Iiḍighi 23 - Ạḍinya Iigbia

¹ ẠPol akiririom aphogh ookpomoghan ikpolom awe phọ, kụ ạḅem mọ, “Bumor ạmi, mị ạsighe ni igey ịitughian kụ odimom ghan bọ ghisigh Ẹnaan tụtu kꞌaḍio phọ arodon.”

² Kụ Ạnanayas, uwo ẹmhu oyil ạrikia phọ, ạto ạḅeni bụphe ọmeregha bọ otuman nyọdi mọ okpor ọnhu ọdi.

³ ẠPol ạḅeni nyọdi mọ, “Nạ iikpe ọogha dị ogbul ọphalaḅaal ạgba, Ẹnaan kekpor aani ni nyịna. Nạ ạtolom ạgada ọtuan ịpe iilogh phọ osoph ọoruen ọngo ạmi, kụ nạ ạḅile asoor ologh ạto mọ okpor ọnhu ạmi.”

⁴ Kụ bụphe ọmeregha bọ otuman nyọdi ọḅem mọ, “Nạ ragurughi ghan uwo ẹmhu oyil ạrikia phọ Ẹnaan.”

⁵ Kụ ạPol mọ, “Bụo asiya, mị alegheri mọ ọdi kụ uwo ẹmhu oyil ạrikia phọ, ọbo mị mụ́ḅem ịduon phọ, ịdi eḍighi bọ ọge ni pạ ạḍinya iigbia phọ mọ kụ́kaaph ghan ịkaraph ịlo ạbuo ạrumhu phọ.”

⁶ Kụ mem dị edigheri Pọl mọ buniin pạ phọ ạbuo otul aSadusi, buniin ạbuo otul aFarisi, ọdi amoogha ni pạ ookpomoghan phọ mọ, “Bụo asiya, mị ọnyo aFarisi. Ọnyo aFarisi kụ ụmar ịmi. Mị ạdagh ạgada ạsiagba rodon, ịdi eḍighi bọ mị ạmoogh oḍuom ologhi mọ bụlo momuughu koḅetenu ni esi aḍuugh phọ.”

⁷ Ịdipho ọdi ạḅem bọ ịduon phọ, bịn ọgbaragbara asoor ogbo ạbuo aFarisi phọ rꞌạbuo aSadusi phọ, kụ ookpomoghan phọ ạaya,

⁸ ịdi eḍighi bọ bụo aSadusi phọ rọḅem ghan mọ oḅetenu esi aḍuugh ólho ghan, mọ ạruukpaany Ẹnaan rꞌaruwaloor ílho ghan, kụ ạbuo aFarisi phọ kụ umeeraam mọ ịphen phọ edi ghan ni.

⁹ Kụ oboom ọruonu asoor, kụ buniin ạbutughemia iilogh phọ dị oḍighan Farisi phọ oḅerenu ọmeregha ịlo ọkparamiom kụ ọḅem mọ, “Yoor ụ́miin ịkaraph dị oye phọ ọphon aḍighi. Iini uwaloor mụghumo ọokpaany Ẹnaan kụ ạghaaph bọ ạḅeni nyọdi.”

¹⁰ Kụ mem dị ọgbaragbara phọ mạphughan, ogbogh ọnyo ẹgham mọ rakiilaan mọ oḍighom ịyaar bụen kọpanyi Pọl, kụ ạto ạḅeni we phọ ọdi mọ osoor ude oziton nyọdi bịdi ạar, ọsighe ọghi marugh ạbuo ẹgham mọ kụ ọlogh.

¹¹ Kụ ḍughul phọ ạḍiphe etum bọ pạ, Ọmoogh-we phọ aru ni ạmeera atuman nyọdi kụ ạḅeni mọ, “Mọogh ọkparam. Ịdipho nạ ạghaaph bọ ịlo ạmi ẹpe Jeruselem kụ ịdi nạ kụghaaphaan ni ịmi ẹpe Rom.”

Egir dị oḍigh oghiigh ạPol

¹² Rẹḅaal kụ bụo aJu phọ oḍigh egir kụ oghunya loor ạbidi kụ ọḅem mọ ạbuno kóle, ḅịle kọ́pughol tụtu bụno oghiigh Pọl.

¹³ Kụ aḍita ạbuen phọ upel li inyadi awe.

¹⁴ Kụ bịdi ọghi kꞌuwo ẹmhu oyil ạrikia phọ rꞌikumoor awe phọ kụ ọḅem mọ, “Yoor moghunya iikunya okiran ịyo mọ yoor ịyaar kóle tụtu yoor oghiigh Pọl.

¹⁵ Ịphen kụ ịdi nyina rꞌookpomoghan ikpolom awe phọ keḍighi. Itom ẹghi ẹḅeni ogbogh ọnyo ẹgham mọ mọ ạsighe Pọl aru, loor esi dị nyina ẹḅile ni ẹmoogh rạraar opuru yogh ọdi. Kụ yoor kogon ni ẹpe eten okiigh nyọdi.”

¹⁶ Kụ ọony umarani ạPol ạnaghan ezue phọ ạbidi, kụ ọdi ạghi aḍigh pạ amarugh ạbuo ẹgham mọ kụ ạghaaph ạḅeni Pọl.

