Izikiel 7 - Ạḍinya Iigbia

Eekuna phọ Ịzirel mẹkpul

¹ Ọmoogh-we phọ ụḅaanaan ni ịmi.

² Ọdi ạḅem mọ, “Oye dị kamugh ni, ịphen kụ ịdi mị Ọmoogh-we dị ạmoogh oomo ịikpo rạḅeni de phọ Ịzirel: ịphen kụ eekuna oomo ade phọ.

³ “Ịzirel, eekuna phọ mesi. Nạ kaloghoma ọghagh ologhi ạmi, ịdi eḍighi bọ mị rasoph ọoruen kạngo nyịna esi eḍighinom ịyaar phọ ạna. Mị kạkpe ni nyịna aḅulemian esi oomo ạraraar isa phọ ịpe nạ maḍighi yogh bọ.

⁴ Mị nyịna kạ́bilenaan mꞌoḍeenaan ạna ẹnum ọnma ighirigiir. Mị kạliom nyịna ịlo ạraraar isa phọ nạ maḍighi yogh bọ pịdi nạ alegheri mọ mị kụ Ọmoogh-we phọ.”

⁵ Ịphen kụ ịdi Ọmoogh-we dị ạmoogh oomo ịikpo ạḅem ghan mọ, “Amuniin amuphe atum mụnon riruanaan inyina.

⁶ Memuneen. Ẹphen eekuna phọ. Nyina mephe.

⁷ Eekuna phọ riruanaan inyina phọ erugh bọ sịphe ade phọ. Amem mọ mẹkpul dị oleeghi ạrayaal sịphe ạraphan ạnyu ạraaḅaraph phọ kẹ́tol mun, ịgbaragbara kụ kẹtol.

⁸ “Kébia mun, nyina keloghoma ni ịikpo ọghagh ologhi phọ ạmi. Mị rasoph ọoruen kịngo inyina esi ịpe nyina meḍighi bọ, kụ kịkpe inyina aḅulemian ịlo oomo ạraraar isa phọ ịpe nyina meḍighi yogh bọ.

⁹ Mị inyina kị́wilenaan ḅịle kạ́nma ighirigiir. Mị kịliom inyina esi ạraraar isa phọ nyina meḍighi yogh bọ pịdi nyina elegheri mọ mị kụ Ọmoogh-we phọ, ḅịle kẹn mọ mị kụ ọpo rịlhiom bọ inyina.”

¹⁰ Aḍio amuphe retuanaan ni Ịzirel. Ạmukpoogh rạbugh ni. Ophoophe aloor masi ḍiigbu ạnyu.

¹¹ Ekpom remitiom ghan egbogh ẹkaraph ẹzo. Ịyaar ạbidi késugha mꞌẹelha mꞌẹnighe mꞌeghuan ạbidi.

¹² Amem mọ retu ni. Aḍio phọ mẹebeeph mem dị ogho rꞌaal ạraraar kẹ́man mun ịyaar, ịdi eḍighi bọ ạghelhe phọ Ẹnaan kameelom ni tọrobo oye iniin phọ.

¹³ Omuul-ḍighi ólho dị kạtol abia dị ẹgbaany ọḅile ọmoogh oḅulemi ạraraar ọdi dị mephe, ịdi eḍighi bọ ọghagh ologhi phọ Ẹnaan odianaan tọrobo oye. Abuḍighinom ịkaraph kókpetenaan.

¹⁴ Ọkuodu phọ ạḅa, kụ tọrobo oye aakolobian. Kụ ọlo oye ólho dị kạki ẹgham, ịdi eḍighi bọ ọghagh ologhi Ẹnaan kasoorom ni tọrobo oye iniin phọ.

Ạmalhiom ịkaraph Ịzirel

¹⁵ Elephiri edi ni sịphe areten phọ, ḅịle ẹzegh rꞌọkoony iloghi aruutu. Tọro ọlo mamite ẹpe ẹmha phọ kamugh ni loor elephiri phọ, kụ tọro ọlo odi ologhi ẹmha phọ, ẹzegh rꞌọkoony kụ kẹsighe.

¹⁶ Buniin kosuma ni ọḍua ọki ẹpe ạraaḅaraph phọ, ịdipho arukurughozo dị rekiilaan ḍiigu ẹpe ariḍiiny phọ. Oomo ạbidi kọḅiphighu ni esi ịkaraph ạbidi.

¹⁷ Ạraghaagh ạtorobo oye kedugh ni, kụ aruukum mọ epiigha yogh.

¹⁸ Bịdi kọkpologhian ni iinmenan ọto kụ ookpeka iboom. Rụmu ạbidi kokul li kụ oomo ạbidi kosiphe umugholoor.

¹⁹ Bịdi kotoḅologhi ni sigol rꞌasilva ạbidi sịphe areten phọ ịdipho ịiya, ịdi eḍighi bọ agol ḅịle mꞌasilva kátue ạpel bịdi mem dị Ọmoogh-we phọ azuom bịdi ọghagh ologhi. Bịdi kótue oḍighinom ịdi kẹgbaanyan ẹephua ạbidi mꞌomuzeḍi ạrukuruḅaka ạbidi. Asigol rꞌasilva phọ kụ irorori bọ bịdi ẹlogh esi ịkaraph.

²⁰ Amem ịrol li dị bịdi oobagaam ịma ịbekulari phọ ạbidi, kụ ọḅile ọsighe ọlemom igbudu isa. Pọ kụ ịyaar phọ Ọmoogh-we phọ maḍighi bọ ịdi ẹelha mekia bịdi.

²¹ “Mị kạngo ọgel aruuruen omi bịdi,” Ọmoogh-we phọ ạḅem, “ḅịle ạbukaaghi-iilogh kọsighiogh oomo aruphua phọ ạbidi kụ ọḅile ọopuom.

²² Mị kákikima mem dị rọgilaam Otu Ịiḅereghi phọ mị ạphomoghian bọ, mem dị ạruḅa ọka oḍigh kụ rọopu.

²³ “Tọrobo ịyaar edi ni esi ịgbaragbara — de phọ ạrookom-enu omuza kụ rạmha phọ ekpom elephiri emuza.

²⁴ Mị kạsighe ọkaraghi ịkaraph areelhe atu sịen pịdi bịdi kụ ọmoogh simarugh phọ anyina. Arephelegbe awe anyina kodugh ni esi oḍuom ologhi mem dị mị ạngo ọgel ịpheri phọ areelhe phọ oru ọopu ariisi phọ ịpe nyina reeseeny ghan bọ.

²⁵ Oḅonyonu ologhi ratu ni. Nyina kẹwa ni ẹepho kụ kẹ́tol.

²⁶ Oniin amuphe katum ọnon, ḅịle ịkaraph ịinaghan kụ kẹkoolan etu. Nyina kụ kẹeḅereghi ghan riil phọ mọ ogananami ịpe bịdi ọmiin bọ. Ạbupinyon rịkia phọ kọ́moogh ịyaar ọtughemi awe phọ, kụ ikumoor awe phọ kọ́moogh oroma ọngo.

²⁷ Ọdaam mọ kạtol rꞌọto, kụ oḍuom ologhi ọkpana ọdaam mọ amuneen, kụ awe phọ opiigha rꞌaḍiigu. Mị kịliom inyina esi oomo ịpe nyina meḍighi bọ kụ isophonaan inyina ọoruen, iniin phọ ịpe nyina meegbonaan bọ bụnon. Ịphen kụ kiḍeenaan inyina mọ mị kụ Ọmoogh-we phọ.”