Iiḍighi 27 - Ạḍinya Iigbia

ẠPol aḍigh oghuugh rạki Rom

¹ Mem dị mogu bọ mọ yoor koḍigh oghuugh kụ ọki Itali, kụ ọḅogh Pọl rꞌạbunon ạbuo ikoli ọngo nyoniin ogbogh ọnyo ẹgham, dị oghol mọ ạJulios, ọlo ẹkpigh Ọgostos.

² Kụ oniin oboom oghuugh dị ạḍua Adramitiom rạki risiḍia eelhe Esia ạrol li pạ kụ yoor oḍigh aani. Kụ Ạristakos ọlo ạTesalonika eelhe aMasidonia uḍighan ni iyoor, kụ omitiom oghuugh phọ.

³ Kụ yoor osi Saidon ḍio phọ ạḍiphe etum bọ pạ, kụ ạJulios ạseeghi ni Pọl ạngoom eepoogh mọ ọdi ạghi ni aaphoghogh rịghiri ọdi dị kọmaar ọpam nyọdi.

⁴ Ọḅile omitiom oghuugh phọ bịn oghim ụda iyoor kụ yoor ọgur oghuugh phọ ọngo elhiom ekpu-ogbo phọ ạSaipros.

⁵ Kụ mem dị yoor mọzoghi otu-ḅualhe phọ ọḅeeny risiḍia aSilisia rꞌaPamfilia, kụ yoor osi Maira eelhe ạLisia.

⁶ Ẹpe kụ ẹdi ogbogh ọnyo ẹgham mọ ạmiin oghuugh dị ạḍua Ạleksandria rạki Itali, kụ ụsighe iyoor ạsaanyaan.

⁷ Yoor ụkoronaan ni ịzoghi phọ rꞌịminimiin ịminighan asiḍughul-otu, kụ ọmeremi oghuugh phọ ogbo ọphiiny phọ ẹpe Knạidos. Ịdipho oghim mọ úmeera mun bọ mọ yoor ọghi ghisigh, kụ yoor ọgur oghuugh phọ ọghiom ḍịghaagh ekeeny ekpu-ogbo aKrit otenom ẹkuleeny aSalmone.

⁸ Rꞌịminimiin kụ yoor ọḅar ọgbal ọgbal ọghi osi esi dị oghol mọ Ịma Arisiḍia, dị etuman ẹmha aLasia.

⁹ Yoor ubia ni dị tụtu ariiḍio phọ bụo aJu phọ rọtuan ghan bọ ịiḅereghi kọrol ọkoony meru eten. Erelhe oghuugh mẹkpar kụ ạPol aroma bịdi mọ,

¹⁰ “We phọ! Yira ọḅile omitiom oghuugh phọ, kẹ́nighe. Aruphua phọ rꞌoghuugh phọ bịn kụ képe, ạrumhu awe kepe aani ni.”

¹¹ Kụ ogbogh ọnyo ẹgham mọ ómeera ạnaghanan ghụn ịpe uwo ẹmhu oghuugh phọ rꞌuwo oghuugh phọ ọghaaph bọ apuemi ịpe ạPol.

¹² Esiḍia phọ rẹ́nighe ghan ọrol rụnwanyu ẹephoom mọ. Ịduon kụ iḍighi kụ ogbogh opol awe phọ oromoghiom mọ omitiom ni ophogh mọ kotue ni osi Finiks, eniin esiḍia aKrit dị ẹgumom ọman oghim mọ, kụ ọrol ạrunwanyu ẹephoom mọ.

Oghim akim

¹³ Ọyoghoyogho ookuugh amiigh ni oghugh esoorom ạbidi kụ bịdi ogbiom mọ bụno kosi ni esi phọ bụno rọwa bọ, kụ ọsaany ịluma phọ, kụ ọzoghi ọḅararian ọgbal aKrit.

