Iiḍighi 16 - Ạḍinya Iigbia

ATimoti ạdaph aani Pọl rꞌạSailas

¹ ẠPol ạghi ni asi Daabi rꞌạListra, kụ sịphe Lịstra, ạmiin oniin ạmatuan dị oghol mọ aTimoti. Onhiin ọdi ọlo aJu dị mameeraam aani, kụ ọde phọ ọdi ọlo aGris.

² Ạbuo ạsiosi phọ ẹpe Lịstra rꞌAikoniom ụgba ni igey ịlo aTimoti.

³ Kụ ạPol ạwa ni mọ ọdi ạdaph nyịno kụ aḍun, ịdi eḍighi bọ oomo aJu phọ odi bọ rạmha phọ ịpe olegheri ni mọ ọde phọ ọdi ọlo aGris.

⁴ Kụ ịdipho bịdi ọḍua ghan bọ ẹmha ọgba ẹmha, ụḅeni ghan ni we ạsiosi phọ iilogh phọ abutelhedom mọ rꞌikumoor awe phọ ọlogh bọ ẹpe Jeruselem, kụ ọphur rụru mọ ọmaar ooko.

⁵ Bịdi ụkparami ghan ni omeeraam ạbuo ạsiosi phọ, kụ aḍita phọ eḍiza ghan aḍio etum ḍio.

ẠPol ạmiin uḍien ẹpe Troas

⁶ Bịdi ukiton ni reelhe aFrijia rꞌaGaletia, ịdi eḍighi bọ Uwaloor Iigbia phọ ómeera mọ ọghaaph ọghaaph phọ ẹpe eelhe Esia.

⁷ Bịdi osi emitenom aMaisia rọwa oḍigh eelhe aBaitinia, kụ Uwaloor phọ ạJizos ómeera.

⁸ Esi ịduon phọ kụ bịdi okiton Maisia ọghi osi Troas.

⁹ Ḍughul kụ ạPol ạmiin uḍien oye ọlo aMasidonia dị ạmeera rạaḅereghian ghan nyọdi mọ, “Ḅẹeny ẹphen Masidonia ụlhoghonaan iyoor ḍịghaagh!”

¹⁰ Ọdi rọmiin bọ uḍien phọ, bịn yoor uzipheriom mọ Ẹnaan mịmagh iyoor ịlo ọghi ọghaaph ooḅi ọghaaph ọḅeni ạbidi, kụ ọghi ọwa oghuugh dị kụsaany iyoor asiemi Masidonia.

Ịdi okiton oniin ạnir dị oghol mọ ạLidia ẹpe Filipai

¹¹ Kụ yoor oḍigh oghuugh ẹpe Troas ọḅeeny osoor Samotres. Rẹḅaal kụ yoor osul Nịapolis,

¹² kụ ọḍua osi Filipai, ẹkpana ẹmha aMasidonia, eḍighi kẹn marugh awe ẹgham aRom. Kụ yoor ọrol sịen phọ ịminighan aḍughul-otu.

¹³ Rẹteeny ḍio ophooghian phọ, kụ yoor ọḍua ẹmha phọ ọghi oogbom ọphiiny esi dị yoor ogbiom mọ esi ịiḅereghi. Kụ yoor ọrologhu ude ọghaaph ọghaaph phọ ọḅeni nmạriir dị ookpomoghan.

¹⁴ Kụ oniin ạnir dị oghol mọ ạLidia, ọlo aTiatira, dị rabologhi ghan roodor, ạnaghan aani. Ọdi aghueni ghan ni Ẹnaan, kụ Ọmoogh-we phọ aghughuron ologhi ọdi ozuumaam ọnaghan ịpe ạPol ạghaaph bọ.

¹⁵ Kụ owur nyọdi rꞌọto ọdi mụum, kụ ọdi ụḅeni iyoor mọ, “Nyina ẹeḅeghion ephogh mọ mị ameeraam ni Ọmoogh-we phọ, pọ iseseeny, itu eḍigh kꞌạmi ẹrol!” Kụ ạkpaariom ni tụtu yoor ọghi.

Ọlogh bịdi ikoli ẹpe Filipai

¹⁶ Eniin aḍio yoor oten rọki esi ịiḅereghi phọ, kụ oniin ẹbene-ọnyani dị eru eghola uzuan iyoor. Ọdi ạmiin ghan ịmiin kụ agboomi iboom bụrude-otu ọdi.

¹⁷ Kụ ọphon phọ ạdaph ghan Pọl rꞌayoor ạlooghi ghan mọ, “Awe phọ ạbuen phọ, ạrebene Egbogh Ẹnaan phọ, dị riḍeenaan inyina reten ọmoogh ạpeleeny.”

¹⁸ Aḍighi ghan ni ịduon ịminighan aḍughul-otu, kụ ẹeḅaghami Pọl tụtu akiton asoman ạḅeni eru phọ mọ, “Mị ạsighe ḍien phọ ạJizos Kraist rạḅeniom nyịna mọ mite loor ọnyani phọ ạḍua!” Egina amem bịn emite.

