Igbiighi 6 - Ạḍinya Iigbia

Ịtooghi ịlo awe dị oghiran ịyo rꞌỌmoogh-we phọ

¹ Ọmoogh-we phọ ạto ạḅeni Mozis mọ,

² “Ḅẹni we phọ Ịzirel mọ mem lọ oye, mꞌạnir mꞌolephiri, aguan oguan rꞌawe dị oghiran ịyo rꞌỌmoogh-we phọ, ạgbatanaan ạḅogh loor phọ ọdi ạngo Ọmoogh-we phọ,

³ pọ ọdi ạwile ọphughol amiim. Tọrobo amiim, mụghumo amugbagara mꞌạmuo ịya, ọdi kụ́pughol; grep, mụghumo omoom mꞌọgharaghar, kúle.

⁴ Oomo asuḍughul-otu ịpe ọdi mạgbatanaan bọ, ọdi ḍịo ọdi gem, ọdi kúle tọrobo ịyaar lọ ẹḍua loor oozin agrep ghạlamo ikpo phọ mꞌoopho oreeny phọ.

⁵ “Oomo asuḍughul-otu phọ ịpe ọdi aguanaan bọ ạgbatanaan bọ ọrol ḍịo ọdi gem, ẹmhu ọdi kúkula. Tụtu ariiḍio phọ dị aguanaan bọ oḍighom Ọmoogh-we phọ emunughan, ọdi ạrol dọl iigbia, ạwile sịlaal ẹmhu ọdi eḍu.

⁶ Oomo asuḍughul-otu phọ ịpe ọdi mạgbatanaan bọ odi gem aḍighom Ọmoogh-we phọ, ọdi kụ́ki esi lọ oye amugh.

⁷ Mꞌọde ọdi mꞌonhiin ọdi mꞌumor ọdi mꞌumarani ọdi kụ amugh, pọ ọdi kụ́ki ụ́upuan loor ọdi, ịdi eḍighi bọ ọgbatanaan phọ ọdi oḍighom Ọmoogh-we phọ ọdi ẹmhu ọdi.

⁸ Oomo asuḍughul-otu phọ ịpe ọdi mạgbatanaan bọ aḍighom Ọmoogh-we phọ, pọ ọdi ạrol dọl iigbia.

⁹ “Eru mạar dị oye dị atuman nyọdi kụ amugh ḍuugh ekperenom, kụ ọdi ạapu iikunya phọ ọdi ịpe ọdi aseere bọ dọl iigbia phọ, pọ ọdi aghula ẹmhu phọ ọdi ḍio phọ ạḍiphe ọdi raselemian bọ loor phọ ọdi. Ḍio dị mẹman oḍual aḍughul-otu, ọdi aghula ẹmhu ọdi.

¹⁰ Kụ rẹman ọphaanya aḍughul-otu, ọdi ạsighe ịyal aruukumude mꞌịyal arukuru-ghọzo, ạsighe ạghi ạngo oyil ạrikia phọ sịphe ọnhu-aḍibuo Ogbogo Ạdol Ọmoogh-we phọ.

¹¹ Oyil ạrikia phọ ạsighe nyoniin ạphighironom ẹkia ịkaraph, kụ ạsighe nyọori phọ ạphighironom ẹkia oguom ạnian, kụ awoph nyọdi ạsighe esi ọpioman phọ ọdi ạpioman bọ loor esi otuman oye phọ amugh bọ, kụ ạḅile amiigh ogbi iigbia ẹmhu phọ ọdi.

¹² Kụ ọdi aakuan ạmaar ạphama loor ọdi suḍughul-otu phọ ịpe ọdi mạgbatanaan bọ aḍighom Ọmoogh-we phọ. Ọdi ạsighe odughuna lọ mạman ḍiniin ạlha lọ kọ̋opuan loor, ạsighe ạphighironom ẹkia ọpioman oḍighi ipeel. Kúgbiom mun suḍughul-otu phọ ịpe eten bọ, ịdi eḍighi bọ ọdi mạapuan loor ọdi.

¹³ “Ọphon phọ ologh awe dị oghiran ịyo rꞌỌmoogh-we phọ: mem dị asuḍughul-otu iigbia phọ ọdi memunughan, ịsighe nyọdi ẹghi sịphe ọnhu-aḍibuo Ogbogo phọ.

