Ịkunuma 5 - Ạḍinya Iigbia

Ịiḅereghi ọmoogh ọnma ighirigiir

¹ Tụutughian, Ọmoogh-we, ịpe mimitenaan bọ iyoor. Uphogh iyoor kụ ạmiin roofola ayoor.

² Aruphua ayoor edi rạghaagh aruuruen; bụo ịnon areelhe kụ morughogh ruutu phọ ayoor.

³ Ạbumulogh-ḍien mọze bụrude ayoor, kụ nyịidipho aburunhiin ayoor moḍighi rukpukele ạnmariir.

⁴ Yoor kọkpe ni ikpoki ạmuum lọ yoor ọphughol; yoor koko ni ịpe kụ ọsaam eḍien.

⁵ Mughiilom iyoor iboom mụdi ịnam adool mꞌạsikamel, aloor ayoor medugh, kụ úmeera mọ ophooghian.

⁶ Esi ọmoogh eḍien olhe ọrolom, yoor ụghi ilom ẹpe Ijipt rꞌAsiria.

⁷ Ạburude ạburude ayoor ụpioghom ni, kụ nyịidipho bịdi momuughu, kụ yoor rọmiinom loor ịkaraph phọ ạbidi.

⁸ Awe dị ụ́nighe úpu rẹbene kụ ụda iyoor, kụ oye ólho dị kụphel iyoor esi ịikpo phọ ạbidi.

⁹ Ạrokoom enu royeela rạgbal eelhe phọ; yoor oseere sighuḍum ayoor igbo aḍuugh rꞌaghuḍum ọwa eḍien olhe.

¹⁰ Ọkoony maḍighi ịdi yoor mọmoogh osipheeny, tụtu ozu ayoor mạghologhol ịdipho esi ịpophoghi.

¹¹ Mobiighi nmạriir ayoor ọkar ịsiphe Eegum ạZayon; tọrobo ẹbam ẹmha aJuda nmạnyaan phọ ayoor mọkpaariom mọ omeera bụno ọmina yogh.

¹² Mọsighiogh buḍiemiom ayoor osinogh; ikumoor awe ayoor ụ́logh eghuan.

¹³ Mọkpaariom ugheel ạnmuny ayoor mọ ọgbe ịbiakpa mụdi ạrebene; ạnmuny rọbelebeliom dool ịpe.

¹⁴ Ikumoor awe phọ ụ́tol mun rụnhu-aḍibuo ẹmha phọ; kụ ugheel phọ ụ́moor mun sụor.

¹⁵ Ọḅaal ologhi mạḍuaghu siloor ayoor; ọto mạsighe esi ịḅa ayoor.

¹⁶ Rꞌịyaar ísugha mun esi oomo ịlo yoor obagaam ghan. Yoor ụpioghom, kụ nyịidipho yoor mophe.

¹⁷ Émoon idianaan iyoor kꞌologhi ekpom ayoor kụ kótue ọmiin loor izin ayoor,

¹⁸ loor esi dị Eegum ạZayon enamian kụ rꞌịyaar ílho, kụ asuogh eḍum reewalion atopha phọ.

¹⁹ Kụ nạ, Ọmoogh-we, kụ ọdaam kꞌagee-pọ, kụ kạda kꞌekureriom amem.

²⁰ Eeghe kụ nạ ụḅitonaan bọ iyoor kꞌamem dị mebia? Nạ kụutughian nịiniin iyoor ḍụghum?

²¹ Ụsighe iyoor aḅulemi esi ạna, Ọmoogh-we! Ụsighe iyoor aḅulemi! Ḅịle aḅulemi ḍien igbogh ageedi phọ ayoor.

²² Nạ mughel iyoor kꞌagee-pọ ḍụghum? Ophin ologhi ạna ọ́moogh esi ọkpo ukpe ḍụghum?