigh bịdi; ọdi kụ ạlhem bọ oomo ạraraar phọ, kụ ọdi mạsaḅar Ịzirel mọ oḍighi weye ọdi. Ẹnaan Oomo Ịikpo Ọmoogh-we phọ kụ aḍien ọdi.

Ạdol iiruen retu

¹⁷ Nyina awe aJeruselem, mighoonyom inyina! Iikpomoghi rạraar anyina.

¹⁸ Ọmoogh-we phọ kiphorogh inyina amitiom sịen ade phọ ạḍien; ọdi kighuur inyina ạmadan rꞌoye kásugha. Ọmoogh-we phọ kụ mạḅem.

¹⁹ Awe phọ aJeruselem umoghi ni agey mọ, “Ịphen ịghen ọdo ịkaraph dị miḍighi iyira! Ạroko phọ ayira ímeera mun íkeel. Ḅịle kẹn yira ụutughian mọ yira kotue ni ọkparam!

²⁰ Molhereghi rugbogo phọ ayira; Iḍigh phọ ọkpooghiom bọ merunyian, Ạnmuny phọ ayira mosumughu; Oye ósugha mun ọḅile odoghoḍi arugbogo phọ ayira; oye ọkpooghi arukpe arughuugh phọ ósugha mun.”

²¹ Kụ mị ạphagharanaan mọ, “Abuḍiemiom mọ ayira ịyaar úlegheri; bịdi rópuru ghan Ọmoogh-we phọ oromoghiom ạbidi. Ẹphen kụ ịyaar phọ bịdi agey úḍighi bọ, bịn kụ mọwalalami bọ weye phọ ayira.

²² Iler aḅeri! Ịinaghan meru! Iboom ịlooghi edi ni eniin eelhe ẹpe ephunom mọ; awe ẹgham mọ ạbidi kọsighe ni rạmha phọ aJuda otene de ophugh, ekpisi dị ạsino bịn kụ erugh.”

²³ Ọmoogh-we, mị alegheri ni mọ oye ólho dị alegheri ịlo aghuḍum odi; oye dị katue ạpamaghan ghuḍum ọdi ólho.

²⁴ Ọmoogh-we, leelemi ni weye phọ ạna; kụ ọlo kạ́karaghi uphoghom iyoor ẹgbagara ekpeḍien ḅịle iyoor kụ́lhiom rꞌọghagh ologhi; eḍighi ịdipho, pọ yoor mophe.

²⁵ Kiton ghẹlhe phọ ạna asomori reelhe phọ ạbuphe nyịna rọ́oḅereghi bọ ḅịle kẹn rꞌesi awe phọ ạbuphe ọḅitonaan bọ nyịna. Bịdi mọze weye phọ ạna; bịdi muugulemi iyoor ọmadan ọḅile opiemi eelhe phọ.