Iiḍighi 4 - Ạḍinya Iigbia

Ọmeremi Pita rꞌạJon ghisigh ookpomoghan ikpolom awe phọ

¹ Ịdipho aPita rꞌạJon rọkaaph bọ kọḅeni we phọ, bịn ariil ạrikia phọ rꞌuwo ẹmhu abukoriom otu ịiḅereghi phọ rꞌạbuo aSadusi phọ ozuom bịdi,

² ịdi eḍighi bọ mẹghagh iloghi ạbidi, mọ ịyal abutelhedom mọ mọsighe oḅetenu esi aḍuugh phọ ạJizos rọkaaph kọtughemiom, mọ bụlo omugh koḅetenu ni.

³ Kụ osiph bịdi ọlogh otu ikoli, tụtu ẹmina ẹḅaal, ịdi eḍighi bọ rekpereghian.

⁴ Kụ ịbadi ạbudi ọnaghan ọghaaph phọ umeeraam ni, kụ bụdi omeeraam bọ ụghiom ni oogh ọonir.

⁵ Mẹḅile ẹḅaal, kụ ạbuo ạrumhu phọ, rꞌikumoor awe phọ, rꞌạbutughemia iilogh phọ ookpomoghan eniin esi sịphe Jeruselem.

⁶ Ạnas, uwo ẹmhu oyil ạrikia phọ, rꞌạKayafas, rꞌạJon, rꞌẠleksander, rꞌoomo ọto uwo ẹmhu oyil ạrikia phọ ụrol aani ni.

⁷ Kụ ọsighe butelhedom mọ ọmeremi pạ ogbo phọ ạbidi, kụ opuru mọ, “Esi ịghen ịikpo rꞌạḍighen aḍien kụ ẹdi nyina eḍighinom bọ ịphen phọ?”

⁸ Kụ aPita, rꞌUwaloor Iigbia phọ dị mamuza loor ọdi, ạḅeni bịdi mọ, “Nyina ạbuo ạrumhu rꞌikumoor awe phọ.

⁹ Ọtuan ogey oḍighi phọ yoor oḍighi bọ ọngo ẹkugha phọ, rꞌịpe eḍighi bọ kụ ọdi aḍum bọ, kụ ruḅiligha bọ iyoor rodon,

¹⁰ pọ ẹkpe ni dị oomo phọ anyina rꞌoomo ạbueri phọ awe phọ Ịzirel kelegheri mọ esi ịikpo aḍien phọ ạJizos Kraist ọpo ạNazeret nyina ẹkan bọ eghiigh, kụ Ẹnaan eḅeton bọ sịphe aḍuugh phọ, kụ ẹdi oye phọ ọphon mạmeera bọ aaleeny risigh anyina.

¹¹ ẠJizos kụ ọdi ạḍinya iigbia phọ ẹḅem bọ mọ, “‘Ẹko phọ nyina ạbuloghom ruutu phọ eghel bọ kụ mẹḅile eḍighi ẹko ogbo.’

¹² “Ọdi bịn kụ Ọpelia phọ. Ạḍinon aḍien ílho sịen aḅirini phọ, dị Ẹnaan ẹngo ọphelom ayira otene.”

¹³ Kụ mem dị ạbuo ạrumhu phọ ọmiin bọ ạkpo ologhi phọ aPita rꞌạJon, kụ olegheri bọ ni mọ bịdi iḅar awe ni bịn, dị ḍịnya ụ́maar, uukia ni, kụ eru ologhi ạbidi mọ ịyal awe phọ ạbuen mọrolan ghan ni rꞌạJizos.

¹⁴ Kụ rọmiin ghan bọ ni oye phọ ọpo ookonom bọ, dị ạmeera ịigaany aPita rꞌạJon, ạbuo ạrumhu phọ ụ́moogh ịyaar ọgbagharan,

¹⁵ kụ ọḅeni bịdi mọ ọngo bụno eepoogh. Kụ omite ezue

¹⁶ kụ ọḅem mọ, “Yira koḍighi bọ ika we phọ ạbuen phọ? Ịiḍaany phọ bịdi oḍighi bọ eḍighan ni elegh esi oomo phọ ạbuen orugh bọ Jeruselem, kụ ẹkpar ịikia ọpharanaan.

¹⁷ Kụ esi ịlo kọ́doonye mun, ọphur bịdi rụru mọ kúkol mun ḍien phọ ạḍien ụkaaph ụḅeni rꞌoniin oye!”

¹⁸ Kụ ọmagh mọ bịdi oru, kụ ọphur bịdi rụru mọ kụ́kaaph mun rọghaaph ụtughemi we ịlo aḍien phọ ạJizos.

