Izikiel 3 - Ạḍinya Iigbia

¹ Ẹnaan ịḅem mọ, “Oye dị kamugh ni, sịghe ḍịnya phọ ạḍien okpooghi bọ ạraal ạminogh, kụ agbi ọghi ọḅaanaan awe phọ Ịzirel.”

² Kụ iḍighi kụ mị aphoghoghomi ọnhu ạmi, kụ ọdi ụngo ịmi ḍịnya phọ okpooghi bọ ọraal.

³ Ọdi ạḅem mọ, “Tạal ḍịnya phọ okpooghi bọ ḍịphe mị rạngo bọ nyịna, amuzeḍiom ọkuruḅaka phọ ạna.” Mị ụraal li ạmin, kụ ẹmen ịdipho ẹnuum aḍiowo.

⁴ Pọ kụ amem dị Ẹnaan ẹḅem mọ, “Oye dị kamugh ni, kịa ạḅeni we phọ Ịzirel tọrobo ịlo mị ạḅeni nyịna ọḅem.

⁵ Mị nyịna rạ́ghiom eeruen eelhe dị ọnhu phọ ạkpar, epel we Ịzirel.

⁶ Mị ạghiom nyịna ẹpe igbogh areelhe dị ạrunhu ạbidi ẹkpar dị nạ kátue ạnaghan, pọ bịdi koler ri rụru ọngo nyịna.

⁷ Kụ ọlo rꞌoniin ọnyo awe phọ Ịzirel dị kạnaghanan nyịna ólho; ịmi kẹn bịdi kụ́naghanan. Oomo phọ ạbidi awe ịgbagharan rꞌọḅaar ẹmhu.

⁸ Nyịidipho mị kaḍighi nyịna oye ọḅaar ẹmhu dị ạkpar ịdipho ạbidi.

⁹ Mị kamiighemi nyịna ịdipho aḍighiigh, ạkparami ịdipho ạdayamon kákiilaan bụḅaar rụmhu phọ ạbuphe.”

¹⁰ Ẹnaan ẹloghom mọ, “Oye dị kamugh ni, mạar amiigha loor kụ ạatughian tọrobo ịlo mị ạḅeni bọ nyịna.

¹¹ Kịa nụun ạteeny we ẹmha phọ anyina odi bọ dọl iiruen phọ kụ ạḅeni bịdi ịpe mị Ọmoogh-we dị ạmoogh oomo ịikpo rạḅeni bọ bịdi, mụghumo bịdi ọnaghanan nyịna mọ ụ́naghanan.”

¹² Pọ kụ amem dị uwaloor Ẹnaan phọ uphoophe ịmi ạnyu, kụ mị ạnaghan ọman ạmi oboom ororaan ẹḍogh dị ẹlo mọ, “Iboom eegu Ọmoogh-we phọ ẹpe kꞌạke!”

¹³ Mị ạnaghan raphaaph ạraraar phọ ọlhem bọ dị ẹekaraghan sịphe okuaḍio phọ, ḅịle rꞌạḍiaḅa idighila phọ dị ẹḅa ịdipho ade dị eḅomaan.

¹⁴ Ịikpo Ọmoogh-we phọ isoorom ni ịmi rꞌiboom ịnyaam, kụ ịdipho uwaloor phọ ọdi urool bọ ịmi ạḍuanam, iphin esi ạmi rꞌọghagh ologhi.

¹⁵ Esi ịduon phọ mị aru asi Tel Abib ọgbal Ọphiiny aKebar, sịphe ạbuo iiruen phọ orugh bọ, kụ esi oḍual aḍughul-otu mị ụrol sịphe, kụ ịpher ịmi kpọgh esi ịpe mị mạmiin bọ ạḅile ạnaghan.

Ọmoogh-we phọ ạma Izikiel oḍighi okoriom-ẹmha

¹⁶ Oḍual aḍughul-otu phọ reten, Ọmoogh-we phọ ụḅaanaan ịmi.

¹⁷ Ọdi ạḅem mọ, “Oye dị kamugh ni, mị rạma nyịna oye okoriom-ẹmha eelhe phọ Ịzirel. Nạ kạḅeni ghan bịdi oomo ọphur ạruru lọ mị ạḅeni nyịna.

¹⁸ Eḍighi mạar dị mị ạghaaph aaleghemi mọ ọkaraph oye kamugh, kụ nạ nyọdi ọ́phur rụru ọdi anme reten phọ ọdi, ạphelaam ghuḍum ọdi, pọ ọdi kamughom ni ịkaraph phọ ọdi, kụ ọlo mị kạpham ni nyịna ịlo aḍuugh phọ ọdi.

¹⁹ Eḍighi ịyaar dị nạ ạphur rụru ọkaraph oye phọ kụ ọdi ọ́wile ịkaraph phọ, pọ ọdi kamughom ni ịkaraph, kụ ọlo nạ mạphela ghuḍum mọ ạna.

²⁰ “Eḍighi ịyaar dị ọkaraghi ogey oye kụ amiigh oḍighi ịkaraph kụ mị ạlogh nyọdi esi omuzaan aḍuugh, ọdi kamugh ni eḍighi ịyaar dị nạ nyọdi ụ́pur rụru. Ọdi kạtuan ịkaraph phọ ọdi kụ amugh — mị kạ́atughian igey phọ ọdi aḍighi bọ — kụ ḍuugh phọ ọdi mị kạḅam ẹmhu ạna.

²¹ Eḍighi ịyaar dị nạ ạphur rụru ogey oye mọ kúḍighi ịkaraph kụ ọdi ạnaghanan nyịna ạwile ịkaraph, pọ ọdi kạtol li, ḅịle ghuḍum ạna ịyaar kẹ́kpaph.”

Izikiel kạtol étue ẹ́ḅa

²² Mị aloghoma ịikpo Ọmoogh-we phọ esi ạmi kụ ạnaghan dị ụḅeni ịmi mọ, “Ḅetenu ạghi ẹpe eḍiiny phọ. Mị kạḅaanaan nyịna ẹpe.”

²³ Kụ mị ạghi ẹpe eḍiiny phọ, kụ mị ạmiin eegu Ọmoogh-we phọ, ọkaraghi ịdipho mị mạmiin ghan bọ nyọdi ọgbal Ọphiiny aKebar. Mị aḅololo azuemi ghisigh ạmi ude,

²⁴ kụ uwaloor Ẹnaan phọ aḍigh loor ạmi kụ uphoophe ịmi ạmeremi. Ọmoogh-we phọ ụḅeni ịmi mọ, “Keel ologhi otu aḍigh ạkasaghi kụ ạrol.

²⁵ Kọphaḍiom nyịna iḍigh, Oye dị kamugh ni, kụ nạ kátue mun amite esi ogbo.

²⁶ Mị kạlogh rụukunya nem ạna, ọbo nạ kạpur ghan bọ rụru we ịgbagharan phọ ạbuen.

²⁷ Ịpe reten, mem dị mị ạḅile ạḅaanaan nyịna kụ aḅulemi ịnyaam ạḍiaḅa phọ ạna, nạ kạḅeni ni bịdi ịlo mị Ọmoogh-we dị ạmoogh oomo ịikpo rạḅem. Buniin ạbidi koler ri rụru, kụ ọlo buniin kọḅitonaan ni nyịna, ịdi eḍighi bọ bịdi eelhe ạbuḅaar rụmhu.”