Iiḍighi 2 - Ạḍinya Iigbia

Erumom Uwaloor Iigbia phọ

¹ Kụ rẹteeny ḍịroor ẹyaal ạPentikost phọ, kụ oomo ạbuphe omeeraam bọ ookpomoghan eniin esi.

² Egina amem bịn oghur ạḍua ẹpe kꞌạke ịdipho oboom ookuugh amuza ologhi otu phọ bịdi ọrologhu bọ.

³ Kụ asinem dị ẹghighogh nịan, emiteghunaan bịdi edia yogh kụ esoroghuom rụmhu phọ ạbidi,

⁴ kụ Uwaloor Iigbia phọ aḍigh loor oomo phọ ạbidi amuza kụ ạngo bịdi ịikpo ọḅaam ọnhu kịrokiro.

⁵ Igbo ạbuo aJu phọ orugh aani bọ Jeruselem buniin uḍighi ni weye aruukuan dị ọḍua eelhe kịrokiro sịen aḅirini phọ kụ oru.

⁶ Kụ mem mọ ọnaghan bọ oghur phọ ọphon, aḍita awe uukpomoghan ni. Bịdi usinighian ni ịdi eḍighi bọ oye ye ạnaghan ni dị ạbuphe omeeraam bọ rọḅa ghan ọnhu ọdi.

⁷ Kụ eḍighi iikia rꞌaruugu esi ạbidi, kụ ọḅem ghan mọ, “Ịduon phọ ika? Oomo phọ ạbuen rọkam bọ ọnhu kịrokiro phọ, ạbuo aGalili ni.

⁸ Iḍighi bọ ika kụ tọro ọnyo ayira rạnaghan bọ ni ọnhu ẹmha phọ ọdi?

⁹ Buniin ayira ụḍua Pạatia, rꞌaMedia, rꞌIlam; ḅịle rꞌaMesopotamia, rꞌaJudia, rꞌaKapadosia; ḅịle rꞌạPontos, rꞌEsia,

¹⁰ rꞌaFrijia, rꞌaPamfilia, rꞌIjipt, rꞌạpakiri ạLibia ọpo atuman bọ Sairini, rꞌaRom, kụ oru bọ sịen.

¹¹ Buniin ayira ạbuo aJu, kụ abuniin, aruuruen dị rooko aani ghan eḍighinom ịyaar ạbuo aJu phọ bịn. Kụ buniin ayira ạbuo aKrit, buniin ạbuo Arebia. Bịn kụ oomo phọ ayira rọnaghan ni dị bịdi ọsighe ọnhu ạramha ayira kụ rọkaaphom iboom iiḍighi phọ Ẹnaan.”

¹² Kụ iḍighi ni iikia rꞌịwalawala iloghi esi ạbidi, kụ oniin apuru ghan nyoniin mọ, “Ịduon phọ ika?”

¹³ Kụ buniin ọgilaam ghan bịdi mọ, “Amumoom amiim kụ rakiigh.”

Ọghaaph phọ aPita

¹⁴ Kụ aPita rꞌiḍioph rꞌoniin phọ oḅerenu, kụ aPita aphoophe ẹḍogh ọdi kụ ạghaaph ạḅeni bịdi mọ, “Weye ạbuo aJu, rꞌoomo anyina phọ erugh bọ Jeruselem! Iler rụru ẹnaghan elegheri ịphen mị kạkaaph bọ!

¹⁵ Awe phọ ạbuen phọ miim ụ́pughol, ịdipho nyina regbiom bọ. Pụruku ẹteeny esugha asuo ạḍiroor.

¹⁶ Kụ ịphen phọ ghụn, ịpe oyil aJoel ạghaaph bọ mọ,

¹⁷ “‘Ẹnaan ẹḅem mọ, Ịphen kụ ịdi mị kaḍighi ruukuna phọ. Mị kaḍighi ịdi Uwaloor phọ ạmi kasoorom oomo awe. Ạnmuny anyina rꞌạnmanyaan anyina kọkaaph ni ịpe mị agananami bọ; ugheel ạnmuny anyina kọmiin ni uḍien, kụ ikumoor awe anyina kọmalha yogh ni rạmalha.

¹⁸ Ii, mị kaḍighi ni ịdi Uwaloor phọ ạmi kasoorom nmụny phọ rꞌạnmanyaan-otu phọ ạmi riiḍio phọ ịpe, kụ bịdi kọkaaph ni ịpe mị agananami bọ.

¹⁹ Mị kaḍeenaan ni ịiḍaany ẹpe ạnyu ạke phọ rꞌimananaany sịen ade phọ, kụ ịḅaal, rꞌạnian, rꞌaḍiphulaam ạmughi kẹtol li.

²⁰ Erumuḍio phọ kekitonu ni eḍighi ufiri, kụ ụnwanyu phọ ạtogh ịdipho ịḅaal, kụ egbi ọteeny aḍio phọ Ọmoogh-we phọ katu bọ, ḍiboom mọ aḍio phọ ạḍiphe keḍighan bọ ni elegh.

²¹ Kụ mem mọ ọpo tọrobo oye lọ ạmagh ḍien Ọmoogh-we phọ kạmoogh ni pẹleeny.’

²² “Weye Ịzirel, ịnaghan ọghaaph phọ ọphon! Mị rạkaaph ịlo ạJizos ọpo ạNazeret, ọpo Ẹnaan ẹngo bọ ịikpo oḍighi yogh rạraar aruugu rꞌịiḍaany rꞌareḍeenaan, ịlo ogananami esi anyina mọ ọno kụ arom ni nyọdi. Ịphen phọ imiteghu ni sịphe ogbo phọ anyina, ịdipho nyina elegheri bọ ni.

²³ Igeedi phọ Ẹnaan ilegheri ni kụ emeeraam mọ ọḅogh Jịzos ịngo inyina. Kụ nyina eḍighi bọ dị abuḍighinom ịkaraph phọ ọkan nyọdi loor oreeny oghiigh.

²⁴ Kụ Ẹnaan ẹekpo nyọdi esi eephina aḍuugh phọ eḅeton. Ídughanaan dị aḍuugh kekpophonom nyọdi.

²⁵ ADevid ạghaaph ni ịlo ọdi mọ, “‘Mị ụmiin ghan ni Ọmoogh-we phọ oomo amem dị odi rꞌạmi, ịdi eḍighi bọ ọdi odi ghan ḍịghaagh elhiom ạmi, ọbo kụuḅaghami ghan bọ ịmi.

²⁶ Ịduon kụ iḍighi kụ ologhi ạmi ạḅaal bọ, kụ mị abo bọ iboh phọ; ịdi etum pạ, aḍizu phọ ạmi kẹtolan oḍuom ologhi,

²⁷ ịdi eḍighi bọ nạ kạ́bile uwaloor phọ ạmi ẹpe ọmar iḍim, ḅịle kẹn aḍizu Oye Aghuḍuul phọ kꞌạna kẹ́ḅor.

²⁸ Nạ muḍeenaan ịmi reten aghuḍum, kụ egbodo phọ ạna kẹḅaalami ologhi ạmi iboom.’

²⁹ “Bụo asiya, ipakian ílho ịphen mị kịḅeni bọ inyina ịlo aDevid ọdaam mọ, ogbogh ọde phọ ayira. Ọdi phọ amugh ni kụ oḍi, kụ oḍi phọ ọdi odi ni rꞌayira kꞌarodon.

³⁰ Aḍighi ni oyil, kụ alegheri ni mọ Ẹnaan phọ ighunya ni, mọ ọno kamitiom ni ọnyo ẹemara ọdi dị kạtolom ạgada ọdaam ẹmha phọ ọdi.

³¹ ADevid ạphur ri ạmiin ịpe Ẹnaan keḍighi bọ kụ ạghaaph bọ ịlo oḅetenu esi aḍuugh aMesaya phọ mọ, “‘Ụ́bile nyọdi ọmar iḍim, kụ aḍizu phọ ọdi ị́ḅor.’

³² “ẠJizos phọ ọphon kụ ọdi Ẹnaan meḅeton bọ sịphe aḍuugh phọ, kụ esi ịphen phọ kụ ẹdi yoor rọkaaphaan bọ.

³³ Ọphon kụ ọdi Ẹnaan mephophe bọ pạ ạḍighaagh elhiom mọ ọdi, kụ ạarom Uwaloor Iigbia phọ, ịdipho Ọde phọ aguanaan bọ. Kụ ịphen nyina rẹmiin bọ kẹḅile ẹnaghan ịikpo Uwaloor Iigbia phọ ạJizos mụngo bọ iyoor.

³⁴ ADevid rꞌaloor ọdi ógheel kꞌạke, kụ ọlo ạḅem mọ, “‘Ẹnaan phọ ẹḅeni Ọmoogh-we ạmi mọ, “Tọl ḍịghaagh elhiom ạmi,

³⁵ tụtu ẹteeny mem dị mị kaḍighi bụmulogh-ḍien phọ ạna ịkasi ọkpasaghiom aruwol.”’

³⁶ “Oomo awe phọ Ịzirel, ịsighe ịphen phọ ẹmaar elegheriom mọ ạJizos phọ ọpo nyina ẹkan bọ loor oreeny phọ eghiigh, Ẹnaan mẹsighe nyọdi eḍighi Ọmoogh-we rꞌaMesaya.”

³⁷ Kụ mem dị bịdi ọnaghan bọ ịphen phọ, imoogh ni bịdi, kụ opuru Pita rꞌạbueri phọ abutelhedom mọ, mọ, “Bụo asiya, yoor oḍighi ika?”

³⁸ Kụ aPita ạḅeni bịdi mọ, “Ikiton esi ịkaraph phọ anyina, ọbo owur tọrobo ọnyo anyina mụum esi aḍien phọ ạJizos Kraist, ịlo ọsar ịkaraph ọwilenaan, kụ nyina kẹmoogh ni inmo Uwaloor Iigbia phọ kꞌẸnaan.

³⁹ Oguan phọ Ẹnaan eguan bọ ọlo anyina rꞌạnmuny anyina, rꞌoomo ạbudi odi egher, rꞌạtorobo ọlo Ọmoogh-we phọ Ẹnaan phọ ayira kẹmagh ẹloghoma.”

⁴⁰ APita ạghaaph ni ịminighan ạraraar ịlo ọkparamiom kụ ạḅem mọ, “Ikpetenaan ghẹlhe phọ kạtolonaan bọ ọkaraph oghiil phọ ọphon.”

⁴¹ Kụ uwurogh ni mụum bụphe omeeraam bọ ọghaaph phọ ọdi, kụ ḍio phọ ạḍiphe bụdi omeeraam ọḅaram bịdi ụghiom ni ịraar ọonir awe.

⁴² Kụ bụphe momeeraam bọ ọkuom loor ạbidi ọnaghan ghan ịtughemi abutelhedom mọ, rꞌọrolan ạdol abumor, rꞌọḅophoghan ọparion ạbred phọ, ḅịle rꞌọoḅereghi Ẹnaan.

Ẹrolom ạbuphe momeeraam bọ

⁴³ Kụ aruugu asiph ni oomo ạbidi, kụ abutelhedom mọ uḍighi ni ịbadi ịiḍaany rꞌareḍeenaan.

⁴⁴ Kụ oomo phọ ạbuphe omeeraam bọ ụrol li egina esi kụ osereghi rạraar ạbidi ogbo.

⁴⁵ Kụ bịdi aalhaghi ghan rạraar rꞌaruphua ạbidi, kụ ọdaph ghan dọl ḍịo oye rꞌoye kụ odiighi ikpoki phọ.

⁴⁶ Kụ aḍio etum ḍio, oomo phọ ạbidi ụghi ghan ni pạ Otu Ịiḅereghi phọ, ọparion ghan ạbred iloghi aruutu phọ ạbidi, kụ ọsighe ghan mụḅoph rꞌọḅaal ologhi kụ oliom eḍien.

⁴⁷ Oboom ghan Ẹnaan, kụ oḍigh ịiseeny esi oomo awe, kụ aḍio etum ḍio Ọmoogh-we phọ ạḅaranaan ghan ni bịdi bụphe rọpel bọ kotene.