Iiḍighi 3 - Ạḍinya Iigbia

Ookonom ẹkugha oḍume

¹ Eniin aḍio, rẹteeny ịraar asuo dulhe, aPita rꞌạJon rọki ịiḅereghi sịphe Otu Ịiḅereghi phọ.

² Kụ sịphe ọnhu-aḍibuo phọ oghol bọ mọ ịma, oniin oye ạrol li dị aḍigh ẹkugha kꞌamem mọ ọmar bọ nyọdi. Ḍio ḍio ḍio rotool ghan ni nyọdi koseere ọlom ghan ịlom bụphe roḍigh bọ pạ Otu Ịiḅereghi phọ.

³ Rọmiin Pita rꞌạJon dị rọki oḍigh, kụ ọdi ạlom bịdi ịlom.

⁴ Kụ aPita rꞌạJon ophogh nyọdi okananaam, kụ ọḅem mọ, “Uphogh iyoor!”

⁵ Kụ ọdi akiririom bịdi aphogh agbiom ghan ịlo ạar ạbidi ịyaar.

⁶ Kụ aPita ạḅeni mọ, “Mị ikpoki ụ́moogh, kụ ịpe mị ạmoogh bọ kụ ịdi mị kạngo nyịna. Esi aḍien phọ ạJizos Kraist ọpo ạNazeret, ḅetenu arelhe!”

⁷ Kụ aPita ạpham ḍịghaagh elhiom oye phọ ạmeremi. Egina amem bịn aruwol rꞌạriikpighonu phọ ọdi ẹkparagh.

⁸ Kụ ọdi aḅetenu ạmeera, kụ arelhe ạdaph bịdi aḍigh aani pạ Otu Ịiḅereghi phọ, apeleghu rꞌọḅaal ologhi aboom Ẹnaan.

⁹ Kụ oomo awe phọ ọmiin nyọdi dị ratelhe kaboom Ẹnaan.

¹⁰ Kụ ọlogh elegh mọ ọdi kụ ọlom-le phọ ạrol ghan bọ ni pạ ịma ọnhu-aḍibuo Otu Ịiḅereghi phọ. Kụ ịpe emitenaan bọ ẹkugha phọ eḍighi iikia rꞌaruugu esi awe phọ.

Ọghaaph phọ aPita sịphe Otu Ịiḅereghi phọ

¹¹ Kụ ọdi aḅol Pita rꞌạJon, kụ oomo awe phọ oghiil ọtuonom bịdi ẹpe emitenom mọ oghol bọ mọ ịisua phọ ạSolomon.

¹² Kụ mem dị aPita ạmiin bọ we phọ, kụ ọdi ạghaaph ạḅeni bịdi mọ, “Weye Ịzirel, iḍighi ika kụ nyina reekia bọ ịphen phọ? Iḍighi kẹn ika kụ nyina ikananaam bọ iyoor, mụdi ịnyaam ayoor rꞌaruukuan ayoor kụ iḍighi bọ ịdi ọdi ratelhe?

¹³ Ẹnaan phọ Ebraham rꞌẠizik rꞌạJekob, Ẹnaan ạburude ạburude phọ ayira kụ ịbughe bọ Jịzos, Ọony-otu phọ ọdi, ọpo nyina ẹḅogh bọ ẹngo kụ eghel bọ ghisigh aPailet mem dị mạwa ni oseere ọdi.

¹⁴ Kụ nyina eghel bọ Oye Aruukuan rꞌAghuḍuul phọ, kụ ẹḅile ẹlom mọ amitiom ọokom-enu kụ ịngo inyina.

¹⁵ Kụ ịdipho nyina eghiigh bọ ni Uwo ẹmoogh aghuḍum mọ, Ẹnaan iḅeton ni nyọdi sịphe aḍuugh phọ. Esi ịphen phọ kụ ẹdi yoor rọkaaphaan bọ.

¹⁶ Ịikpo aḍien phọ ọdi kụ iḍume bọ oye phọ ọphon nyina rẹmiin bọ ẹḅile bọ ni elegheri. Kụ omeeraam aḍien phọ ạJizos kụ ạngo bọ oye phọ ọphon ọkuakua omoon aloor phọ, sịen ogbo oomo phọ anyina.

¹⁷ “Kụ nyịidipho, bụo asiya, mị alegheri ni mọ elegheri kụ iḍighi bọ inyina rꞌạbuo ạrumhu phọ anyina oḍighi ạJizos ịphen phọ.

¹⁸ Igeedi phọ Ẹnaan ịḅeni ni oomo ariil phọ mọ ọghaaph, mọ aMesaya phọ ọno kạmiinom ni. Ịphen kụ ịdi Ẹnaan emuzeḍi bọ.

¹⁹ Esi ịphen phọ, ikiton esi ịkaraph phọ anyina esoman Ẹnaan, ọbo Ọmoogh-we phọ agbuurogh ịkaraph phọ anyina,

²⁰ kụ iruom inyina mem ọosa yogh aruwaloor, kụ atom Jịzos, nyọpo ọdi ạma bọ mọ aMesaya anyina.

²¹ Ọdi kạtol li kꞌạke ẹteeny mem ọosa oomo ạraraar phọ, ịdipho ariil aruukuan phọ Ẹnaan ọghaaph bọ gediidi phọ.

²² AMozis ạḅem mọ, ‘Ọmoogh-we Ẹnaan phọ anyina kamitiom ni oyil sịphe ogbo abumor phọ anyina, dị kụghigh ịmi. Nyina kẹnaghanan ghan oomo ịlo ọdi ịḅeni inyina,

²³ kụ ọlo ụ́naghanan ịlo oyil phọ rạkaaph, kọgbatan ni nyọdi esi awe phọ Ẹnaan kụ opiemi.’

²⁴ Kụ oomo ariil phọ, egbi kꞌạSamuel, bụlo ọmoogh dom, mọghaaph ni riiḍio phọ ịphen.

²⁵ Nyina kụ ạnmuny ariil phọ. Nyina kụ kele erua ịyo phọ ịpe Ẹnaan rꞌạburude ạburude phọ anyina oghiran bọ. ‘Kọtuan ẹemara ạna kụ ọngo ḍịseph oomo arughunughun aḅirini phọ’, ịdipho Ẹnaan ẹḅeni bọ Ebraham.

²⁶ Nyina kụ ẹdi Ẹnaan ẹphur bọ eruomonaan Mọony-otu phọ ọdi mọ tọrobo ọnyo anyina ạtuan nyọdi akiton esi ịkaraph areten phọ ọdi ạmoogh ḍịseph.”