Iiḍighi 22 - Ạḍinya Iigbia

¹ “We phọ, bumor rꞌạburude ạmi, ịnaghan ịphen mị kạkaaph bọ ọphelaam ẹmhu phọ ạmi.”

² Kụ mem dị bịdi ọnaghan bọ mọ ọdi rạḅa ni ọnhu aHibru bịdi uḅoroghian ni opu ẹḅel amem mọ, kụ ọdi ạḅem mọ:

³ “Mị ọlo aJu dị ọmar ẹpe Tạsos ọpo aSilisia kụ uukonom ịmi ẹphen Jeruselem kꞌạGamaliel. Uromoghiom ni ịmi iboom ịlo iilogh ạburude ạburude phọ ayira. Mị ụsighe ni ologhi ạmi ạḅam loor Ẹnaan, ịdipho oomo phọ anyina edi bọ sịen rodon.

⁴ Mị usiphi ghan ni nmạriir rꞌalephiri ạloghoḍi ikoli. Mị ụgbiphoghom ghan ni iboom tụtu ạloghom esi aḍuugh we phọ ạbuphe ọdaph bọ Emoom Eten phọ.

⁵ Uw-ẹmhu oyil ạrikia phọ rꞌikpolom awe phọ kotue ni ọkaaph omitiom mọ mị rạgba ni igey. Bịdi ụge ni rịnya mọ mị ụkiomaan bụo ạrumhu arubughotu phọ ạDamaskos, kụ mị aten rạki ẹpe osiphi awe phọ ạbuphe ọphaḍiom yogh izime ọpham oḅulolom ẹphen Jeruselem lọ kọliom bịdi.”

ẠPol ạkaaph ịpe okiton bọ nyọdi

⁶ “Kụ ịdipho mị aten bọ rạki, mị ạtol rapogh Dạmaskos mem ootaany, ekperenom bịn ạḍinmananmana ạḍiḅaal ẹḍua ẹpe kꞌạke isoorom ịmi ekoom,

⁷ kụ mị ameel ude, kụ mị ạnaghan ẹḍogh dị ịmagh ghan ịmi mọ, ‘Sọl, Sọl, uḍighi bọ ika kụ nạ rụgbiphoghom bọ ịmi nụun?’

⁸ Kụ mị apuru mọ, ‘Nạ ạnhian nụun, Ọmoogh-we?’ Kụ ọdi ụḅeni ịmi mọ, ‘Mị ạJizos ọpo ạNazeret phọ nạ rạgbiphoghom bọ.’

⁹ Kụ bụphe ọrol bọ pạ rꞌạmi ụmiin ni ḍịḅaal phọ, kụ ụ́naghan ẹḍogh oye phọ ọpo ạghaaph bọ rụḅeni ịmi.

¹⁰ Kụ mị apuru mọ, ‘Ọmoogh-we, mị kaḍighi ika?’ kụ Ọmoogh-we phọ ụḅeni ịmi mọ, ‘Ḅetenu ạghi Dạmaskos. Ẹpe kụ ẹdi kọḅeni bọ nyịna oomo ạraraar phọ ịpe Ẹnaan megbiighi bọ mọ nạ kaḍighi ghan phọ.’

¹¹ Mị ụ́miin eten loor esi ạḍinmananmana ạḍiḅaal phọ, kụ bụphe rꞌạmi rọki bọ ọpham ḍịghaagh ạmi kụ mị ạdaph asi Dạmaskos.

¹² “Kụ oniin oye aruukuan ạrol li Dạmaskos dị oghol mọ Ạnanayas dị aako ghan iilogh phọ ayira. Oomo ạbuo aJu phọ orugh bọ Dạmaskos ụlhogh ni nyọdi iboom eghuan.

¹³ Ọdi aru ni ạmeera ịigaany ạmi kụ ạmagh mọ, ‘Sọl, umor ạmi, ḅịle ạmiin eten.’ Kụ mem mem mọ bịn mị ạmiin eten akiton aphogh nyọdi.

¹⁴ Kụ ọdi ạḅem mọ, ‘Ẹnaan ạburude ạburude phọ ayira mẹma nyịna emitiom ịlo olegheri arigbiom mọ ọdi, rꞌọmiin Oye Aghuḍuul phọ ọdi, rꞌọnaghan ịpe kẹḍua bọ pạ ọnhu phọ ọdi emite.

¹⁵ Nạ kụ kạgbaanaan nyọdi ịpe nạ ạmiin bọ ạḅile ạnaghan, ạḅeni oomo awe.