¹⁹ Ạburude-otu phọ ọdi ọmiin bọ mọ oḍuom ologhi ạsuo ikpoki phọ ólho mun, usiph ni Pọl rꞌạSailas ọghogh osoorom egbogh erugh ọngo bụo ạrumhu phọ.

²⁰ Kụ mem dị ọsighe bọ bịdi osiemi risigh abuugboom ịiruen phọ ụḅem mọ, “Awe phọ ạbuen phọ ạbuo aJu dị oru rọgbaragbarami ẹmha phọ ayoor.

²¹ Rọtughemi ghan eḍighinom ạraraar dị iyoor ị́kpianaan. Yoor ạbuo aRom kótue ọdaph.”

²² Kụ aḍita awe phọ oḍighan aani oruphiom bịdi. Kụ abuugboom ịiruen phọ ọkporion rụsuoma Pọl rꞌạSailas ọphanyi, kụ ọto mọ ọguroghom bịdi ịkpara.

²³ Rọkuami rọgurogh bịdi, kụ onyuughi ọloghoḍi otu ikoli, ọto ọngo okoriom mọ mọ ạmaar ạkasaghiom bịdi.

²⁴ Rọnaghan bọ ịtooghi phọ ịphen, kụ ạsighe bịdi ạlogh ẹpe osoph ologhi otu ikoli phọ kụ ạloghoḍi bịdi olool.

²⁵ Kụ ogbo aḍughul phọ ạPol rꞌạSailas ọoḅereghi rọmoor sụor kọngo Ẹnaan, kụ ạbueri ạbuo ikoli phọ ọnaghanan ghan.

²⁶ Ekperenom bịn ade phọ edegh, tụtu otu ikoli phọ aphiigha kꞌephighiom mọ, arughuugh phọ eghunyonu, iḍigh oomo awe phọ erunyian.

²⁷ Kụ okoriom mọ asuma ạmiin dị arughuugh phọ meghunyonu, kụ agbiom ghan mọ ạbuo ikoli phọ mosumughu, kụ aruph elhool ẹgham ịlo oghiigha aloor.

²⁸ Kụ ạPol ạlho ạghiom ạnyu mọ, “Kákiigha loor ạna! Oomo phọ ayoor omunughan ni sịen.”

²⁹ Kụ okoriom mọ ạḅem mọ ọsighe ịtozi oru, atiraan aḍigh rapiigha rꞌeepuph, kụ akpuḍian risigh ạPol rꞌạSailas,

³⁰ ạsighe bịdi amitiom kụ apuru mọ, “We phọ, mịna kaḍighi ika kụ ạmoogh pẹleeny?”

³¹ Kụ bịdi mọ, “Meeraam Jịzos Ọmoogh-we phọ, bịn nạ rꞌọto ạna kọmoogh ni pẹleeny.”

³² Kụ bịdi ọghaaph ọghaaph Ọmoogh-we phọ ọḅeni nyọdi, rꞌoomo ạbudi ọrol kꞌọdi.

³³ Ẹega ẹega ḍughul phọ, kụ okoriom mọ aḍighi mụum riisi phọ ọgurogh bọ bịdi, kụ bịdi úpiemi mem owur ọdi rꞌoomo ọto kꞌọdi mụum.

³⁴ Kụ ạsighe bịdi asiom otu ạḅamanaan eḍien, kụ ạmoogh iboom iboh, rꞌoomo phọ kꞌọdi, mọ ạbuno momeeraam Ẹnaan.

³⁵ Rẹḅaal kụ abuugboom ịiruen phọ orom we mọ ọghi omiteghom bịdi.

³⁶ Kụ okoriom mọ ạghaaph ạḅeni Pọl mọ, “Abuugboom ịiruen phọ ọḅem mọ kịwile inyina egheel. Nyịidipho itu emiteghu egheel rꞌedughom!”

³⁷ Kụ ạPol ạḅeni we phọ orelhe bọ dom mọ mọ, “Mụgurogh iyoor esi ogbo, ọloghoḍi ikoli, dị yoor oru ni bụo aRom, kụ bịdi rọwa ghan ịlo omian omitiom ayoor? Ugbi ni, bịdi oru rꞌaloor kụ umiteghom iyoor!”

³⁸ Kụ ạbuo adom mọ oḅula ọghaaph ịphen phọ ọḅeni buugboom ịiruen phọ. Ọnaghan bọ mọ ạPol rꞌạSailas ạbuo aRom ni, kụ eḍigh ruugu esi ạbidi,

³⁹ kụ oru ọoḅereghian. Ororori bịdi omitiom otu ikoli phọ, kụ ọḅeni mọ bịdi ọḍua sịphe ẹmha phọ.

⁴⁰ Romiteghu bọ kụ oḍigh kꞌạLidia, kụ rọmiin bụo ạsiosi phọ rọodereghi, kụ ọḍua.