Iiḍighi 21 - Ạḍinya Iigbia

ẠPol ạki asi Jeruselem

¹ Kụ ịphen reten kụ yoor ọḅeni bịdi mọ ịmaar ẹrol, kụ yoor omitiom oghuugh phọ ọḅeeny osoor ẹpe Kọs. Ḍio phọ ạḍiphe etum bọ pạ yoor osi Rods, kụ ọḍua pạ ọghi Pạtara.

² Kụ ẹpe phọ yoor ụmiin ni oghuugh dị rạḅeeny kạghi Finisia, kụ yoor oḍigh aani

³ osi esi dị yoor kotue ni ọtol ọmiin Sạipros, kụ ọzoghi ḍịghaagh elhiom ọngo Sạipros ekeeny, kụ ọghi osi Sịria. Kụ yoor osul Taya, esi dị kopunughi dool.

⁴ Kụ yoor ụmiin ni we dị momeeraam kụ ọrolan rꞌạbidi pạ oḍual aḍughul-otu; kụ esi ịikpo Uwaloor Iigbia phọ bịdi ọḅeni Pọl mọ ọdi kụ́ki Jeruselem.

⁵ Kụ amem mọ ayoor remunughan, kụ yoor ọwile bịdi onyeene erelhe phọ ayoor; kụ oomo phọ ạbidi, rꞌạnmariir ạbidi rꞌịbam ạnmuny urorori iyoor osiemi ẹpe esiḍia phọ, kụ yoor okpuḍughian ọoḅereghi Ẹnaan, kụ yoor ọḅeni bịdi mọ ịmaar ẹrol, kụ bịdi mọ ẹghi ẹnighe.

⁶ Kụ yoor moḍigh oghuugh, kụ bịdi oḅula ologhi otu.

⁷ Kụ yoor ọḍua pạ Taya ọḅile omiigh erelhe phọ, kụ yoor rosi Tolome, kụ ophun ọomaghagh bụo asiya phọ ayoor, kụ ọmina pạ ẹḅaal.

⁸ Rẹḅaal kụ yoor ọḍua ọghi osi Sizaria, kụ ọrolan rꞌaFilip phọ ọpo ạghaaph aani ghan bọ ooḅi ọghaaph phọ. Ọdi oniin sịphe oḍual awe phọ ọson bọ omitiom ẹpe Jeruselem odi ghan eḍien phọ.

⁹ Kụ oye phọ ọphon ạmoogh kẹn ni inya arisina ạnmanyaan dị ilhom kạ̋al dị ọghaaph ghan ịpe Ẹnaan egananami bọ.

¹⁰ Kụ yoor mọrol pạ ịminighan asiḍughul-otu, kụ oniin oyil ịmiin dị oghol mọ Ạgabos ạḍua Judia aru,

¹¹ kụ ạsighe okuughaam ạPol kụ ạphiinya ruwol rꞌạraghaagh ọdi kụ ạḅem mọ, “Uwaloor Iigbia phọ ạḅem mọ ịduon kụ ịdi ạbuo aJu phọ aJeruselem kọpaḍi uwo okuughaam mọ ọphon, kụ ọḅogh nyọdi ọngo ruuruen.”

¹² Mem dị yoor ọnaghan bọ ịphen phọ, yoor rꞌạbuo ekpisi phọ umirighan ni Pọl mọ ọdi kụ́ki Jeruselem.

¹³ Kụ ạPol ạphagharanaan mọ, “Iḍighi ika kụ nyina remoghi yogh bọ kedughe ologhi ạmi? Mị aakolobian ni mọ ụphaḍi ịmi ẹpe Jeruselem, kụ ịdi epu pạ mị ụ́logh ạaku ghuḍum ạmi omugh ọngo loor ẹmhu aḍien phọ ạJizos Ọmoogh-we phọ.”

¹⁴ Kụ mem dị yoor útue ụkaaph ịlo oḅorion ologhi ọdi, yoor ụwile ni kụ ọḅem mọ, “Ịpe ẹḅeeraan bọ Ọmoogh-we phọ ẹtuugh ni emite!”

