Iiḍighi 11 - Ạḍinya Iigbia

APita ạkaaph ịdi oḍighi phọ rạki ạḅeni bụo ạsiosi phọ aJeruselem

¹ Abutelhedom mọ rꞌạbuo ạsiosi eelhe aJudia ụnaghan ni mọ aruuruen phọ momeeraam aani ọghaaph phọ Ẹnaan.

² APita aḅula Jeruselem, bịn ạbuo aJu phọ ạbuphe ọkpaariom bọ mọ oḍunogh ghan ruuruen phọ, oḍighi nyọdi ḍighiton mọ,

³ “Nạ mạghi iiruen kꞌaruuruen phọ úḍuna yogh bọ, ạḅophoghan rꞌạbidi alian eḍien.”

⁴ Kụ aPita ạmaar ạghaaph ịpe emite bọ ẹkpigh etum ẹkpigh ạḅeni bịdi mọ:

⁵ “Mị ụrol ẹpe Jọpa rạaḅereghi ghan, kụ mị ạmiin ikon dị ọkpooghi kꞌạke inya aruukuna ịyaar dị ẹghigh oboom oopa ukpe ọkpaaghi kꞌạke, ruseeriom ịmi.

⁶ Mị aphogh akananaam kụ ạmiin ịnam inya asike ịsien aḅirini phọ, rꞌilhom ịnam rꞌịpe rekuura bọ, rꞌịnun okuaḍio phọ.

⁷ Kụ mị ạnaghan ẹḍogh dị ịḅeni ịmi mọ, ‘Pita, ḅetenu! Kiigh ạa!’

⁸ Kụ mị ạphagharanaan mọ, ‘Ọmoogh-we, kị́duon. Ịyaar lọ eḍighi iigbia mꞌạḅaphanya ọnhu ạmi kꞌekulha íḍigh.’

⁹ Kụ ẹḍogh phọ ẹḅile kẹn ẹḍua kꞌạke ịḅeni ịmi emuneniom ịyal amem mọ, ‘Ẹlo Ẹnaan mẹḅaalami, kákol ghan mun mọ ạḅaphanya!’

¹⁰ Kụ emite ịduon phọ ịraar amem, kụ ọkpaaghi oomo phọ ịdi oḅulemi kꞌạke.

¹¹ Ọkaraghi amem mọ ạmuen phọ kụ ẹdi ịraar awe, dị orom ẹpe Sizaria mọ oru ụmagh ịmi, ọmeregha pạ ọnhu-aḍibuo otu phọ mị ạrol bọ.

¹² Kụ Uwaloor Iigbia phọ ụḅeni ịmi mọ, ‘Dạph ạghi, kạ́moogh iikia!’ Kụ odiiny ạbuo asiya phọ ayira ạbuen ụdaph aani ni ịmi ọghi osi kꞌoye phọ.

¹³ Kụ ọdi ụḅeni iyoor ịdi ọdi ạmiin ọokpaany dị ạmeera kꞌọdi kụ ạḅeni mọ, ‘Tom ọghi Jọpa ọmagh Saimon phọ ọpo ọta bọ mọ Pita phọ!

¹⁴ Ọdi kạkaaph ni ọghaaph ạḅeni nyịna, ịdi nạ rꞌọto ạna kọmoogh pẹleeny.’

¹⁵ Kụ mị ramiigh ọghaaph phọ, bịn Uwaloor Iigbia phọ asoorom bịdi, ịdipho usoorom bọ iyira ẹḅel egbiom mọ.

¹⁶ Kụ mị ạatughian ịdipho Ọmoogh-we phọ ạḅem bọ mọ, ‘ẠJon ạsighe mụum kụ awuroghom we, kụ nyiidiphọ, kiwurom inyina Uwaloor Iigbia phọ.’

¹⁷ Ịdipho Ẹnaan mẹngo aani bọ ọdo inmo phọ ịpe ọdi unmoom bọ iyira, mem mọ yira omeeraam bọ Jịzos Kraist Ọmoogh-we phọ, mịna ạnhian dị kakikima bọ Ẹnaan?”

¹⁸ Bịdi ọnaghan bọ ịphen phọ, ịyaar ụ́ḅem, uboom ni Ẹnaan kụ ọḅem mọ, “Ịduon phọ pọ Ẹnaan memeera mọ aruuruen phọ okiton esi ịkaraph phọ ạbidi ọmoogh aani ghuḍum.”

Ịbadi awe omeeraam aani ẹpe Ạntiok

¹⁹ Bụphe ọtuan bọ ịpe ọgbiphoghom bọ Stivin ọwalala, usumughu ni ogheleghu ịikela arikpisi ẹpe Finisia, rꞌạSaipros, rꞌẠntiok, kụ ọghaaph ghan ọghaaph phọ Ẹnaan ọḅeni bụo aJu phọ bịninin.

²⁰ Kụ mem dị buniin ạbuo ạSaipros rꞌaSairini oru bọ osi Ạntiok, ụghaaph ni ooḅi ọghaaph ịlo ạJizos Ọmoogh-we phọ ọḅeni aani ruuruen phọ.

²¹ Kụ ịikpo Ọmoogh-we phọ ịrolan ni rꞌạbidi, kụ ịbadi omeeraam kụ okiton ọdaph Ọmoogh-we phọ.

²² Kụ ịpe emitenaan bọ ruuruen phọ, ọdu aḍigh rụru ạbuo ạsiosi phọ aJeruselem, kụ bịdi ọlogh Bạnabas mọ ạghi Ạntiok.

²³ Mem dị ọdi asi bọ ạmiin ḍịseph Ẹnaan phọ, ọdi abo ni kụ ạlom oomo phọ ạbidi mọ ọsighe iloghi phọ ạbidi ọkpasaghiom Ọmoogh-we phọ.

²⁴ ẠBanabas phọ ogey oye ni, dị Uwaloor Iigbia phọ rꞌomeeraam emuza loor, kụ upumom ni ịbadi aweye ḍita ạbuphe momeeraam bọ Ọmoogh-we phọ.

²⁵ Kụ ạBanabas ạḍua ạghi Tạsos ọwa ạSol.

²⁶ Rọmiin bọ, kụ ạpham nyọdi aḅulolom Ạntiok. Kụ ịyal phọ ạbidi ọḅophoghan ọrolan rꞌạbuo ạsiosi phọ ḍiniin ạlha, ọtughemi ịminighan awe. Ạntiok kụ ẹḅel ekpisi phọ oghol bọ bụmatuan phọ mọ aKristen.

²⁷ Riiḍio phọ ịpe, buniin ariil ịmiin ụḍua ni Jeruselem ọghi Ạntiok.

²⁸ Kụ oniin ọnyo ạbidi dị oghol mọ Ạgabos aḅetenu ạmeera ạsighe ịikpo Uwaloor Iigbia phọ kụ ạmiinom ịmiin mọ ilhom ịgbakuro kẹtol li oomo aḅirini phọ. (Ịphen phọ imite ni ọrugh ạKlodios.)

²⁹ Kụ ạbumatuan phọ oguanaan mọ tọrobo ọnyo ạbuno kasogh ghan ni ọnhu ikpoki lọ ạḍighaagh ọdi ẹman ọkiomonaan bụo ạsiosi phọ aJudia.

³⁰ Bịdi ụtuugh ni ịphen phọ oḍighi, kụ ạBanabas rꞌạSol ọsighe ọghiomonaan ikumoor awe ạsiosi phọ.