Iiḍighi 17 - Ạḍinya Iigbia

Ẹpe Tẹsalonika

¹ Kụ bịdi okiton Ạmfipolis rꞌApolonia, kụ oru osi Tẹsalonika, ekpisi dị obughotu ạbuo aJu ạrol.

² ẠPol rꞌẹeghara phọ ọdi ạghi ni aḍigh aani pạ bịdi ọrol bọ, kụ esi ịraar aḍio ophooghian ạaḅeghion ghan rịikpigh Ạḍinya Iigbia phọ,

³ ạgba ghan ẹmhu ịlo bịdi ụ́naghan, aḍeenaan mọ ịkpianaan ni dị aMesaya phọ kạmiinom amugh, kụ kaḅetenu esi aḍuugh phọ. ẠPol ạḅem mọ, “ẠJizos phọ ọphon mị ạghaaph bọ rịḅeni inyina, kụ aMesaya phọ.”

⁴ Kụ buniin ạbuphe ọnaghan bọ ọghaaph phọ okiton oḍighan Pọl rꞌạSailas, kụ ạḍiminighan aḍita ạbuo aGris dị oghueni ghan Ẹnaan rꞌịbadi ikpolom ạnmariir ọḅaram aani.

⁵ Kụ ạbuo aJu phọ ọghagham nyọdi iloghi, ọsighe bụo amugh-eghe esi aḍita ạbuphe aghuḍum rạ́pu bọ ookpomoghi, kụ ẹmha phọ ephiigha, kụ okoom kꞌạJesin ịlo omitiom ạPol rꞌạSailas ọngo awe phọ.

⁶ Kụ ọmiin bọ mọ bịdi sịphe úlho phọ, ụghogh ni Jẹsin rꞌabuniin ạbuo ạsiosi phọ ọghiom bụo ạrumhu ẹmha phọ ọlooghi mọ, “Bụen phọ mọkaraghi bọ ọphue aḅirini phọ moru osi ẹphen,

⁷ kụ ạJesin ạlogh bịdi otu. Bụen phọ rọkaaghi iilogh phọ aSiza kọḅem mọ ọnon ọdaam ẹmha odi ni, dị oghol mọ ạJizos.”

⁸ Ọghaaph phọ ọphon phọ ạngo ni ọgbaragbara ḍita awe phọ rꞌạbuo ạrumhu ẹmha phọ.

⁹ Ạbuo ạrumhu phọ ụkpaariom ni Jẹsin rꞌạbueri phọ ọkpe ikpoki ọphelaam ạrumhu ạbidi kụ ọwile mọ bịdi ogheel.

Ẹpe Bẹria

¹⁰ Rekpereghian, kụ ạbuo ạsiosi phọ ọsighe Pọl rꞌạSailas ọghi Bẹria. Rosi bọ kụ ọghi oḍigh obughotu ạbuo aJu phọ.

¹¹ Bụen kụ ụnighe ẹzo opu bụphe ạTesalonika. Ụnaghanan ni ọghaaph phọ Ẹnaan rꞌophooph ologhi, ọoḅeghion ghan rịikpigh Ạḍinya Iigbia phọ ophogh tọrobo aḍio ịlo ọmiin mọ ịpe ạPol rạkaaph bọ ịne ni.

¹² Ịbadi ạbidi umeeraam ni, ḅịle rꞌịbadi ikpolom ạnmariir rꞌalephiri ạbuo aGris.

¹³ Kụ mem dị ạbuo aJu ạTesalonika ọnaghan bọ mọ ạPol mạḅile kẹn ạkaaph ọghaaph phọ Ẹnaan ẹpe Bẹria, bịdi oru ọḅile kẹn ophighemi ọphueghi yogh iloghi aḍita awe phọ.

¹⁴ Egina amem bịn ạbuo ạsiosi phọ ọsighe Pọl osiemi ẹpe ọgbal ọphiiny phọ, kụ ạSailas rꞌaTimoti ọrol ẹphen Bẹria.

¹⁵ Kụ bụphe orelhiom bọ Pọl usiemi ni nyọdi kꞌẹpe Ạtens. Roḅula kụ arom mọ bịdi ọḅeni Sạilas rꞌaTimoti mọ ọnuun ọtuonom nyịno.

Ẹpe Ạtens

¹⁶ Ịdipho ạPol ạrol bọ Ạtens rakori ghan Sạilas rꞌaTimoti, kụ ẹeḅaghami uwaloor phọ ọdi iboom ọmiin mọ ẹphen phọ ẹmha dị aruru emuza.

¹⁷ Kụ ọdi ạghi ghan obughotu phọ ạagbaghanaan rꞌạbuo aJu phọ rꞌaruuruen phọ rokueni ghan bọ Ẹnaan. Tọrobo aḍio ạghi ghan ni ḍighi ạagbaghanaan bụlo rꞌọdi oozuanaan.

