Iiḍighi 28 - Ạḍinya Iigbia

Ẹpe Mạlta

¹ Yoor mokpetenaan opunughu, kụ ogbi olegheri mọ ekpu-ogbo phọ ughol mọ ạMalta.

² Ạbuo ẹmha phọ ụpham ni iyoor egey ẹphamam. Ọlophia rꞌosipheeny phọ ịphughan ni, kụ bịdi ọkpooni nịan mọ yoor ọonma.

³ ẠPol ạki abunughi ịpe aakpomoghi ratumughi ghan pạ ạnian phọ, kụ ạḍiḅom eghiilaan ẹghologhol ạnian phọ emite, kụ eghiiny ḍịghaagh ọdi.

⁴ Ạbuo ẹmha phọ ọmiin bọ dị ạḍiḅom mọ rẹeghelaan pạ ạḍighaagh phọ ọdi, oniin ạḅeni ni nyoniin mọ, “Ịparanaan ílho, oye phọ ọphon phọ ọkoom-enu ni. Ọdi makpetenaan ni oologh phọ, kụ obana phọ ómeera ni mọ ọdi ạrol.”

⁵ Kụ ạPol azin ḍịghaagh ọdi kụ ẹkaraph-ịyaar phọ ẹghar esuma ologhi ạnian phọ, kụ nyọdi ị́ḍaany.

⁶ Kụ bịdi ugbiighiom ghan ologhi mọ iini kabuphogh ni, ania nia kameel li ekperenom amugh. Bịdi ogon ebia, kụ ịyaar nyọdi ímitenaan, kụ onme ịitughian phọ ạbidi kụ ọḅem mọ ọdi ẹmugh.

⁷ Matuman ịpa phọ, ạPublios ọdaam ẹmha phọ ạmoogh ni rere. Ọdi ụlhogh ni iyoor otu, kụ ụko iyoor igoni ịraar aḍughul-otu.

⁸ Aloor ọde ạPublios ímoon. Osipheeny rꞌamunum-ọgua kụ ịiḅaghami. Kụ ạPol aḍigh osoph oye phọ ạaḅereghi Ẹnaan, kụ ạzu nyọdi aḍume.

⁹ Ịphen phọ iḍighi ni dị bụnon ạbudi úmoonogh sịphe ekpu-ogbo phọ oruughi, kụ ookonoma yogh.

¹⁰ Ughueni ni iyoor rꞌịminighan inmo. Kụ mem dị yoor kọḅile oḍigh oghuugh, kụ bịdi ụsaanyaan iyoor rạraar dị ikuom iyoor.

Ọḍua Mạlta rọki Rom

¹¹ Ịraar ụnwanyu reten, kụ yoor oḍighan aani oghuugh dị oghol mọ ạKastor rꞌạPoluks, dị ạḍua Ạleksandria kụ aru ạrol pạ rụnwanyu ẹephoom mọ.

¹² Kụ yoor rosul Sairokius kụ ọrol pạ ịraar aḍughul-otu.

¹³ Kụ romitiom pạ kụ yoor oten osi Rigeom, kụ rẹḅaal bịn ookuugh ạḍua ọman aru ụteeny iyoor, kụ ḍịphe kemuneniom bọ ịyal aḍughul-otu phọ kụ yoor osi Putioli.

¹⁴ Ịsiphe kụ ẹdi yoor ọmiin bụo ạsiosi, dị ụkpaariom iyoor ọrolan ạbidi oḍual aḍughul-otu, kụ yoor ọḍua pạ onyeene Rom.

¹⁵ Mem dị ạbuo asiya phọ ayoor ọnaghan bọ mọ yoor odi eten, bịdi ụḍua ni Rom osi kꞌẹpe Ḍighi Ạpios rꞌỊraar Aruutu Abuteneneen uzuan iyoor, kụ ạPol ạmiin bọ bịdi, ịkparamiom ni ologhi ọdi kụ ạseph Ẹnaan.

Ẹpe Rom

¹⁶ Yoor oru bọ osi Rom, ụngo ni Pọl eepoogh mọ ạrol li ḍịo ọdi, kụ ọlo ọnyo ẹgham akori ghan ni nyọdi.