¹⁵ Yoor rọrol sịphe mọony amem, kụ ookoroghian onyeene Jeruselem.

¹⁶ Kụ buniin ạbumatuan bụo aSizaria ụdaph aani ni iyoor. Kụ ụsighe iyoor osiemi kꞌạMnason, esi phọ ịpa yoor kọtol bọ. ẠMnason phọ, ọlo ạSaipros dị ạmoogh ni omeeraam kꞌagediidi.

ẠPol ạki kꞌaJems

¹⁷ Kụ mem dị yoor osi bọ Jeruselem, bụo ạsiosi phọ ụghereghom ni iyoor rꞌọphalaḅaal ologhi.

¹⁸ Rẹḅaal kụ ạPol rꞌayoor ọghi kꞌaJems; kụ oomo phọ ikumoor awe ạsiosi phọ ụrol li pạ.

¹⁹ Kụ ọdi rọmagh bịdi, kụ ạghaaph eniin etum nyeniin rạraar dị Ẹnaan mẹtuan nyọdi eḍighi sịphe ogbo aruuruen phọ ạḅeni bịdi.

²⁰ Mem dị bịdi ọnaghan bọ ịpe ọdi ạghaaph bọ, bịdi uboom ni Ẹnaan, kụ ọḅeni Pọl mọ, “Umor ayoor, nạ rạmiin aani bọ ni, dị ạsimuunir ạbuo aJu phọ momeeraam, kụ iloghi ạbidi reephugh ni esi iilogh phọ aMozis.

²¹ Kụ mọḅeni ni bịdi ịlo ạna, mọ nạ rạtughemi ghan oomo ạbuo aJu phọ orugh bọ areelhe aruuruen phọ mọ oghel iilogh phọ aMozis, mọ kúḍun mun nmụny ạbidi, ḅịle kẹn kụ́daph mun eḍighinom ịyaar phọ ayira.

²² Yira koḍighi bọ ika loon? Bịdi kọnaghan ni mọ nạ maru.

²³ Tụugh ịphen yoor kọḅeni bọ nyịna kụ aḍighi. Inya awe odi ni sịen dị oghunya.

²⁴ Ḍighom bịdi, ẹḅophoghan eselemian loor anyina kụ ạkpianaan bịdi mạlhiom mọ ạbidi, ọbo bịdi oghula rụmhu ạbidi. Ịduon kụ ịdi oomo awe kolegheri mọ ịpe ọgbaam bọ nyịna ọkpe ni, mọ nạ ạtuugh ni iilogh phọ aMozis raako.

²⁵ Kụ ịlo ekpisi aruuruen phọ ạbuphe momeeraam bọ Jịzos, yoor ụge ni osoph ọoruen ọḅeni bịdi mọ kúle ghan rạraar lọ oḍighinom ịyaar aghuḍum ọngo ruru, mọ kụ́ba ghan ịlo emuughom ịḅaal, rꞌịlo ọphur orum kụ oghiigh, mọ ạregelenya ạnmariir rꞌalephiri ẹmha kúle.”

²⁶ Kụ ḍio phọ etum bọ pạ, ạPol ạsighe we phọ kụ aḍita ạbidi rꞌọdi oselemian loor, kụ ạPol ạghi aḍigh pạ Otu Ịiḅereghi phọ ọghaaph oguom mọ asiḍughul-otu oselemian aloor phọ reten, kụ agbi ọphighiron ẹkia ẹlo oye rꞌoye.

Osiph Pọl sịphe Otu Ịiḅereghi phọ

²⁷ Kụ mem dị oḍual aḍughul-otu phọ retu omunughan, buniin aJu bụo eelhe Esia ụmiin ni nyọdi sịphe Otu Ịiḅereghi phọ, kụ oruphe dị awe phọ ọghagh iloghi oḅol Pọl,

²⁸ kụ ọlooghi mọ, “We Ịzirel, ịlogh ḍịghaagh. Ọphon kụ oye phọ ratelhe ghan bọ oomo areelhe kạghaaph ịkaraph ịlo awe Ịzirel rꞌiilogh phọ aMozis rꞌOtu Ịiḅereghi phọ ọphon, kụ sịen phọ kẹn ọdi mạsighe ruuruen aḍighom Otu Ịiḅereghi phọ, kụ mạapu esi iigbia phọ ẹphen.”

