Ịkunuma 2 - Ạḍinya Iigbia

Ịdi Ọmoogh-we phọ ạliom weye aJeruselem

¹ Ọmoogh-we phọ loor ophin ologhi maakpereghiom Zạyon ufiri. Eegu kꞌạke phọ ọdi meegulaan. Ḍio ophin ologhi phọ ọdi, ọdi ạḅitonaan ni Otu Ịiḅereghi phọ ọdi.

² Ọmoogh-we phọ aphiemi ghan dị ọnma ighirigiir ụ́tol tọrobo ẹbam ẹmha aJuda. Kụ alhereghi ruutu-ịikpo phọ ekpeki bọ de phọ. Ọdi ạsighe umugholoor aruomaan eelhe phọ rꞌạbuphe ọdaaghi bọ.

³ Rꞌọghagh ologhi ọdi kụ ọdi aphiemi ịnyaam mọ Ịzirel. Ọdi ómeera ụlhoghonaan iyoor ḍịghaagh mem mọ ạbumulogh-ḍien phọ oru bọ. Ọdi aamor esi ayoor mụdi ạnian, ạphueghi oomo ạraraar.

⁴ Ọdi ugbonom iyoor ịkpina ọdi mụdi oye ạmulogh-ḍien. Ọdi ạze oomo ạbuphe oḍighi bọ iboh rꞌạḍidugh ayoor. Sịen Jeruselem yoor uloghoma ni ophin ologhi phọ ọdi.

⁵ Ịdipho ạmulogh-ḍien, Ọmoogh-we phọ maphiemi Ịzirel. Ọdi mạwile ruutu ogonaam aloor phọ rꞌarigiga ạbudaam mọ eegulaan. Ọdi maruomaan we aJuda ọmiinom dị eekuna ílho.

⁶ Ọdi mạagbighiḍi Otu Ịiḅereghi phọ, esi phọ yoor ooseeny ghan bọ nyọdi. Ọdi makunughi riiḍio iigbia rꞌariiḍio ophooghian. Ọdaam rꞌọpinyon rịkia molhoghoma ophin ologhi ọdi ooleeny.

⁷ Ọmoogh-we phọ aghel enmeny ọphinyon ẹkia phọ ọdi kụ ạwile Otu Ịiḅereghi phọ ạḍua. Ọdi ạngo ọgel kụ ạbumulogh-ḍien phọ olhereghi iikpe phọ. Bịdi ọlo ḍịolho ọkpar opu esi phọ yoor ọrol ghan bọ kụ ooseeny rꞌiboh.

⁸ Ọmoogh-we phọ ạnya ni mọ iikpe phọ ạZayon kemeel li. Ọdi ạtooghi ạsighe ọmiin mọ ẹkar eegulaan. Aruutu ẹedaneen phọ rꞌiikpe phọ nyịidipho mẹgbesegbese egina amem.

⁹ Ạrunhu-aḍibuo phọ, ipoḍi asighiigh meekpereghiom, iiḅeneghiom mọ ạbidi obunughi ikulha ikulha. Ọdaam mọ rꞌigbogh awe odiighi dọl iiruen. Ologh phọ rọ́tughemi mun, kụ ariil phọ rọ́miin mun uḍien dị ẹḍua kꞌỌmoogh-we phọ kụ eru.

¹⁰ Ikumoor awe aJeruselem ọtol ude oḅoorian, rꞌọoru dị odi rụmhu ạbidi rꞌạrusuoma ọto siloor. Arisina ạnmanyaan ozumeri rụmhu ạbidi ude.

¹¹ Ariḍien ạmi meminenom loor emoghi; uwaloor ạmi akururu. Aloor ạmi medugh rꞌẹ́ḅaal ologhi ọmiin ghan awe phọ ạmi dị ropiemi. Ịbam ạnmuny rꞌạnmuny asipugh rọkanyu komeleghu reten ẹmha phọ.

