Jems 1 - Ạḍinya Iigbia

¹ Mị aJems, ọnyo oḍighi phọ Ẹnaan rꞌạJizos Kraist Ọmoogh-we phọ, kụ ụge ḍịnya phọ ạḍien ratuomaan ḍioph rꞌịyal arughunughun ạbuo aJu phọ ọwalala bọ oomo areelhe phọ. Mị mipuru inyina.

Omeeraam rꞌolegheri ịyaar

² Bụo asiya ạmi, ịmoogh ghan ni iboom iboh mem lọ ịiḅaghami kịrokiro ịteeny inyina,

³ ịdi eḍighi bọ nyina elegheri ni mọ nyina erue ni ẹphamanam omeeraam mọ kụ ẹmerenyan, pọ nyina mẹsu ologhi ọkparam.

⁴ Kụ ọkparam mọ anyina kúdugh rꞌamem ọdaanaan oomo phọ ịne, ọbo ạroozo phọ anyina ẹkua ẹḅile emunughan, dị rꞌịyaar inyina kị́biph.

⁵ Ọnyo anyina lọ ụ́moogh olegheri ịyaar ạlom Ẹnaan esi ịiḅereghi, kụ Ẹnaan phọ rẹ́ekpukian ghan bọ ọngo inmo oomo aweye kẹngo ni nyọdi!

⁶ Kụ mem lọ nạ rạaḅereghi, meeraam ni aḍuom ologhi, mọ nạ kạmoogh ni, ịdi eḍighi bọ oye lọ ologhi ọdi rạbal ịyal yạl ạkighom oologh ọphiiny dị oghim raaḅorogh.

⁷ Ọdo oye phọ ọpo kúgbiom ologhi mọ Ọmoogh-we phọ kạngo ni nyịno ịlo ọno ạlom,

⁸ ịdi eḍighi bọ oomo eḍighinom ịyaar phọ ọdi rẹkporokporo ni.

Ekulom rꞌẹelha

⁹ Ẹkpe ni dị uwekulom ọnyo asiya kạmoogh ghan iboh, mem dị Ẹnaan mẹnighemi dọl phọ ọdi.

¹⁰ Kụ ọolha phọ kẹn ạmoogh ni iboh, mem dị Ẹnaan mesooromi dọl phọ ọdi! Ọdi kamugh ni ịdipho ipoola,

¹¹ dị ogogo ramite ghan kạsel anyororomi, kụ kẹghar, bịn ẹnighe phọ ẹpe ọmiin ghan bọ epe. Ịdipho nẹneen kụ ịdi aghuḍum ọolha phọ kanyororo, mem dị ọdi mạkul ẹmhu ạlogh iiḍighi phọ ọdi.

Ọdegh ophogh

¹² Iboh kꞌẸnaan edianaan ni oye lọ ạmerenyan ịiḅaghami; kozu ni nyọdi eghoony aghuḍum mọ ẹpe Ẹnaan eguanaan bọ bụphe ọphomoghian bọ nyọdi.

¹³ Oye lọ ọdegh ophogh ạteeny kụ́ḅem mọ ọdegh ophogh phọ ạḍua esi Ẹnaan kụ aru. Ẹnaan oye rẹ́degh ghan kephogh, kụ ọdegh ophogh nyọdi rạ́teeny ghan.

¹⁴ Ọdegh ophogh rạteeny ghan oye mem lọ ẹkaraph ẹephua ọdi meru ẹḍa ologhi phọ ọdi.

¹⁵ Ịdipho oomor mọony ọmar kụ aḍighi oye ạkpo ạmanam ramugh ghan bọ, kụ ịdi ẹkaraph ẹephua reemor ghan kẹmar sịpioghom, kụ eekuna ạsipioghom mọ pọ aḍuugh.

¹⁶ Iiḅi asiya ạmi, kéekeleghian loor anyina.

¹⁷ Oomo phọ igey inmo phọ yira ọmoogh bọ ịḍua ni esi Ẹnaan kụ eru bọ. Ọdi kụ ạlhemogh oomo phọ ịpe rẹmu bọ ẹpe kꞌạke phọ. Ạraraar phọ ịpe phọ reenmeeghian ghan ni, kụ Ẹnaan rénme ghan eḍighinom ịyaar phọ dị ruḍighi ghan bọ iyira.

¹⁸ Mem mọ yira omeeraam bọ igey ikpo ọnhu phọ ọdi, ọdi ạsighe ni ịitughian ọdi kụ ụmaram bọ iyira, ọbo yira kụ oḍighi bụḅel sịphe emoom eghunotu phọ ọdi.

Kụ́naghan ghan bịn úḍighi

¹⁹ Iiḅi asiya ạmi, ilegheri mọ tọrobo oye ạnuun ghan ni ạnaghanan, ạaḅeghion ghan ikpo ọghaaph kụ ạghaaph, ịyaar ologhi ọdi kị́nuun ghan ịkagh,

²⁰ ịdi eḍighi bọ ọghagh ologhi rạ́loghonaan ghan ḍịghaagh mọ oye aḍighi ịpe Ẹnaan rẹwa bọ.

²¹ Ịkporion rạghaagh oomo isa rꞌịkaraph dị rekil ọoye, esooromi loor ghisigh Ẹnaan, ẹnaghanan ọghaaph phọ ọpo ọdi mạzuph bọ sịphe iloghi phọ anyina. Ikpo ọnhu phọ ịpe kụ ketue ịphel inyina etene.

²² Kẹ́naghan ghan bịn kụ íḍighi ghan ịpe Ẹnaan rẹkaaph bọ. Nyina ẹnaghan ghan bịn kụ réḍighi ghan, pọ rebia ni loor.

²³ Oye lọ rạnaghan ghan bịn kụ ráḍighi ghan ạkigh oye dị rapogha ghan atamaḍiki bịn kạmiina ḍimite aloor phọ ọdi.

²⁴ Ọdi rophogha rọḍua, bịn mawula ịpe aloor phọ ọdi ẹrol bọ.

²⁵ Kụ Ẹnaan kẹseph ni oḍighi oye lọ rạsighe ghan igey iilogh phọ rẹtanyan ghan bọ we kụ kaphogha ịdipho atamaḍiki, lọ ọdi ạmoogh ọkparam raḍighi ghan ịpe iilogh phọ ẹḅem bọ kụ rạ́naghanan ghan bịn kawula.

²⁶ Oye lọ ạḅem mọ ọno ameeraam Ẹnaan kụ nem ọdi óoko, pọ ọdi rabia ni loor ọdi, omeeraam mọ ọdi kẹn ọ́man ịyaar.

²⁷ Oye lọ aakonom ghan bụnyigo ạnmuny, aphogh ghan rukpukele ạnmariir esi ịminimiin phọ ạbidi, kụ úmeera mọ ịitughian aḅirini phọ ẹphue nyịno, kụ ọdi Ẹnaan Ọde phọ ạsighe mọ omeeraam mọ ọdi ọ́phuph, ḅịle kẹn ịyaar ị́biph.