¹⁸ Kụ buniin ạbudi ọdaph ghan ịtughemi Epikurios rꞌạbudi oghola mọ ạbuno aStoik ọogbaghanaan ghan kẹn rꞌọdi. Kụ buniin ọḅem mọ, “Ọokureeny phọ ọphon kạkaaph eeghe?” Kụ buniin mọ, “Ạkigh mụdi oye dị rạkaaph ghan ịlo iiruen ạrumugh.” Awe phọ ụḅem ghan ịphen phọ, ịdi eḍighi bọ ọdi ạghaaph ghan ịlo ạJizos rꞌoḅetenu esi aḍuugh phọ.

¹⁹ Kụ bịdi osiph nyọdi ọsighe ọghi Ạriopagos kụ oḍeenaan bụphe rọoḅeghion ghan bọ ịtuugha phọ kụ ọḅeni mọ, “Ụḅeni aani iyoor ịlo imoom ịtughemi phọ ịphen nạ rạkaaph ghan bọ!

²⁰ Nạ ạsighe iiruen ạraraar radoghoḍi rụru ayoor, kụ yoor rọwa olegheri aani ẹmhu ịphen phọ.”

²¹ (Kụ ạri ẹḅeeraan oomo ạbuo Ạtens rꞌaruuruen phọ orughogh bọ ẹpe phọ, oroph amem ọghaaph rꞌọnaghan ghan ịlo eḍighi imoom.)

²² Kụ ạPol ạmeera ogbo ạbuphe rọoḅeghion ghan bọ ịtuugha phọ ookpomoghan phọ oghol bọ mọ Ạriopagos phọ, kụ ạḅem mọ, “Weye Ạtens, mị aloghoma ni mọ esi oomo ạraraar nyina rẹtuan ghan ịikia rạraar aghuḍum.

²³ Mị ratelhe bọ sịen ẹmha phọ anyina, mị ạmiin ni riisi phọ nyina rekueni ghan bọ rụmugh phọ anyina. Mị ạḅile kẹn ni ạmiin esi ẹghanaka anyina dị ọge mọ, ‘Ugimanaan Ẹmugh dị úlegheri.’ Ịphen nyina ílegheri bọ kụ rekueni bọ, kụ ịdi mị riḍeenaan bọ inyina.

²⁴ Ẹnaan phọ ẹlhem bọ aḅirini phọ rꞌoomo ịpe edi bọ Ọmoogh-we ạke rꞌade rátugh ghan ruutu lọ ọsighe rạghaagh kụ ọloghom.

²⁵ Ọ́tuan ekuom kụ rạsighe ghan bọ ịlo awe okumunaan nyọdi. Ọdi rꞌaloor ọdi kụ rạngo ghan oomo ạraraar ghuḍum rꞌaḍiphooghu rꞌịlo rọwa.

²⁶ Ọdi kụ aḍighi ịdi oniin ogbogh ọde bịn kụ ạmaraghi bọ bụo oomo areelhe aleenye aḅirini phọ, kụ ạtooghi ịlo amem rꞌamem kụ ạloghoḍi rụuku arere phọ,

²⁷ ọbo bịdi ookula ọwa Ẹnaan, ọmiin lọ ẹghigh. Kụ ạri ọdi ọ́kar ọkelan tọrobo ọnyo ayira.

²⁸ “‘Esi ọdi kụ ẹdi yira odi bọ kụ rotelhe kụ ọmoogh bọ ịpe yira odimom bọ,’ “ḅịle kẹn, ịdipho abuniin ạbuo ạsuor phọ anyina ọḅem aani bọ ni mọ, “‘Yira phọ kẹn ạnmuny ọdi.’

²⁹ “Ịduon yira oru bọ nmụny phọ Ẹnaan, yira kụ́utughian ghan mọ Ẹnaan phọ ẹkigh agol mꞌasilva mꞌaḍighiigh, dị oye kụ ạsighe ẹmaar ọdi kụ ạlem.

³⁰ Mem mọ ọpo elegheri phọ, Ẹnaan ịḅitonaan ni bịn, kụ nyịidipho ọdi mạtooghi mọ aweye oomo arikpisi phọ okiton esi ịkaraph phọ ạbidi,

³¹ ịdi eḍighi bọ ọdi magu ni ḍio, dị oye phọ dị ạma bọ kaagbo ịiruen aruukuan ạngo oomo aḅirini. Ịlo oḍeenaan awe ịphen phọ, ọdi maḅeton oye phọ ọphon esi aḍuugh phọ.”

³² Kụ mem dị bịdi ọnaghan bọ ịlo oḅetenu esi aḍuugh phọ, buniin ụnmoghoghoom ni nyọdi, abuniin ọḅem mọ, “Yoor kọwa ni ọḅile ọnaghan ịphen phọ ẹnon amem.”

³³ Kụ ạPol amite pạ ogbo phọ ạbidi ạḍua.

³⁴ Kụ buniin awe ọḅararian nyọdi omeeraam; sịphe ogbo phọ ạbidi, aDionisios oniin ọnyo ookpomoghan Ạriopagos phọ rọoḅeghion ghan bọ ịtuugha phọ, rꞌạnir dị oghol mọ ạDamaris, rꞌạbunon.