¹⁷ Kụ ạPol ạmagh oniin uwo ẹmhu ạbuo ẹgham mọ kụ ạḅeni mọ, “Sịghe onyugheel ọony phọ ọphon ạghiom ogbogh ọnyo ẹgham mọ. Ọdi ạmoogh ni ịyaar ọḅeni.”

¹⁸ Kụ ạsighe nyọdi ạghiom ogbogh ọnyo ẹgham mọ kụ ạḅeni mọ, “ẠPol ọnyo-ikoli phọ kụ ụmagh ịmi, kụ urom ịmi mọ mị ụsighe onyugheel ọony phọ ọphon aruom nyịna, mọ ạmoogh ni mạar ọḅeni ạna.”

¹⁹ Kụ ogbogh ọnyo ẹgham mọ ạpham ḍịghaagh ọdi, kụ atenom ọgbal kụ apuru nyọdi esi ịbooghian mọ, “Eeghe ịyaar kụ ẹdi nạ ạmoogh bọ ọḅeni ạmi?”

²⁰ Kụ ọdi mọ, “Bụo aJu phọ mọḅoph ọnhu orom oruom ạna mọ sịghe Pọl iḍue aruom ookpomoghan ikpolom awe phọ, dịadi bịdi kọnaghan ḍighiton phọ ọdi igey.

²¹ Esi ịduon phọ údughanaan ghan bịdi, ịdi eḍighi bọ awe dị opel inyadi ọḅona ni rokori nyọdi. Bụen phọ okiran ịyo mọ ạbuno kóle, ḅịle kọ́pughol tụtu bụno oghiigh nyọdi. Kụ nyịidipho bịdi mọnyaaghian ni kụ rokoriom ghan ọnaghan ịlo nạ kạkaaph.”

²² Kụ ogbogh ọnyo ẹgham mọ ạḅeni onyugheel ọony phọ mọ agheel, kụ ạphur rụru mọ oye kụ́ḅeni mọ ọdi mạghaaph ni ịphen phọ, ạḅeni nyịno.

Ọsighe Pọl ọkiom Fẹliks ọdaam eelhe phọ

²³ Kụ ogbogh ọnyo ẹgham mọ ạmagh ịyal ạbuo ịtooghi ọdi, kụ ạḅeni mọ, “Iikolobian emitiom ịyal okuron awe ẹgham, ra oḍualdi ạbudi koḍiku rụsu, ra ịyal okuron awe dị rotoph ghan ịsoph, ẹghi Sizaria esugha asuo ḍughul arodon.

²⁴ Kụ ẹpham ịnam dị ạPol kaḍiku ghan, ẹsighe nyọdi kọl kọl ẹghiom Fẹliks ọdaam eelhe phọ.”

²⁵ Kụ ọdi ạge ḍịnya phọ ạḍien mọ,

²⁶ “Mị, ạKlodios Lisias, kụ ụge ḍịnya phọ ạḍien raruomaan nyịna ạFeliks ọdaam eelhe phọ. Nạ odi.

²⁷ Bụo aJu phọ kụ usiph oye phọ ọphon rọwa ghan ịlo oghiigh, kụ mị ạnaghan bọ mọ ọdi ọlo aRom, mị ụpham ni we ẹgham ạmi ạghimom ạtagharan nyọdi.

²⁸ Kụ mị ụwa ni olegheri ịyaar phọ ọgba bọ mọ ọdi aḍighi phọ, kụ mị ạsighe nyọdi ạghiomonaan ookpomoghan ikpolom awe phọ ạbidi.

²⁹ Kụ mị ạwa bọ ạmiin ọdi ósoor ologh dị ẹkpe oghiigh ọdi mụghumo ọlogh ikoli. Ịpe bịdi ọgbaam bọ nyọdi iḍighi ịlo iilogh phọ ạbidi bịn.

³⁰ Mọghaaph ụḅeni ịmi mọ ạbuo aJu phọ oḍigh egir oghiigh ọdi, ịduon kụ iḍighi kụ mị ạsighe bọ nyọdi raruomaan nyịna. Kụ mị mạḅeni bụphe ọgbaam bọ nyọdi sịagba phọ mọ oru ghisigh ạna kụ ọpham nyọdi iilogh phọ bịdi osiph bọ nyọdi.”

³¹ Kụ bụo ẹgham mọ ụtuugh ni ịdipho ọḅeni bọ bịdi oḍighi, kụ ọsighe Pọl ḍughul ọghiom Ạntipatris.

³² Kụ ḍio phọ etum bọ pạ, bụo ẹgham mọ orelhe bọ owol phọ oten oḅula ẹpe amarugh phọ ạbidi, kụ bụphe oḍiku bọ rụsu phọ

³³ ọsighe nyọdi osiemi Sizaria kụ ọḅogh Pọl rꞌạḍinya phọ ọngo ọdaam eelhe phọ.

³⁴ Ọdi rạal ḍịnya phọ kụ apuru Pọl mọ, “Nạ ọlo ẹghen eelhe?” Kụ mem dị ọdi alegheri bọ mọ ọdi ọlo aSilisia,

³⁵ kụ ạḅem mọ, “Mị kạnaghan ni sịagba phọ ạna, mem lọ bụphe ọpham bọ nyịna iilogh phọ moru osi aani.” Kụ ọdi ạto ạḅeni we phọ ọdi mọ oseere Pọl sịphe ogiga phọ ogholom bọ ạHerod ọdaam mọ.