²⁹ Bịdi ụḅem ịduon, ịdi eḍighi bọ mọmiin Trọfimos, ọlo Ẹfesos, rꞌạPol sịphe ẹmha phọ, kụ bịdi ugbi mọ ạPol mạsighe nyọdi aḍighom aani sịphe Otu Ịiḅereghi phọ.

³⁰ Ọgbaragbara asoor ri aleeny ẹmha phọ, kụ awe oghughaan ọghi osiph Pọl kụ ọghogh omitiom sịphe Otu Ịiḅereghi phọ. Egina amem bịn oghughi yogh rughuugh Otu Ịiḅereghi phọ.

³¹ Kụ ịdipho awe phọ ạbuphe oonyirogh bọ rọwa ghan oghiigh ạPol, kụ orom dom ọghiomonaan uwo ẹmhu ạbuo ẹgham mọ aRom mọ oomo aJeruselem molher ẹgham.

³² Kụ mem mem mọ uwo ẹmhu phọ ạsighe bụo ẹgham mọ rꞌabuḍiemiom mọ ạbidi kụ oghiil ọghi osi esi phọ; kụ mem dị aweye phọ ọmiin bọ uwo ẹmhu ạbuo ẹgham mọ rꞌawe phọ ọdi, kụ ọwile oḍul ạPol.

³³ Kụ uwo ẹmhu ạbuo ẹgham mọ aḍuraan ạabeeph, kụ asiph Pọl kụ ạḅem mọ, “Ịsighe ịyal izime ẹphaḍiom nyọdi,” kụ apuru mọ, “Ọphon phọ ạnhian? Ḅịle kẹn aḍighi eeghe?”

³⁴ Aḍita awe phọ ọphagharanaan ọgba ghan ọnhu kịrokiro. Ọgbaragbara phọ ạrol li iboom dị tụtu ịlooghi phọ ímeera mọ uwo ẹmhu phọ alegheri ẹmhu ịpe emite bọ kụ ạḅeni we phọ ọdi mọ ọsighe Pọl ọsiinyom ẹpe marugh ạbuo ẹgham mọ.

³⁵ Kụ mem dị ạPol aru asi pạ ẹedaneen phọ, urool li nyọdi ọpha kụ ọsiinye,

³⁶ ịdi eḍighi bọ aḍita awe phọ ụdaph ni bịdi rꞌigbagbaar rꞌịlooghi mọ, “Kiigh nyọdi.”

ẠPol ạkaaph ọphelaam ẹmhu ọdi

³⁷ Ịdipho ọsighe bọ Pọl rọki osiom ịpa amarugh ạbuo ẹgham mọ, kụ ọdi apuru uwo ẹmhu ạbuo ẹgham mọ mọ, “Kẹḅoph ni lọ mị kapuru nyịna ịyaar ḍụghum?” Kụ uwo ẹmhu phọ apuru nyọdi mọ, “Nạ ạnaghan ni ọnhu aGris ḍụghum?

³⁸ Nạ kọ́lo Ijipt phọ ọpo mem dị meten aruphiom bọ gọmet phọ kụ aḍiemiom bọ inya ọonir ạrookom-enu ạghimom ẹpe ẹdala phọ?”

³⁹ Kụ ạPol ạpharanaan mọ, “Kạ́mi. Mị ọlo aJu, dị ọmar ẹpe Tạsos ọpo aSilisia. Mị ọlo ẹkpana ẹmha ni. Seseeny, meera ni mị ụkaaph ịyaar ụḅeni we phọ.”

⁴⁰ Kụ uwo ẹmhu phọ ameera ni mọ ọdi ạghaaph kụ ạPol ạmeera sịphe ẹedaneen phọ, kụ aphighemi rạghaagh mọ awe phọ oḅoroghian, kụ ạPol ạḅa ọnhu aHibru kụ ạḅeni bịdi mọ: