Iiḍighi 1 - Ạḍinya Iigbia

¹ Ooḅi ạTiofilos, pạ ạḍiḅel ạḍinya phọ ạmi, mị ụge ni oomo phọ ịpe ạJizos aḍighi bọ, ạḅile bọ ạtughemi kꞌemiighom oḍighi phọ ọdi,

² tụtu ẹteeny bọ ḍio phọ ạḍiphe ọsighe bọ nyọdi ogheelom kꞌạke. Kụ kọsighe bọ nyọdi, esi ịikpo Uwaloor Iigbia phọ kụ ọdi ạtooghi ịdi koḍighi ghan ạḅeni butelhedom mọ ọdi ạsaḅar bọ.

³ Ọdi amugh bọ esi inyadi aḍughul-otu, ọdi amite ghan ni egaan aḍeenaan loor ọdi bịdi ịbadi areten dị iikia ị́tol, mọ ọno odi ni. Bịdi ụmiinan ghan ni, kụ ọdi ạtughemi ghan ịlo ọmar phọ kꞌẸnaan.

⁴ Mem dị ọdi ạrolan rꞌạbidi, kụ ạto ạḅeni mọ bịdi kụ́ḍua Jeruselem, mọ ọrol okori ịpe Ọde phọ ọno aguanaan bọ, ịdipho bịdi mọnaghan bọ ni dị ọno ạghaaph.

⁵ Mọ ạJon, ịdipho bịdi olegheri bọ ni, ạsighe ghan mụum kụ awuroghom we, kụ mọ esi asuḍughul-otu dị ị́kel, kọsighe Uwaloor Iigbia phọ kụ iwuroghom inyina.

Ọsighe Jịzos okeelom kꞌạke

⁶ Kụ mem dị abutelhedom mọ ookpomoghan esi, bịdi upuru ni Jịzos mọ, “Ọmoogh-we, mẹteeny dị nạ kạtagharan Ịzirel lọ kọḅile opogha aani loor ḍụghum?”

⁷ Kụ ọdi ạphagharanaan mọ, “Ílo esi anyina olegheri amem rꞌariiḍio phọ ịpe Ọde phọ ạsighe bọ ịikpo phọ ọdi bịn kụ aguom.

⁸ Kịngo ni inyina ịikpo mem dị Uwaloor Iigbia phọ misoorom inyina, kụ nyina ịgbaanaan ịmi, emiigh Jeruselem rꞌoomo phọ aJudia rꞌaSameria, kụ esiemi eekuna aḅirini phọ.”

⁹ Ọdi rọghaaph ịphen phọ, kụ bịdi odi ni ropogh, bịn ọsighe nyọdi rokeelom kꞌạke, kụ ọotu aakpereghiom nyọdi ịdi bịdi nyọdi ụ́miin mun.

¹⁰ Kụ ịdipho ọdi rakeel bọ, bịdi uphogh ni okuaḍio phọ okananaam, kụ egina amem bịn ịyal awe dị ọkpologhian ịphalaḅaal, ọmeera ịigaany ạbidi,

¹¹ kụ ọḅem mọ, “Weye aGalili, nyina ịtuan eeghe kụ ẹmeregha bọ sịen repogh ghan ẹpe okuaḍio phọ? ẠJizos phọ ọphon ạar bọ inyina rokeelom kꞌạke phọ, kạḅile ni ạtuugh ịduon nyina rẹmiin bọ kụ atu.”

Ọnon oye ạsighe dọl phọ ạḍiphe aJudas ạwile bọ

^12-13 Kụ abutelhedom mọ, aPita, rꞌạJon, rꞌaJems, rꞌẠndru, rꞌaFilip, rꞌạTomos, rꞌaBatolomiu, rꞌaMatiu, rꞌaJems ọony Ạlfios, rꞌaSaimon Zelotis, rꞌaJudas ọony aJems, ọḍua pạ Eegum Ọlivs eḍighi bọ otobi oḅula Jeruselem. Bịdi ọki osi, kụ ogheel pạ osoph phọ ọpo bịdi ọrol ghan bọ sịphe ẹedaneen otu ạnyu phọ.

¹⁴ Bịdi rꞌạnmariir phọ rꞌaMeri onhiin ạJizos, rꞌabumor phọ ạJizos — oomo phọ ạbidi ọḅoph iloghi kụ ọkuom siloor ạbidi esi ịiḅereghi.

¹⁵ Amem mọ ạmuen phọ kụ ẹdi aPita ạmeera ogbo ookpomoghan ạbuphe omeeraam bọ, dị ọghiom ni oniin okuron rꞌịyaldi,

¹⁶ kụ ạghaaph mọ, “Bụo asiya, Uwaloor Iigbia phọ ạḅeni ni Devid mọ ạghaaph ịlo aJudas, ọpo aḍiemiom bọ bụphe osiph bọ Jịzos. Ịkpianaan ni dị ịmiin ạḍinya iigbia phọ ịpe kẹtuugh emite.

¹⁷ Ụloghom aani nyọdi iyira mọ ạmoogh bin sịen oḍighi phọ ọphon.”

¹⁸ (Oye phọ ọphon ạsighe ni ikpoki phọ aal bọ Jịzos aghoom ekulha ade, kụ ropekele romeel, bịn aruphaan kụ ịla ọkuruḅaka emiteghu.

¹⁹ Kụ oomo ạbuo aJeruselem ulegheri ni ịphen phọ, kụ bịdi oghol esi phọ ọnhu ẹmha ạbidi mọ, “Akeldama”, ịduon phọ pọ “Ade ịḅaal”.)

²⁰ “Ọge ni pạ ạḍinya Ạsuor phọ mọ, “‘Amarugh phọ ọdi aḍighi ni ọkpagha! Ẹesuna kị́tol dị ketugh kꞌọdi,’ “ḅịle mọ, “‘Ọnon oye ạsighe ni dọl phọ ọdi!’”

^21-22 Kụ aPita ạḅem mọ, “Esi ịphen phọ, ẹnighe ni dị yira kophogh oniin oye sịen ogbo phọ ayira ọghaaph aani ịlo oḅetenu esi aḍuugh phọ ạJizos. Oye phọ kaḍighi nyoniin ọnyo ạbuphe morelhian ghan bọ rꞌạJizos Ọmoogh-we phọ, emiigh kꞌamem mọ ạJon awurogh ghan bọ we mụum mọ, kụ ẹteeny kꞌaḍio phọ ạar bọ iyira Jịzos ogheelom kꞌạke.”

²³ Kụ omitiom ịyal awe, Mạtias rꞌạJosef, ọpo oghol bọ mọ ạBasabas, aḍien ugheel ọdi ạJostos.

²⁴ Kụ bịdi ọoḅereghi kụ ọḅem mọ, “Nạ Ọmoogh-we dị alegheri iloghi oomo aweye. Uḍeenaan iyoor sịen ịyal awe phọ ạbuen ọlo nạ mạsaḅar

²⁵ lọ kạsighe dọl phọ ạḍiphe aJudas ạwile bọ aḍighi aani oḍighi otelhedom, sịen dị aJudas mạghi ọrol ạdol ịminimiin phọ ạḍiphe oseenaan bọ nyọdi.”

²⁶ Kụ bịdi ọsa ẹlhel, kụ ẹlhel phọ emeelom Mạtias, kụ ọsighe nyọdi ogbiom omuneniom ḍioph rꞌoniin abutelhedom mọ.