Jems 4 - Ạḍinya Iigbia

Ọyaghiri aḅirini phọ

¹ Eeghe kụ rẹkom ghan bọ ịruonu rꞌelephiri kẹlogh ogbo phọ anyina? Nyina ílegheri mọ ịtuan rụuphua phọ ịpe rebianan bọ pạ iloghi phọ anyina.

² Nyina rẹwa ghan ọmoogh ịdi ítu ịlo anyina kụ ke̋rue bọ ẹmoogh, pọ nyina kẹko enu. Nyina ẹmoogh ephogh-aḍien kụ ke̋rue bọ ẹteeny ịpe nyina rẹwa bọ, pọ nyina kẹkom ịruonu rꞌelephiri esereghi. Nyina rẹ́moogh ghan ịpe nyina rẹwa bọ ịdi eḍighi bọ nyina rẹ́lom ghan Ẹnaan.

³ Ghạlamo kẹn nyina ịlom ni bịn nyina rẹ́moogh ghan ni, ịdi eḍighi bọ nyina ẹsighe ghan ịkaraph ịitughian kụ rẹlomom. Nyina rẹwa ghan ịlo ọpheremiom ạruuphua phọ anyina bịn.

⁴ Nyina ẹkigh ạnir ilom dị rale ghan ẹmha. Nyina ílegheri mọ ọyooyo aḅirini phọ, pọ ạmulogh-ḍien Ẹnaan. Tọrobo ọlo rạwa oḍighi ọyaghiri aḅirini phọ, pọ maḍighi mụlogh-ḍien Ẹnaan.

⁵ Kégbiom ghan ologhi mọ ịpe ạḍinya iigbia phọ ẹghaaph bọ ị́man mạar mọ, “Uwaloor Iigbia phọ ọpo Ẹnaan ẹlhogh bọ loor ayira ọ́wa rọwa mọ ẹnon ịyaar rꞌọno oopikian.”

⁶ Kụ ọdi rụngo ghan iyira ịnyaam kạloghom ịlo okoronaan ịkaraph ạruuphua, ịdipho ạḍinya iigbia phọ ẹḅem bọ mọ, “Ẹnaan regbororian ghan reten ạbuphe robaga bọ, kẹngo ooḅi ọghor bụphe osooromi bọ loor.”

⁷ Esi ịduon phọ, isooromi loor anyina ẹngo Ẹnaan. Ịmerenyan Eru, ọdi kighiilaan inyina asuma.

⁸ Iḍuraan etuman Ẹnaan. Ọdi kaḍuraan aani ni ituman inyina. Iwopha yogh ịkaraph phọ anyina. Nyina awe ạsipioghom dị iloghi rẹbal ịyal, iitola yogh rạghaagh phọ anyina, egbuurogh iloghi phọ anyina ẹḅaalami.

⁹ Ịtuan ghan ẹkaraph eḍighinom ịyaar phọ anyina emoghi yogh, ẹsighe rẹegh phọ anyina etene emoghi, ẹsighe ọḅaal ologhi phọ anyina etene ọto.

¹⁰ Isooromi loor anyina ghisigh Ọmoogh-we phọ. Ọdi kiphophe ni inyina.

Késophonaan ghan ọnyo asiya esi aKraist ọkaraph ọoruen

¹¹ Bụo asiya, kẹ́gbaanaan ghan oye ịkaraph. Ọlo ạgbaanaan ọnon ọnyo asiya esi aKraist kụ asophonaan ọkaraph ọoruen, pọ mạghaaph ạpuenom Ologh phọ, akolaam mọ ọno oye ịiruen. Eḍighi dị nạ rạaḅeghion ghan Ologh phọ kaphogh, pọ nạ rạ́naghanan mun Ologh phọ, nạ maghola ḍien mọ ạna oye ịiruen.

¹² Ẹnaan bịn kụ rẹloghoḍi ghan iilogh kẹḅile ẹeḅeghion we ephogh. Ọdi bịn kụ ạmoogh ịikpo ophiemi ghan rꞌoḍume ghan. Nạ ragbiom ghan ologhi mọ nạ ạnhian kụ raagbo ghan bọ ịkaraph ịiruen kạḅam rụmhu ạbunon awe phọ?

Kéetuma ghan

¹³ Ịnaghanan ịmi, nyina ạbuphe rẹḅem ghan bọ mọ, “Rodon mꞌiḍue yoor kọki ẹpeer ẹmha ọtol lhạ, omuul ḍighi, ọmoogh sụo.”

¹⁴ Nyina elegheri ni ịpe kemite bọ iḍue ḍụghum? Tọ, aghuḍum mọ anyina ạkighom ọotu ạḍiroor dị mọony amem bịn ụ́miin mun.

¹⁵ Ịḅem ghan ghụn mọ, “Lọ Ọmoogh-we phọ ameera ni, yoor kọtol li oḍighi ịphen rꞌịpe.”

¹⁶ Kpạripe rꞌịdipho phọ ghụn nyina ẹḅile reḅo ghan iḅo-igbogh rꞌiituma. Ịphen phọ ị́nighe.

¹⁷ Ilegheri mọ oye lọ alegheri ịpe ẹkpe bọ oḍighi phọ kụ úḍighi, pọ mạpioghom sịpioghom.