Iiḍighi 15 - Ạḍinya Iigbia

Ookpomoghan dị asoor Jeruselem

¹ Buniin awe dị ọḍua Judia oru Ạntiok ụtughemi ghan bụo ạsiosi phọ mọ, “Emuton lọ nyina ẹdaph iilogh phọ aMozis eḍuna yogh, pụruku nyina kẹmoogh pẹleeny.”

² Ịtughemi phọ ạbidi ịghagh ni iloghi ạPol rꞌạBanabas kụ ịgbaragbara esoor. Kụ ạbuphe omeeraam bọ Kraist ọlogh Pọl rꞌạBanabas rꞌạbunon sịphe ogbo phọ ạbidi mọ ọghi Jeruselem ọteeny butelhedom mọ rꞌikumoor awe phọ ịlo aḍighiton phọ ạḍien.

³ Kụ ạbuo ạsiosi phọ ororori bịdi osiemi eten. Bịdi ukiton rạmha aFinisia rꞌaSameria ọghaaph ghan oomo phọ ịpe aruuruen phọ mokiton bọ omeeraam. Kụ ịphen phọ ẹngo oboom ọḅaal ologhi oomo ạbuo ạsiosi ẹpe phọ.

⁴ Osi bọ Jeruselem, abutelhedom mọ rꞌikumoor awe phọ rꞌạbueri phọ ạbuo ạsiosi phọ ụsighe ni bịdi. Kụ bịdi ọghaaph oomo ịdi Ẹnaan mẹtuan bịdi eḍighi yogh.

⁵ Kụ buniin ạbuo otul aFarisi dị momeeraam uḅerenu ni kụ ọḅem mọ oḍun ghan ruuruen phọ, kụ ọkpaariom mọ bịdi ooko ghan iilogh phọ aMozis.

⁶ Kụ abutelhedom mọ rꞌikumoor awe phọ ookpomoghan egina esi ịlo ọoḅeghion ọghaaph phọ ọphon.

⁷ Bịdi rọzughan ịminighan, kụ aPita aḅetenu ạḅeni mọ, “Bụo asiya, nyina elegheri ni mọ mebia ni Ẹnaan ịzua bọ ịmi sịen ogbo phọ anyina, mọ mị ụkaaph ooḅi ọghaaph phọ ụḅeni ruuruen phọ, ọbo bịdi ọnaghan kụ omeeraam aani.

⁸ Kụ Ẹnaan phọ ẹpe elegheri bọ oomo ịitughian awe ẹngo aani Uwaloor Iigbia phọ ruuruen phọ ịdipho ọdi ụngo bọ iyira, oḍeenaan mọ ọno ạsighe ni bịdi ạloghoma.

⁹ Kụ ọdi ọ́lhogh ọku ogbo ayira rꞌạbidi, ạtuan omeeraam mọ ạbidi kụ awoph iloghi phọ ạbidi.

¹⁰ Kụ nyịidipho, iḍighi ika kụ nyina rẹdegh bọ Ẹnaan, ịlo ọsighe okuru ịminimiin ọnyaari irum aruuruen phọ momeeraam bọ, ọpo yira rꞌạburude ạburude phọ ayira útue bọ ụnyia?

¹¹ Eeye, yira omeeraam mọ esi ạḍiseph ạJizos Ọmoogh-we phọ kụ ẹdi yira ọmoogh bọ pẹleeny ịdipho ạbidi.”

¹² Kụ oomo aḍita awe phọ oḅoroghian ọnaghan ịpe ạBanabas rꞌạPol rọkaaph bọ ịlo areḍeenaan rꞌịiḍaany phọ Ẹnaan mẹtuan bọ bịdi eḍighi yogh ogbo aruuruen phọ.

¹³ Bịdi rọghaaph rọwile, kụ aJems ạghaaph akureriom mọ, “Bụo asiya, ịnaghanan ịmi!

¹⁴ ASaimon mạghaaph ni ịdi Ẹnaan mẹphur ri eeko ruuruen phọ ẹsaḅar we ogbo ạbidi ọghaaphaan aḍien phọ ọdi.

¹⁵ Kụ ịphen phọ ẹḅophan ni rꞌịpe ariil phọ Ẹnaan ọge bọ mọ,

¹⁶ “‘Ịphen reten, kụ mị atigheel ạḅile kẹn ạlogh otu phọ aDevid mameleghu bọ,

¹⁷ ọbo ạbueri phọ awe phọ osugha bọ ọwa Ọmoogh-we phọ, ḅịle rꞌoomo aruuruen phọ mị mạmagh bọ ạloghoma.

¹⁸ Ịphen kụ ịdi Ọmoogh-we phọ aḍeenaan mọ olegheri kꞌaḍiodiidi.’

¹⁹ “Kụ loor ịphen phọ, ọphon kụ ọnhu ịiruen ạmi, mọ yira kụ́uḅaghami ruuruen phọ rokiton bọ kolegheri Ẹnaan.