¹⁷ Ịraar aḍughul-otu reten, kụ ạPol aagbologh oomo ikpolom awe ạbuo aJu phọ, kụ ạḅeni bịdi mọ, “Bụo asiya, mị mạar úḍighi dị ẹpioman esi awe phọ ayira rꞌeḍighinom ịyaar ạburude ạburude phọ ayira, kụ ụsighe bọ ni ịmi ọnyo-ikoli kꞌẹpe Jeruselem ọḅile ụḅogh ịmi ọlogh rạghaagh ạbuo aRom.

¹⁸ Bịdi ọoḅeghion bọ ọghaaph phọ ạmi ophogh, ụwa ni oseere ạmi, ịdi eḍighi bọ ẹmhu ọtuan oghiigh ạmi ị́tol.

¹⁹ Kụ bụo aJu phọ úmeeraam, kụ ịkpaariom ịmi ọsighe aḍighiton phọ oruomaan aSiza, ụ́ḅile ụḅem mọ mị raḅoroghom ẹmha phọ ạmi.

²⁰ Esi ịphen phọ kụ ẹdi mị ạwa bọ ọmiin anyina rꞌọghaaphan anyina. Kụ ẹmhu oye phọ aweye phọ Ịzirel oḍuom bọ ologhi phọ kụ ẹdi ọtu bọ ụkasaghiom ịmi izime phọ ịphen.”

²¹ Kụ bịdi ọḅeni nyọdi mọ, “Ạrinya lọ ọgeom nyịna kẹ̋ḍua Judia eru ịteeny iyoor, ḅịle kẹn ọnyo asiya dị asi ẹphen kụ mạghaaph ịkaraph ạna ólho.

²² Kụ yoor rọwa ni ọnaghan aani ịitughian ạna, ịdi eḍighi bọ yoor olegheri mọ tọrobo ekpisi awe rọkaaph ghan ịkaraph ịlo otul phọ ọphon nạ aḍigh aani bọ.”

²³ Kụ oguanaan Pọl ḍio kụ aḍita phọ ạbidi ookpomoghan sịphe ọdi arugh bọ. Kụ ọdi amiigh ḍịroor ọghaaph ooḅi ọghaaph ịlo ọmar phọ kꞌẸnaan tụtu eghuloghom, kụ esi ọkparamiom ịlo ạJizos, ọdi ạmaaghi ni ẹkpigh kịrokiro sịphe ạrinya iilogh phọ aMozis rꞌariil phọ, dị ẹghaaph ịlo aMesaya phọ.

²⁴ Ọghaaph phọ ạmoogh ni ephigh esi abuniin, kụ buniin ụ́maghami ịyaar.

²⁵ Tụtu bịdi kọgbaragbara bọ ọḍuaghu, ạPol ọ́wile ọghaaph mọ, “Uwaloor Iigbia phọ aḍighi ni dị Azaya oyil phọ Ẹnaan, ạghaaph ịpe eru bọ ịne ạḅeni bụrude ạburude phọ anyina

²⁶ mọ, “‘Kịa ạḅeni we phọ ạbuen mọ Ẹnaan ẹḅem mọ: Ophogh nyina kepogh ni, kụ nyina kẹ́miin, ọnaghan nyina kẹnaghan ni, kụ nyina kẹ́kpaph ẹpam,

²⁷ ịdi eḍighi bọ abula kụ maḅogh iloghi awe phọ ạbuen, ọbo bịdi kolegheri ghan bọ ịyaar, kụ areḅeri phọ ạbidi meḍuughian, ọbo bịdi kọnaghan ghan bọ ịyaar, kụ ariḍien ạbidi mokpereghian yogh, ọbo bịdi kọmiin ghan bọ eten, ọḅile okiton usoman ịmi, mị aakonom bịdi.’”

²⁸ Kụ ạPol akureriom mọ, “Esi ịphen phọ, Ẹnaan mẹsighe ọghaaph ọphel otene phọ ẹkiom aani ruuruen phọ. Bịdi ghụn kụ kọnaghanan.” [

²⁹ ẠPol rọghaaph bọ ịphen phọ, kụ bụo aJu phọ oghughaan ọyugh ọḍuaghu.]

³⁰ ẠPol ạrol bọ ịyal ạsia otu dị ọdi ạlom arugh, kụ ạghereghom ghan ni oomo ạbudi ọghi ghan ophogh ọdi,

³¹ ạghaaph ghan ọghaaph ịlo ọmar phọ kꞌẸnaan, kụ ạtughemiom ghan oḅom ẹmhu ịlo ạJizos Kraist Ọmoogh-we phọ, kụ oye nyọdi ómirighan.