¹⁹ Kụ aPita rꞌạJon ọphagharanaan bịdi mọ, “Sịphe ọnaghanan anyina rꞌọnaghanan Ẹnaan, ịghen kụ ịkpianaan oḍighi ghisigh Ẹnaan!

²⁰ Kụ ọlo, yoor kọ́bile ọghaaph ạraraar phọ ịpe yoor mọmiin bọ ọḅile ọnaghan.”

²¹ Kụ bụo ezue phọ ọphur bịdi rụru ọkpaariom, kụ oseere mọ bịdi ọḍua, ọwaaghi bọ ụ́miin ẹmhu ọtuan ọliom ạbidi, esi dị oomo awe phọ uboom ni Ẹnaan loor ịpe emite bọ.

²² Kụ oye phọ oḍighinaan bọ ịiḍaany eekonom mọ ịphen mapel li inyadi ạsia.

Bụphe momeeraam bọ ọoḅereghi ọlom Ẹnaan ạkpo ologhi

²³ Kụ roseere bọ bịdi, bịn aPita rꞌạJon origheel ọteeny rịghiri phọ ạbidi, kụ ọghaaph ịpe uwo ẹmhu oyil ạrikia phọ rꞌikumoor awe phọ ọḅeni bọ bịdi.

²⁴ Kụ rọnaghan, kụ ọḅophoghan ophoophe ẹḍogh ạbidi ọmagh Ẹnaan mọ, “Ọmoogh-we, nạ kụ ụlhem bọ kẹ rꞌade, rꞌọphiiny, rꞌịlo esi rꞌesi.

²⁵ Rꞌịikpo Uwaloor Iigbia phọ ạna kụ aDevid ọde phọ ayira otelhedom mọ ạna ạghaaphom bọ mọ, “‘Iḍighi ika kụ aruuruen phọ ọghagh bọ iloghi; kụ areelhe phọ oḍigh bọ egir dị ẹmhu ílho?

²⁶ Ạbudaam-ẹmha ịsien aḅirini phọ ookolobian bọ, kụ ạbuo ạrumhu phọ ookpomoghan bọ oruphiom ḍien Ọmoogh-we phọ rꞌaMesaya phọ ọdi.’

²⁷ “Kụ ọkar igey, sịen ẹmha phọ ẹphen ạHerod rꞌạPontios Pailet ụḅophan ni ruuruen phọ rꞌaweye Ịzirel oruphiom Jịzos, Ọony-otu Aruukuan phọ kꞌạna, ọpo nạ ạma bọ mọ aMesaya phọ.

²⁸ Bịdi uukpomoghan ni oḍighi oomo phọ ịpe nạ rꞌịikpo phọ ạna mạtooghi bọ aseere mọ emite phọ.

²⁹ Kụ nyịidipho, Ọmoogh-we, pogh aani ịdi bịdi rụdeghogh iyoor, kụ ạngo rẹbene phọ ạna ạkpo ologhi ọghaaphom ghan ọghaaph phọ ạna.

³⁰ Sele ghan ḍịghaagh eekonom mọ ạna, ameera mọ oḍighi reḍeenaan rꞌịiḍaany esi aḍien phọ ạJizos, Ọony-otu Aruukuan phọ ạna.”

³¹ Kụ rọoḅereghi rọman, kụ ade phọ oomo phọ ạbidi ookpomoghan bọ ephiigha, kụ Uwaloor Iigbia phọ amuza loor oomo phọ ạbidi kụ ọghaaphom ghan ọghaaph phọ Ẹnaan rꞌạkpo ologhi.

Oseere oomo ạraraar ogbo

³² Kụ aḍita ạbuphe omeeraam bọ ụḅoph ni iloghi rꞌịitughian kụ oye ọ́ḅem mọ ịlo ọno ạmoogh pọ ịlo ọno bịn, kụ oseere oomo ạraraar ạbidi ogbo.

³³ Kụ rꞌiboom ịikpo kụ abutelhedom mọ ọghaaph ghan ọghaaph ịlo oḅetenu esi aḍuugh ạJizos Ọmoogh-we phọ, kụ Ẹnaan ịngo ni bịdi ḍiboom ạḍiseph.

³⁴ Kụ ọlo ịyaar ekuom ọ́rol ogbo phọ ạbidi. Bụlo ọmoogh rere rꞌaruutu aalhaghi ghan ni, ọsighe ghan ikpoki phọ

³⁵ oruomonaan butelhedom mọ, kụ ọdaph ghan dọl ḍịo oye rꞌoye kụ odiighi.

³⁶ Kụ ạJosef, ọnyo aLivai dị ọmar Sạipros, ọpo abutelhedom mọ ọta bọ mọ ạBanabas (ẹmhu phọ pọ ọony dị rạseenyaan ghan we),

³⁷ aal li ekulha ade ọdi, ạsighe ikpoki phọ aruomonaan butelhedom mọ.