Iiḍighi 6 - Ạḍinya Iigbia

Oḍual awe dị odi ghan eḍien

¹ Riiḍio phọ ịpe mem dị ạbumatuan phọ roḍiza bọ, bụo aJu phọ rọḅa ghan bọ ọnhu phọ aGris ụgumom ghan ni bụphe rọḅa ghan bọ ọnhu phọ aHibru, mọ aḍio etum ḍio ụ́logh elegh rukpukele ạnmariir phọ ạbuno esi amadi eḍien phọ.

² Kụ ḍioph rꞌịyal abutelhedom mọ ookpomoghi oomo ạbueri phọ omeeraam bọ kụ ọḅem mọ, “Ị́kpianaan dị yoor kọbile ọghaaph ọghaaph phọ Ẹnaan, kụ odi ghan eḍien.

³ Esi ịduon phọ, bụo asiya, ịson emitiom sịphe ogbo phọ anyina oḍual awe, lọ olegheri mọ ọmoogh ni igey ạraaghara, dị Uwaloor Iigbia phọ rꞌolegheri ịyaar emuza loor, lọ yoor kọḅogh oḍighi phọ ọphon ọlogh ḍịghaagh ạbidi.

⁴ Ọbo yoor ọsighe loor ayoor ọkuom esi ịiḅereghi rꞌọghaaph ghan adom mọ.”

⁵ Kụ ịphen abutelhedom mọ ọghaaph bọ ịḅeeraan ni oomo ạbueri phọ, kụ bịdi ọma Stivin, oye dị omeeraam rꞌUwaloor Iigbia phọ emuza loor, rꞌaFilip, rꞌạProkoros, rꞌaNikanor, rꞌaTimon, rꞌaPaminas, rꞌạNikolaos, ooruen ọlo Ạntiok dị raako ghan eḍighinom ịyaar ạbuo aJu phọ.

⁶ Kụ ọsighe bụen phọ ọmeremi risigh abutelhedom mọ, kụ bịdi ọoḅereghi kụ ọḅam rạghaagh rụmhu ạbidi.

⁷ Kụ ọghaaph phọ Ẹnaan aleeny eleeny, kụ aḍita ạbuphe omeeraam bọ Jịzos ẹbugh ịminighan ẹpe Jeruselem, kụ aḍita ariil ạrikia phọ omeeraam aani.

Ịdi osiph Stivin

⁸ Kụ aStivin, oye dị ạḍiseph rꞌịikpo emuza loor, aḍighi yogh ni iboom ịiḍaany rꞌareḍeenaan igbo awe phọ.

⁹ Kụ buniin awe úḍighan Stivin. Bụen phọ ạbuo obughotu dị oghol mọ “obughotu awe okpetenaan”, dị ạḅaram Ju ạbuo aSairini rꞌẠleksandria. Bụen phọ rꞌạbunon aJu ạbuo aSilisia rꞌEsia, omiigh ọogbaghanaan rꞌaStivin.

¹⁰ Kụ bịdi ụ́man ọmerenyan olegheri ịyaar phọ Uwaloor Iigbia phọ ạngo bọ Stivin ọghaaphom ghan phọ.

¹¹ Kụ bịdi omian ọkpaariom we dị ọḅem mọ, “Yoor ụnaghan ni dị ạghaaph ịlo ọopuom aMozis rꞌẸnaan.”

¹² Kụ bịdi owiiliom ọnhu ḍita phọ rꞌikumoor awe phọ rꞌạbutughemia iilogh phọ, kụ bịdi oru osiph Stivin ọsighe oruom ookpomoghan ikpolom awe phọ,

¹³ kụ omitiom we mọ ọgbaaghi ọkpe ọḅam ẹmhu ọdi. Bịdi mọ, “Oye phọ ọphon rásoph ghan mem ọghaaph ọphuenom otu iigbia phọ ọphon, rꞌiilogh phọ aMozis.

¹⁴ Yoor ụnaghan ni dị ọdi ạḅem mọ ạJizos ọpo ạNazeret phọ kalereghi otu phọ ọphon, kụ anmeeghi eḍighinom ạraraar phọ aMozis amitiom bọ ụngo iyira.”

¹⁵ Kụ oomo phọ ạbuphe ọrol bọ pạ ookpomoghan phọ uphogh ni Stivin okananaam, kụ ọmiin ghisigh ọdi dị ạghigh ghisigh ọokpaany Ẹnaan.