Iiḍighi 12 - Ạḍinya Iigbia

Ịgbiphoghom mọ rẹbugh

¹ Pọ kụ amem mọ ạHerod ọdaam mọ amiigh bọ ọgbiphoghom abuniin ạbuo ạsiosi phọ,

² ạsighe elhool ẹgham asophom ẹmhu aJems umor phọ ạJon.

³ Kụ ọdi ạmiin bọ mọ ẹḅeeraan ni bụo aJu phọ, ạghi ni asiph Pita. (Ịphen phọ imite mem ẹyaal phọ roliom ghan bọ ạbred phọ ọpo yist rọ́logh ghan bọ.)

⁴ Kụ ọsighe nyọdi ọlogh ikoli, kụ ọḅogh ọngo ḍioph rꞌodiiny aweye ạbuo ẹgham, dị odi inya ạruuku, mọ ophogh ghan nyọdi. Kụ aḍuom ologhi mọ ẹyaal ọphel otene phọ reten, mọ ọno kạsighe Pita ạngo bụo aJu phọ.

⁵ Ịdipho aPita ạrol bọ sịphe otu ikoli phọ, bụo ạsiosi phọ úsoph ghan mem oghol ẹmhu ọdi ọoḅereghi Ẹnaan.

Omitiom Pita ikoli phọ

⁶ Ḍughul phọ ạḍiphe ạHerod ạnya bọ ọsighe aPita omitiom ọngo awe phọ, aPita ạmina ịbaay ịyal ạbuo ẹgham. Ọkasaghiom nyọdi ịyal izime, kụ abukoriom otu ikoli phọ ọmeregha pạ ọnhu-aḍibuo phọ.

⁷ Egina amem bịn ọokpaany Ọmoogh-we phọ ạmeera sịphe, aḍiboom ạḍiḅaal esoor pạ osoph phọ, kụ aphum ọpha aPita ạsumeeny, kụ ạḅeni mọ, “Nụun aḅetenu!” Bịn izime phọ ẹghororo emeel.

⁸ Kụ ọokpaany phọ ạḅeni nyọdi mọ, “Kpạramian ukpe ạna, ạlogha rokoro ạna!” Kụ ọdi ạtuugh ịduon phọ aḍighi. Kụ ọokpaany phọ ạḅeni nyọdi mọ, “Nyora ạsuoma phọ ạna, ụdaph ịmi!”

⁹ Kụ aPita amite ạdaph, kụ ólhegheri mọ ịpe phọ ọokpaany phọ raḍighi bọ agey ni, agbiom ghan mọ ọno rạmiin uḍien.

¹⁰ Kụ bịdi rotenom ọḅel ọnhu-aḍibuo phọ rꞌọdi atum sịphe, kụ oru osi nyọpo arukuron phọ asoman bọ ẹmha phọ. Kụ ogina ọdi bịn aghughuronu ni, kụ bịdi omite okiton osoor oniin oḅodo. Egina amem bịn ọokpaany phọ ạgbatanaan nyọdi ạḍua.

¹¹ Kụ mem dị aPita aloghoma bọ loor ọdi, ạḅem ni mọ, “Pụruku mị mạkar alegheri mọ Ọmoogh-we phọ kụ arom ọokpaany phọ ọdi mọ ụphel ịmi ạsighe ḍịghaagh ạHerod, rꞌoomo phọ ịpe ạbuo aJu phọ ogbiighiom bọ.”

¹² Ọdi rọotughian bọ rolegheri, kụ ạghi kꞌaMeri, onhiin ạJon Mạk, dị ạbuminighan awe ookpomoghan rọoḅereghi ghan Ẹnaan.

¹³ Kụ ọdi akar eghuugh eḍighom mọ, kụ esina ọnyani dị oghol mọ aRoda aru omegheron.

¹⁴ Kụ rọlogh elegh mọ ẹḍogh aPita, bịn óghughuron eghuugh phọ loor iboh, kụ aghiil aḅula ạḅem mọ aPita ạmeera ni sịphe ọnhu-aḍibuo phọ.

¹⁵ Kụ bịdi mọ, “Nạ raḍigh ịnon!” Kụ ọnyani phọ ạkpaariom ni mọ agey ni. Kụ bịdi mọ, “Ọokpaany ọdi.”

¹⁶ APita ósoph mem ookpo phọ. Kụ bịdi okughuron ọmiin nyọdi, kụ ẹpherogh bịdi.

¹⁷ Kụ ọdi ạabo mọ bịdi oḅoroghian, kụ ạghaaph ịpe Ọmoogh-we phọ ạsighe bọ nyọdi amitiom pạ otu ikoli phọ ạḅeni bịdi. Kụ ọdi ạḅem mọ, “Ịkaaph ịphen phọ ẹḅeni Jems rꞌạbueri ạbuo ạsiosi phọ!” Kụ ọdi ạḍua agheel ẹnon ekpisi.

¹⁸ Ẹḅaal bọ, oboom ọgbaragbara ạrol li ogbo ạbuo ẹgham mọ, mọ uḍighi ika Pita.

¹⁹ Kụ ạHerod ạwa ạwa nyọdi ọ́miin, kụ apuru yogh bukoriom mọ, kụ ạto mọ ọze bịdi. Kụ ạHerod ạḍua Judia agheel Sizaria, kụ ạrol.

Aḍuugh phọ ạHerod

²⁰ Kụ ọdi ạmoogh ni oboom ọghagh ologhi esi ạbuo aTaya rꞌaSaidon, kụ bịdi ọḅoph ọnhu kụ oru ọmiin ọdi. Kụ ọphur ọsighe rịghiri Blạstos opoghom ogiga phọ, kụ ogbi ọwa ạmuḅoph esi ọdaam mọ, ịdi eḍighi bọ eelhe phọ ọdi kụ retuom ghan rạmha phọ ạbidi eḍien.

²¹ Kụ ogu ḍio dị ạHerod aanmenan ịlo ạraalha, kụ ạrolom ạgada ọdaam ẹmha phọ ạghaaph rạraar ạḅeni bịdi.

²² Kụ awe phọ ọyughuron mọ, “Kẹ́ḍogh oye, ẹḍogh Ẹnaan!”

²³ Egina amem bịn ọokpaany Ọmoogh-we phọ asuom nyọdi ẹzegh, ịdi eḍighi bọ ọdi mạarom Ẹnaan eghuan, kụ ịbam ikpo eḍigh nyọdi, bịn amugh.

²⁴ Kụ ọghaaph phọ Ẹnaan aphoph aaleghaan.

²⁵ Kụ ạBanabas rꞌạSol roḍighi dom mọ rọmadan, kụ ọpham Jọn Mạk ẹpe Jeruselem orighelom Ạntiok.