Jems 5 - Ạḍinya Iigbia

Ạraalha phọ ogona ni loor!

¹ Nyina ạraalha phọ, ịnaghanan ịmi. Imoghi yogh ẹmoogh ọto loor oomo phọ ịminimiin phọ kisoorom bọ inyina.

² Ẹelha phọ anyina mẹphu, kụ ịphelepheel melhe rukpe phọ anyina.

³ Ọsari maḍiku gol rꞌasilva phọ anyina. Ọsari phọ rạgba ghan rọozo phọ anyina kamitiom kụ kale iphulupul phọ anyina, ịdi eḍighi bọ ẹelha phọ anyina ạnian dị nyina eseerian olhe anyina ruukuna phọ.

⁴ Nyina kẹ̋kpeeghi ikpoki ạbuo iiḍighi iizo phọ anyina. Ịnun phọ ạbidi, nyina kẹ̋naghanan. Kụ emoghi ạbuo ibugha phọ meḍigh reḅeri Ẹnaan oomo ịikpo, Ọmoogh-we phọ.

⁵ Nyina mẹrol ḍịwalawala ạdol, ele ghan uruur sịen aḅirini phọ; nyina melhe ẹbughogh ịdipho ạsinam, kụ mẹteeny ọze anyina.

⁶ Nyina meegbo ịiruen ẹziom we dị mạar ụ́piom. Bịdi inyina írue ịmerenyan.

Ịmoogh ọkparam ẹeḅereghi ghan

⁷ Bụo asiya, ịmoogh ọkparam ekori ḍio phọ Ọmoogh-we phọ katu bọ, ịdipho oḅephom ozo rạkparam ghan bọ ni kakori ọḅel ọlophia phọ tụtu ẹrol ẹteeny osoor mem ibugha phọ ẹman bọ ni ịyaar esi ọdi.

⁸ Ịmoogh aani ọkparam eḍuom ologhi, ịdi eḍighi bọ aḍio phọ Ọmoogh-we phọ katu bọ mẹkpulan ni.

⁹ Bụo asiya, oniin nyoniin kúgumom ghan, ọbo Ẹnaan kisophonaan ghan bọ inyina ọoruen. Oogboom ịiruen phọ mạkpulan rạnya ghan ọrolom ạgada phọ ọdi.

¹⁰ Bụo asiya, ịitughian riil phọ ạbuphe ọsighe bọ ḍien Ọmoogh-we phọ kụ ọghaaphom ghan bọ. Ịtuughaany bịdi dọl ọkparam ghan ịminimiin.

¹¹ Yira olegheri ni ọdo ọḅaal ologhi dị bụphe ọkparam bọ mem ịminimiin phọ ọmoogh ghan. Nyina mẹnaghan ni ọkparam mọ aJob, ẹḅile elegheri ịdipho Ọmoogh-we phọ ạngo bọ nyọdi ẹeḍiom ruukuna phọ. Ọmoogh-we phọ ạmoogh ni iboom igbiririph rꞌọnma ighirigiir.

¹² Bụo asiya ạmi, ịdi epu pạ, kékunya ghan iikunya. Kẹ mꞌade mꞌẹnon ịyaar kékunyaam ghan. Ịḅem ghan mọ ii, mem lọ eru ịne, mọ eeye, mem lọ ítu ịne. Kẹ́loghom ghan ịnon, ọbo Ẹnaan kesoph ọoruen ẹḅam rụmhu anyina.

¹³ Ạnhian ọnyo anyina kụ ạmoogh ịiḅaghami? Ọdi ạaḅereghi ghan! Ạnhian ọnyo anyina kụ ạmoogh iboh? Ọdi ạmoor ghan sụor aboom Ẹnaan!

¹⁴ Ạnhian ọnyo anyina kụ rạarurughian? Ọdi ạamaghagh ghan ikumoor awe ạsiosi phọ oru ọsighe elo ogbul loor phọ ọdi oghol ḍien Ọmoogh-we phọ ọoḅereghi ọngo nyọdi!

¹⁵ Ọpham omeeraam kụ ọoḅereghiom keekonom ni oye phọ eḍume. Ọmoogh-we phọ kạngo ni nyọdi omoon aloor. Kụ eḍighi dị ịkaraph ọdi kụ ẹkom émoon phọ, pọ Ọmoogh-we phọ kạsar ri ạbilenaan nyọdi.

¹⁶ Esi ịduon phọ, ọlo ạpioman ạghaaph ghan ạḅeni ọnon, oniin ạaḅereghinaan ghan nyoniin, ọbo nyina emoonogh! Oye aruukuan kụ ạaḅereghi, ịiḅereghi phọ rẹmoogh ghan ni ịikpo keḍighi ekol.

¹⁷ Tọ Ilaija oye ni ịduon ayira, kụ ọdi ạkparami bọ ạaḅereghi mọ ọlophia kụ́loph, ọlophia phọ ọ́lhoph ni esi ịraar ạsia rꞌodiiny ụnwanyu.

¹⁸ Kụ ọdi ạḅile bọ ạaḅereghi mọ ạloph phọ, ạloph ni, ịizupha ade phọ emite ẹḅile emuumogh.

^19-20 Bụo asiya ạmi, ilegheri mọ oniin ọnyo anyina ạgbatanaan igey areten phọ Ẹnaan, kụ ọlo ạmagh nyọdi esi ịkaraph phọ ọdi aḅulemi, pọ mạphel uwaloor phọ ọpo ạsighe esi aḍuugh, ạḅile aḍighi dị mọsar ịminighan ịkaraph ọwilenaan.