Igbiighi 9 - Ạḍinya Iigbia

Ẹyaal ọphel otene phọ dị emuneniom ịyal

¹ Ọḅel ụnwanyu omuneniom ịyal ạlha dị bịdi mọḍua bọ ẹpe eelhe phọ Ijipt, Ọmoogh-we phọ ạghaaph ạḅeni Mozis ẹpe ẹdala phọ aSainai mọ,

² “Awe phọ Ịzirel ole ghan ni ẹyaal ọphel otene phọ mem lọ ẹteeny mem mọ ọdi.

³ Ḍioph rꞌinya aḍughul-otu ụnwanyu phọ ọphon, mem adulhe, ịtuugh ghan mem mọ ạmuphe ọma bọ ẹdaph oomo eḍighinom ạraraar phọ ịpe ọdi. Oomo ịpe roḍighi ghan bọ kụ ịdi nyina keḍighi ghan.”

⁴ Kụ aMozis ạghaaph ạḅeni we phọ Ịzirel mọ bịdi ọphamanam ooko ghan ẹyaal orelhe oten phọ.

⁵ Kụ bịdi ọphamanam ḍioph rꞌinya aḍughul-otu ọḅel ụnwanyu ạlha phọ, mọ aḍio phọ ọpo aḍio ẹyaal ọphel otene phọ, mem adulhe, ẹpe Ẹdala aSainai. Oomo phọ ịpe Ọmoogh-we phọ ạto bọ ạḅeni Mozis kụ ịdi awe phọ Ịzirel ọtuugh ghan kụ oḍighi.

⁶ Kụ ọlo buniin awe ụrol li dị ọopuan siloor ạbidi loor oye dị amugh, kụ úuko aani ḍio ẹyaal ọphel otene phọ, kụ bịdi ọghi ọteeny Mozis rꞌEeron ḍio phọ ạḍiphe,

⁷ kụ ọḅem mọ, “Yoor ụupuan siloor ayoor ọoḅoghogh oye dị amugh, kụ esi ika kụ ẹdi úmeera bọ mọ yoor oḍighom ọdaph we phọ ọphighironaan ẹkia phọ Ọmoogh-we phọ ḍio phọ ẹyaal?”

⁸ AMozis ạḅeni bịdi mọ, “Ịmeera ẹpe, mị ụnaghan ọdo ịlo Ọmoogh-we phọ kịḅeni ịmi, ọdo ologh lọ ạgbagham ịlo anyina.”

⁹ Ọmoogh-we phọ ạḅeni Mozis mọ ạḅeni we phọ Ịzirel mọ,

¹⁰ “Eru mạar dị tọrobo ọnyo anyina mꞌọlo ịsiphe kꞌanyina kụ ạapuan loor, ọoḅoghogh oye lọ amugh; kẹn, tọrobo ọnyo anyina lọ ạghi erelhe ekpisi lọ ẹkel, pọ ọdi aako ni ḍio ẹyaal ọphel otene phọ ạngo Ọmoogh-we phọ oḍiman ụnwanyu.

¹¹ Omuneniom ḍioph rꞌinya aḍio ụnwanyu phọ ọpo dulhe, bịdi ooko ni. Bịdi ole ni ạbred lọ yist ụ́logh rꞌịikiripha lọ rekiḍim.

¹² Bịdi kúsugheeny ẹmina ẹḅaal, ḅịle kẹn, kụ́taal ịḅarara phọ úḅomoghi. Bịdi ọdaph ni oomo ịpe ẹyaal ọphel otene phọ ooko.

¹³ Oye dị ạḅaal li, kẹn erelhe ụ́ki kụ ạwile ḍio phọ ẹyaal phọ óoko, pọ itoph nyọdi ogbeph, emutonaan nyọdi, ịdi eḍighi bọ ọdi ọ́phighironaan ẹkia phọ Ọmoogh-we phọ mem mọ ẹkpianaan bọ, pọ ịkaraph ọdi ẹmhu ọdi.

¹⁴ “Eru mạar dị ooruen lọ arughan rꞌanyina, kụ kaako aani ẹyaal ọphel otene phọ rꞌiilogh ẹyaal phọ, pọ ọdi ạdaph eḍighinom mọ kụ aḍighi. Oniin phọ ologh phọ ọpo odianaan bọ ọlo ọmar sịphe ẹmha phọ, odianaan ni rꞌooruen lọ arugh sịphe ẹmha phọ.”

Ọotu ạnian

¹⁵ Ḍio phọ ạḍiphe ophighi bọ Ogbogo Ạdol Ọmoogh-we phọ, ọotu aakpereghiom ni Ogbogo phọ, kụ dulhe ạnyu Ogbogo phọ rạtol ghan dịadi ạnian tụtu ẹḅaal ḍịroor.

¹⁶ Ịdipho kụ ịdi rẹtol ghan oomo aḍio ọotu phọ raakpereghiom ghan ootaany, dulhe ạnian emite.

¹⁷ Tọrobo amem dị ọsighe ọotu phọ sịphe Ogbogo phọ, bịn awe phọ Ịzirel moḅetenu erelhe, kụ tọrobo esi dị ọotu phọ aakpomoghan, pọ awe phọ Ịzirel kọtol sịphe phọ.

¹⁸ Awe Ịzirel rọdaph ghan iilogh phọ ịpe Ọmoogh-we phọ ạḅeni bọ bịdi kọtuugh orelhe, kẹn, ạḅeni bịdi mọ itugh sịen bịn bịdi mọdaph iilogh phọ Ọmoogh-we phọ otugh esi phọ, kụ ọnhu ariiḍio phọ ịpe ọotu phọ kạtol bọ ạnyu Ogbogo phọ, pọ bịdi kọtol li sịphe arugbogo phọ ạbidi.

¹⁹ Mem lọ ọotu phọ ạrol sịphe ạnyu Ogbogo phọ kụ ebia, pọ awe Ịzirel kooko ni iilogh phọ Ọmoogh-we phọ bịn esi rọ́ki.

²⁰ Kụ eeni amem ọotu phọ rạtol ghan ạnyu Ogbogo phọ ẹphurukpu asuḍughul-otu, kụ bịdi ọdaph ịpe Ọmoogh-we phọ ạḅeni bọ bịdi bịn ọtol sịphe arugbogo phọ, bịdi ụdaph ghan ịtooghi phọ Ọmoogh-we phọ kụ oḅetenu erelhe.

²¹ Eeni aḍio ọotu phọ kạtol dulhe bịn rẹḅaal bịn mạḍua, kụ tọro amem lọ ọsighe ọotu phọ, ḍịroor bịn bịdi momiigh erelhe. Kụ eru mạar dị ạrol ḍiniin aḍio kụ ọsighe ọotu phọ bịn bịdi moḅetenu erelhe.

²² Mꞌịyal aḍughul-otu, mꞌụnwanyu, mꞌạlha, mꞌạrol li abia apu pạ dị ọotu phọ odi ni sịphe ạnyu Ogbogo phọ, pọ awe phọ Ịzirel kọtol li sịphe arugbogo phọ ạbidi esi rọ́ki, kụ tọro amem lọ rọsighe bịn bịdi momiigh erelhe.

²³ Bịdi ụdaph ghan iilogh phọ Ọmoogh-we phọ kụ odoghoḍi rugbogo, ọdaph ghan iilogh phọ Ọmoogh-we phọ kụ oḅetenu erelhe; bịdi uuko ghan ịtooghi phọ ịpe Ọmoogh-we phọ ạḅeni Mozis mọ ạḅeni bịdi.