¹⁴ Ọdi ạpham rạraar ẹkia phọ ọdi, ạsighe aru ạngo Ọmoogh-we phọ: oniin odughuna lọ mạman ḍiniin ạlha lọ loor kọ̋opuan, ọlo ẹkia oguom ạnian; oniin ọya ọony oyool-ọga lọ mạman ḍiniin ạlha lọ loor kọ̋opuan, ọlo ẹkia ịyaar aghuḍum ịkaraph; oniin odughuna lọ loor kọ̋opuan, ọlo ẹkia ịyaar aghuḍum ẹboroph;

¹⁵ ạbred lọ yist ụ́logh dị amuza egunum, iḍikiri iiḅoghoḍi igeny ịgbieneen ịbiakpa dị okironom mụnum; ipoḍi ạkikia lọ okironom mụnum, rꞌikpo ilieneen iimuma rꞌamiim ịlo oḍighinom ịyaar aghuḍum amalhe rꞌịpughol.

¹⁶ “Oyil ạrikia phọ ạsighe rạraar phọ ịphen phọ ạngo Ọmoogh-we phọ, kụ ạphighironom ẹkia ịkaraph rꞌịyaar aghuḍum oguom ạnian phọ.

¹⁷ Kụ ọdi ạsighe odughuna phọ ạphighironom ẹkia ẹboroph ạngo Ọmoogh-we phọ, ạḅaram egunum ạbred phọ yist ụ́logh bọ. Oyil ạrikia phọ ạḅile ạsighe ilieneen iimuma phọ rꞌamiim mọ ạphighironom ẹkia amalhe phọ rꞌịpughol.

¹⁸ Tọro ọlo aghiran ịyo rꞌỌmoogh-we phọ aghula ẹmhu ọdi sịphe ọnhu-aḍibuo Ogbogo phọ, kụ aakpomoghi sịlaal phọ ọdi ạghi asumeeny ologhi ạnian ẹkia ẹboroph phọ.

¹⁹ “Oyil ạrikia phọ ạsighe ḍiphe odughuna phọ dị mọsa, ạghi sịphe egunum mọ ạsighe eniin eḍikiri eeḅoghoḍi, rꞌoniin opoḍi ạkikia dị yist ụ́logh, kụ ạsighe rạraar phọ ịphen phọ ạlogh rạghaagh ọnyo ạNazerait phọ, dị maghula sịlaal ẹmhu phọ ọdi aseerian bọ.

²⁰ Oyil ạrikia phọ kạlel ịinua phọ egbodo Ọmoogh-we phọ eḍighi ẹekia ẹkia. Ịko phọ ịphen eḍighi ni iigbia, kụ ịlo oyil ạrikia phọ, ọḅaram ẹmi phọ rꞌọgbo phọ ịpe ọlhel bọ. Roḍighi ịphen phọ rọmadan kụ ọlo maghiran ịyo rꞌỌmoogh-we phọ agbi ọphughol amiim.

²¹ “Ịphen phọ ịtooghi dị ọngo we dị moghiran ịyo rꞌỌmoogh-we phọ. Eru mạar dị aguanaan opeeleny oguan, bịdi ọmoogh ọtuugh oḍighi ịpe bịdi oguanaan bọ.”

Ịdi ariil ạrikia phọ kọngo ghan ọghor

²² Ọmoogh-we phọ ạḅeni Mozis mọ

²³ ạḅeni Eeron rꞌạnmuny phọ ọdi mọ, “Ịduon kụ ịdi nyina kẹseph ghan we phọ Ịzirel. Nyina kẹḅeni ghan bịdi ịduon:

²⁴ “‘Ọmoogh-we phọ ịseph inyina, ạmaar iphogh inyina.

²⁵ Ọmoogh-we phọ aḍighi ịdi ạḍiḅaal kꞌaghisigh phọ ọdi ẹmhu isoorom inyina. Ạghusan phọ ọdi ịrolonaan inyina.

²⁶ Ọmoogh-we phọ iphoghom inyina ọnma ighirigiir kụ ịngo inyina ẹepho.’”

²⁷ Kụ Ọmoogh-we phọ ạḅile ạḅem mọ, “Bịdi ọsighe ḍien phọ ạmi ọḅogh ọngo we phọ Ịzirel ịduon phọ, mị kạseph ni bịdi.”