¹² Loor esi ọkoony eḍien rꞌẹephua ạmuum, bịdi omoghiom burunhiin ạbidi; Bịdi omeleghu reten phọ mụdi uḍighima rạraar siloor, kụ omighe siloor omuughu rạghaagh aburunhiin ạbidi.

¹³ Jeruselem, Jeruselem dị ọphomoghian, mị ụkaaph eeghe? Ika kụ ẹdi mị kạadereghi bọ nyịna? Rꞌoye kọ̋rol ghan dị mạmiinom ịduon. Ịiḅaghami phọ ạna ọku ólho mụdi otu-ḅualhe; oḍuom ologhi ólho.

¹⁴ Ariil ạna ụ́moogh ịyaar ọḅeni ạna epel ọkpe; Ạraghaaph Ẹnaan phọ ạbidi eḍighi iikeleghi ẹngo nyịna, kụ ịkaraph ạna ígananami. Bịdi oḍighi ịdi nạ agbi mọ nạ ọ́kpe okiton esi ọkaraph.

¹⁵ Awe lọ orelhe roten ọogaany ẹmha phọ ophogh nyịna kụ ọḅitonaan. Bịdi ooḅoghomi ẹmhu ạbidi kụ ọmilogh ọmiin ịdipho aJeruselem maphe bọ. “Ẹphen ịma ẹmha phọ ni ḍụghum?” “Ẹphen esi phọ aḅirini phọ obagaam ghan bọ ḍien?”

¹⁶ Oomo ạbumulogh-ḍien ạna rọnmoghoghoom nyịna kụ ophoghom nyịna rꞌẹ́pomoghian. Bịdi ọḅugh ịidoronhu ạbidi kụ ọnmir opogh, “Yoor mophiemi nyẹdi! Rodon kụ aḍio phọ yoor okori ghan bọ!”

¹⁷ Ekureriom mọ, Ọmoogh-we phọ maḍighi ịpe ọdi ạdeghom bọ oḍighi phọ. Ọdi muphiemi iyira kụ ọnma ighirigiir ólho, ịdipho ọdi ụphur bọ iyira rụru kꞌamem dị mebia. Ọdi ạngo bụmulogh-ḍien ayira ọkpar-opu, ạngo bịdi iboh esi emeel ayira.

¹⁸ Jeruselem, eḍighi ịdi ọkar iikpe ạna kemoghi emitiom epoghom Ọmoogh-we phọ! Eḍighi ịdi izin ạna kekil ghan ḍughul rꞌootaany! Nạ kamiteghu loor emoghi rꞌạdol okururu!

¹⁹ Oomo aḍughul phọ aḅetenu ghan ẹ́gba mem omoghi ophoghom Ọmoogh-we phọ; zu ekpom ạna amitiom kụ ạlom nyọdi ọmoogh ọnma ighirigiir esi ạnmuny ạna — nmụny dị mọrol ọkoony romuughu oomo ịphalagbal areten!

²⁰ Pogh, Ọmoogh-we! Pogh bụphe nạ rạmiine bọ! Ạnmariir rọba ghan iphulupul ạnmuny phọ bịdi ọphomoghian bọ! Rọze bụpinyon rịkia rꞌariil sịphe Otu Ịiḅereghi phọ rꞌaloor.

²¹ Ugheel rꞌikumoor awe ọmina omuughu reten, ugheel rꞌạnmariir dị elhool ẹgham ạbumulogh-ḍien kụ ẹze. Nạ ạkanyan bịdi kụ ọnma ighirigiir ólho ḍio ophin ologhi phọ ạna.

²² Nạ ụmagh bụmulogh-ḍien ạmi ọpham ookpomoghan oḍighi aḍiigu okoom ạmi, kụ rꞌoye dị akpetenaan ḍio phọ ạḍiphe ophin ologhi phọ ạna ólho. Bịdi ụze nmụny ạmi, bụdi mị maakonom kụ ạphomoghian.