²⁰ Ọge ghụn ḍịnya ọghiom mọ bịdi ọgbatanaan ịipuan ạraraar lọ mọkoom ịko ọngo ruru mọ ạregelenya ạnmariir rꞌalephiri ẹmha kúle ghan, mọ kụ́ba ghan ịlo ọphur orum kụ oghiigh, rꞌịlo emughom ịḅaal.

²¹ Kụ ạri mạal li iilogh phọ aMozis rubughotu phọ tọrobo aḍio ophooghian kꞌaḍiodiidi, ọkaaph ikpo ọnhu phọ ọdi ẹmha kịrokiro.”

Ạḍinya dị ọge ọghiom ruuruen phọ momeeraam bọ

²² Kụ abutelhedom mọ rꞌikumoor awe phọ, rꞌoomo ạbuo ạsiosi phọ, omeeraam ọson awe sịphe ogbo phọ ạbidi, lọ kọḅaram Pọl rꞌạBanabas ọki Ạntiok. Kụ ọma Judas Bạsabas rꞌạSailas, ikpolom awe ogbo phọ ạbidi.

²³ Ịduon kụ ịdi ọge bọ ọghiom mọ, “Yoor, abutelhedom mọ rꞌikumoor awe phọ, mipuru inyina aruuruen ạbuo asiya phọ ayoor odi bọ Ạntiok rꞌạSiria rꞌaSilisia.

²⁴ Yoor mọnaghan ni mọ abuniin awe dị yoor kụ́logh, ọḍua ni ogbo ayoor otu rịiḅaghamiom inyina ikpo ọnhu odughiom aruwaloor phọ anyina.

²⁵ Mọtuan ịphen phọ ọḅoph ọnhu omeeraam ọlogh awe oru ọteeny anyina. Bịdi kọdaph Bạnabas rꞌạPol, iiḅi asiya phọ anyina,

²⁶ bụen phọ mophiemi bọ ghuḍum ạbidi ọkuom esi aḍien phọ ạJizos Kraist Ọmoogh-we phọ ayira.

²⁷ Yoor ọlogh Judas rꞌạSailas, bụdi kọtuugh ni igina phọ ịphen phọ kụ ọkaaph ọnhu ạbidi ịḅeni inyina.

²⁸ Uwaloor Iigbia phọ rꞌayoor kụ usoph ịiruen phọ ịphen, mọ kị́leti inyina ḍiboom adool, omuton rạraar phọ ịphen eḍighi bọ ephigh phọ,

²⁹ mọ kéle ghan rạraar lọ ọphighironom ẹkia ọngo ruru, mọ kẹ́ba ghan ịlo emughom ịḅaal rꞌịlo ọphur orum kụ oghiigh, mọ ạregelenya ạnmariir rꞌalephiri ẹmha kúle ghan. Nyina ẹwile yogh ịphen phọ, pọ kịnighenaan ni inyina. Ịmaar ẹrol.”

³⁰ Urorori ni ọḅeniom mọ ẹghi ẹnighe, kụ bịdi ọghi osi Ạntiok, kụ ookpomoghi ḍita awe ạsiosi phọ ọngo ḍịnya phọ.

³¹ Awe phọ rạal bọ ḍịnya phọ, kụ ọmoogh iboh rꞌịidereghi.

³² Kụ aJudas rꞌạSailas, bụphe oḍighi bọ ni riil, ụghaaph ni ịminighan ạraraar ọḅeni bụo ạsiosi phọ, ịlo ọkparamiom rꞌọodereghiom ạbidi.

³³ Kụ mem dị bịdi mọrol ẹnum amem ẹpe phọ, kụ ororori bịdi rꞌedughom kụ oḅula esi ạbuphe orom bọ dom mọ. [

³⁴ Kụ ẹkpianaan ni rꞌạSailas ọrol ịpa.]

³⁵ Kụ ạPol rꞌạBanabas ọrol aani Ạntiok ebianam, kụ rꞌịbadi ạbunon ạbuo asiya phọ ọghaaph ghan ọtughemiom ịlo Ọmoogh-we phọ.

ẠPol rꞌạBanabas ọgbaranaan

³⁶ Ịyal-ikpo aḍughul-otu reten, kụ ạPol ạḅeni Bạnabas mọ, “Ooḅula oomo ạramha phọ ophogh ịlo ạbuo asiya phọ odi, bụphe yira mọghaaph bọ ọghaaph Ọmoogh-we phọ ọḅeni.”

³⁷ Kụ ạBanabas ạwa ni mọ ọpham aani Jọn Mạk.

³⁸ Kụ ạPol ómeera, ịdi eḍighi bọ ạMak ạgbatanaan bịdi ẹpe Pamfilia ọ́rolan ọteeny eekuna oḍighi phọ.

³⁹ Kụ oboom ọokonoghian asoor sịphe ogbo phọ ạbidi kụ ọgbaranaan. ẠBanabas ạpham Mạk aḍighom oghuugh agheel Sạipros.

⁴⁰ Kụ ạPol ạsaḅar Sạilas kụ anyeeniom. Bụo ạsiosi phọ rọḅogh bịdi rọngo ḍịseph Ọmoogh-we phọ,

⁴¹ kụ bịdi okiton Sịria rꞌaSilisia ọkparami ghan bụo ạsiosi phọ.