¹⁶ Kụ nyịidipho nạ ụḅile bọ rakori ghan eeghe? Ḅetenu owur mụum, ạmagh ḍien phọ ọdi ạghalam mọ ọdi aatol ịkaraph ạna ạsighe.’”

ẠPol ạkaaph ịpe ọmagh bọ nyọdi mọ ạghaaph ghan ooḅi ọghaaph ạḅeni ruuruen phọ

¹⁷ “Kụ ịphen phọ reten kụ mị aḅula Jeruselem, kụ mị odi sịphe Otu Ịiḅereghi phọ rạaḅereghi ghan, kụ mị ạmiin ikon.

¹⁸ Ọmoogh-we phọ ụḅeni ịmi mọ, ‘Nụun aagborion ạḍua Jeruselem, ịdi eḍighi bọ bịdi kọ́naghanan ịpe nạ kạkaaph bọ ịlo ạmi.’

¹⁹ Kụ mị ạḅeni nyọdi mọ, ‘Ọmoogh-we, bịdi rꞌaloor olegheri ni mọ mị ụlhoghoḍi ghan ikoli akuphogh bụphe omeeraam bọ nyịna tọrobo obughotu.

²⁰ Kụ mem mọ ọpo ozu bọ ịḅaal phọ aStivin phọ ọpo ạghaaphaan ghan bọ nyịna, mị ụmeera ni pạ ameeraam mọ oghiigh ni nyọdi, kụ ạphamanaan rụsuoma ạbuphe rokiigh bọ nyọdi.’

²¹ Kụ Ọmoogh-we phọ ụḅeni ịmi mọ, ‘Ḍụa ẹphen. Mị kạsighe nyịna ạkele ạkiom ruuruen.’”

²² Kụ bịdi ulher ri rụru ọnaghanan tụtu ọdi ạghaaph bọ ịphen phọ, kụ bịdi ogbi ọlooghi mọ, “Pạm oye phọ ọphon ạḍuanam aghiigh. Ọ́kpianaan mun ọrol.”

²³ Kụ bịdi ọlooghi oroḅologhi rụsuoma ạbidi omophoghi ophugh.

²⁴ Kụ ogbogh ọnyo ẹgham mọ ạḅeni we phọ ọdi mọ ọsighe Pọl ọlogh ẹpe amarugh ạbuo ẹgham mọ, ọgurogh ịlo dị kạgba ẹmhu ịyaar phọ eḍighi bọ kụ awe phọ rọlooghiom bọ nyọdi ịduon phọ.

²⁵ Kụ bịdi rọphaḍiom nyọdi izime, kụ ạPol apuru uwo ẹmhu ạbuo ẹgham mọ dị ạmeera pạ phọ mọ, “Iilogh phọ emeeraam ni mọ ọgurogh ọlo aRom, dị ọoruen úsophonaan, ḍụghum?”

²⁶ Kụ mem dị uwo ẹmhu ạbuo ẹgham mọ ạnaghan bọ ịphen phọ, ạghi ni esi ogbogh ọnyo ẹgham mọ kụ apuru mọ, “Nạ rạwa ghan oḍighi ika? Oye phọ ọphon ọlo aRom.”

²⁷ Kụ ogbogh ọnyo ẹgham mọ aru apuru Pọl mọ, “Ụḅeni ịmi! Nạ ọlo aRom ni?” Kụ ọdi ameera mọ ii.

²⁸ Kụ ogbogh ọnyo ẹgham mọ ạphagharanaan mọ, “Mị ulhiom ni iboom ikpoki oḍighi aani ọlo aRom.” Kụ ạPol ạḅeni mọ, “Mị ọnyo aghisigh aRom.”

²⁹ Kụ ạbuo ẹgham mọ ọnya bọ ọgurogh ọdi ọwile nyọdi ọḍuaghu; ogbogh ọnyo ẹgham mọ bịn aruugu asiph aani ni, mem dị ọdi alegheri bọ mọ ọno ạpaḍiom ọnyo aRom izime.

Ọmeremi Pọl ghisigh ookpomoghan ikpolom awe phọ

³⁰ Ogbogh ọnyo ẹgham mọ ạkar ri ạwa olegheri ologh ạbuo aJu phọ ạPol asoor bọ. Ḍịeri phọ aḍio phọ, kụ ọdi ạto ạḅeni we phọ ọdi mọ ọkagharan izime phọ, kụ aakpomoghi bụo ạrumhu ariil ạrikia phọ rꞌikpolom awe phọ, kụ ạsighe Pọl aru ạmeremi ghisigh ạbidi.