¹⁴ Kụ íbia bịn oboom oghim dị oghol mọ Yurokilidon, ạḍua pạ ekpu-ogbo phọ aru aphum oghuugh phọ.

¹⁵ Kụ oghuugh phọ órue mun ọda oghim mọ, kụ olegheri ọwile mọ ụyoom iyoor.

¹⁶ Ọony ekpu-ogbo dị oghol mọ ạKoda dị yoor ọghuuraam roten, kụ ịngo iyoor oghoph, kụ rꞌọkpar aloor kụ yoor ọphamaghan ọbam oghuugh phọ.

¹⁷ Kụ bịdi ọsighe ọbam oghuugh phọ ọsaany, kụ odoghoḍi iḍigh ọphamagham ogbogh oghuugh phọ. Rꞌoḅio kakaph mọ oḍighom ịyaar oghuugh phọ katirian ruḅum ịisaar phọ ịpe edi bọ ọgbal arisiḍia phọ ạLibia, kụ bịdi odughe yogh ạvala oghuugh phọ, ọbo oghim mọ bịn kụ arelhiom bịdi.

¹⁸ Oghim mọ rꞌamem ódugh, kụ ḍio phọ ạḍiphe etum bọ pạ, bịdi omiigh osumughi asidool.

¹⁹ Kụ rẹḅile rẹḅaal, kụ bịdi omiigh ọsighe ạraraar dị roḍighinom ghan oḍighi pạ ologhi oghuugh phọ osumughi.

²⁰ Esi ịbadi asiḍughul-otu yoor erumuḍio rꞌạraanaan ụ́miin, kụ oghim mọ rꞌamem ódugh, dị tụtu ịitughian aghuḍum iyoor ị́rolonaan mun.

²¹ Bịdi mọrol ọkoony ebia, kụ ạPol ạmeera pạ ogbo phọ ạbidi kụ ạḅeni mọ, “We phọ! Mọ nyina ịnaghanan ọnhu ạmi ẹpe Krit, ọbo nyina mímitiom oghuugh phọ, dị muzuan ịminimiin rꞌamuphe phọ ạmuen.

²² Kụ nyịidipho mị rịḅeni ghan inyina mọ ịmoogh ạkpo ologhi. Rꞌoniin ọnyo anyina kápe, oghuugh phọ bịn kụ kape,

²³ ịdi eḍighi bọ, ḍughul phọ ạḍien ẹḅaal bọ rodon, ọokpaany Ẹnaan phọ ẹpe ịmoogh bọ ịmi kụ mị raaseeny ghan bọ aru ni ạmeera ịigaany ạmi.

²⁴ Kụ ụḅeni ịmi mọ, ‘Pọl, kákiilaan. Nạ kạmeera ni ghisigh aSiza. Pogh aani, Ẹnaan mẹtuan ẹmhu ạna eḍighi dị rꞌeniin ẹmhu ạbuphe rꞌạna oḍigh bọ oghuugh phọ képe.’

²⁵ Esi ịphen phọ, we phọ, ịmoogh ni ạkpo ologhi. Mị ameeraam ni mọ Ẹnaan kẹtuugh ni ịdipho mọghaaph bọ ụḅeni ịmi eḍighi.

²⁶ Kụ ọlo yira kọgbana ni eniin ekpu-ogbo.”

²⁷ Ogbo aḍughul aḍio dị emuneniom ḍioph rꞌinya aḍughul-otu, kụ oghim mọ iyoor ụ́wile ni pạ Ọphiiny Meditarenian, kụ ẹghighom esi ạbuo oghuugh phọ mụdi rọobeeph ạnyu ade.

²⁸ Kụ bịdi ọsighe oḍigh ootiom kụ ọtooghi ọmiin mọ aḍigher esi phọ ẹman inyadi akuḅu, kụ mọony amem bịn ọḅile ooti kụ ọmiin mọ ẹman ịraardi akuḅu.

²⁹ Ughiilaan ni mọ ịduon sịen oghuugh phọ ayoor kạsiiny sighiigh ạwoghoronu, kụ bịdi osumughi inya ịluma ẹpe eti phọ, kụ ogonom ạḍiroor.

³⁰ Ạbuo oghuugh phọ ụutughian ghan ịlo osumughu ọḍua, kụ okue ọghi ẹpe ẹsoph phọ oḍighi mụdi rosumughi ghan ịnon ịluma, kụ ọokpo ọbam oghuugh phọ osoore ụmuum.

³¹ Kụ ạPol ạḅeni uwo ẹmhu ạbuo ẹgham mọ rꞌawe phọ ọdi mọ, “Awe oghuugh phọ kụ ọḍuaghu sịen oghuugh phọ, rꞌoniin ọnyo anyina kạ́tol.”

³² Kụ bụo ẹgham mọ oogbo iḍigh ọbam oghuugh phọ, kụ ọwile mọ aphe.

³³ Rọmiina siloor, kụ ạPol aromoghiom oomo phọ ạbidi mọ olhe eḍien mọ, “Rꞌarodon ḍioph rꞌinya aḍughul-otu nyina ịyaar ílhe bọ rꞌokaphian oḅio.

³⁴ Ịduon kụ iḍighi kụ mị riroma inyina mọ ile eḍien ẹlo ọmooghom ịnyaam ọphelaam ạrumhu anyina. Rꞌạḍilaal oniin ọnyo anyina képe.”

³⁵ ẠPol rokureri ọghaaph phọ, kụ ạsighe ạbred, kụ rọngo ḍịseph Ẹnaan pạ aghisigh phọ ạbidi, kụ ạparion kụ amiigh ole.

³⁶ Kụ oomo phọ ạbidi oomanam olhe aani eḍien.

³⁷ Kụ oomo phọ ayoor ọrol bọ pạ ologhi oghuugh phọ ụman ịyal okuron oḍualdi rꞌodiiny awe.

³⁸ Kụ bịdi rolhe ẹdi mẹkasian, bịn ọsighe ịbiakpa phọ osumughi ọphiiny phọ ọbo oghuugh phọ aaphoogh.

Oghuugh phọ atirian

³⁹ Ẹḅaal bọ, bụo oghuugh phọ ụmiin ni de kụ ụ́logh elegh esi phọ, kụ ụmiin ni ọyekele oolhe, kụ oopuruan mọ ẹghigh ni, pọ ạbuno kosul oghuugh phọ pạ.

⁴⁰ Kụ bịdi oogbo ịluma phọ ọwile ẹpe ologhi ạmuum mọ, kụ egina phọ amem mọ bịdi ọokpo iḍigh dị ọkpooghiom ịlom mọ, kụ oneene ạvala phọ kụ ọgbagh oghuugh phọ ọbo ookuugh phọ aghughom ạgbaani ẹpe oolhe phọ.

⁴¹ Kụ oghuugh phọ atirian eḅum, kụ ẹsoph phọ eḅi ogbo ịisaar phọ ẹgbana, kụ oologh phọ aaphumogh eti phọ ạwoghoronu.

⁴² Kụ bụo ẹgham mọ oopuruan mọ ọze oomo ạbuo ikoli phọ, ọbo bịdi kọmughi ghan bọ opun osumughu.

⁴³ Kụ uwo ẹmhu ạbuo ẹgham mọ ạnya ni ọphel ạPol kụ amirighan bịdi, kụ ạto ghụn ạḅeni bịdi mọ ọlo katue ạmughi, apel asuma ạmughi aphun ạnyu,

⁴⁴ mọ ạbueri phọ ọokpaphagh sụpo rꞌịnon ạraraar oghuugh phọ ọmughiom ophun aani. Kụ ịduon kụ ịdi oomo phọ ayoor okpetenaan bọ kụ ophunughu ạnyu ade.