Igbiighi 5 - Ạḍinya Iigbia

Awe dị ụ́ḅaal

¹ Ọmoogh-we phọ ạḅeni Mozis mọ,

² “Lọgh ologh ạngo we phọ Ịzirel ạḅeni bịdi mọ ophorogh oomo ạbulo ẹzegh ọku ufe eḍighi rꞌạbulo ọghi ẹmha ạnmariir rꞌạbulo mọoḅoghogh oye lọ amugh, ọḍuaghu sịphe arugbogo phọ.

³ Mꞌạnir mꞌolephiri, bịdi ọḍuaghu sịphe asimarugh phọ ọbo bịdi kọopu ghan bọ rugbogo phọ, sịphe ogbo phọ anyina mị arugh aani bọ.”

⁴ Kụ awe phọ Ịzirel ọtuugh ịdipho ọḅeni bọ bịdi oḍighi, kụ ophorogh bụphe rọopu ghan bọ rugbogo phọ ọsighiogh.

Ịikpia ịkaraph dị oḍighi

⁵ Ọmoogh-we phọ ạḅeni Mozis mọ,

⁶ “Oye lọ aḍighi ịkaraph phọ ịpe awe roḍighi ghan bọ ni, mꞌạnir mꞌolephiri, kụ atenom ọku esi Ọmoogh-we phọ, pọ erugh epum oye phọ ọpo.

⁷ Pọ ọdi ạgba ịkaraph phọ ọdi aḍighi bọ amitiom, kụ ạtuugh ạakodi, ạkpeeghi ịpe ọdi aloghoma bọ mọ ọno ạpioman ni, ọdi ạlogh ọḅar oogh abin esi ạraraar phọ ịpe ọdi rạkpeeghi bọ, ạkpe ạngo oye phọ ọpo ọdi ạpioman bọ.

⁸ Eḍighi ịyaar dị oye phọ ọpo ọpioman bọ mamugh kụ ụ́moogh ọnyo asiya dị kọkpe ịikpia phọ ọngo, pọ ọdi ạkpe ịikpia ịkaraph phọ ọdi ạngo Ọmoogh-we phọ; pọ ạraraar phọ ịlo oyil ạrikia phọ. Ịikpia phọ ịphen ẹḅaram rꞌodughuna ạraakparanaan ọsighe oselemiom oye lọ apum odianaan.

⁹ Tọrobo ẹkia obio giph lọ awe Ịzirel ọngo Ọmoogh-we phọ, pọ ẹlo oyil ạrikia lọ oghol kụ ọngo.

¹⁰ Tọrobo ịyaar lọ oye ạlogh ḍịghaagh oyil ạrikia, pọ ẹlo oyil ạrikia phọ.”

Ạnmariir dị aburulhom ạbidi rogbi mọ rotelhe erelhe iipheeny

^11-14 Ọmoogh-we phọ ạghaaph ạḅeni Mozis mọ ạḅeni we phọ Ịzirel mọ, “Eru mạar dị oye agbi mọ ạnir ọno ratelhe erelhe iipheeny kụ mạphuenaan loor ạtolan esi rꞌọnon oye kụ ọ́kar ọ́miin loor esi dị ạnir phọ ạaghian ni — oye lọ ạmiin ólho, kụ oye ạnir phọ ósiphom. Mụghumo eḍighi dị olhom mọ agbi mọ ạnir phọ ọno rale ẹmha dị ịpe kụ ítu ịdi emite, pọ koḍighi ika? Kẹn, eru mạar dị ạnir phọ loor ụ́upuan kụ uwaloor ọghagh ologhi aḍigh ologhi olhom mọ dị rạkagham ạnir phọ ọdi ụ́upuan bọ loor, pọ koḍighi ika?

¹⁵ Mọ ịduon ni mọ kị́duon, pọ oye phọ kạsighe ạnir phọ ọdi ạkiom kꞌọpinyon rịkia phọ. Ọdi ạḅile kạsighe ogbogh ọtoom ẹemor ịgbieneen ịbiakpa abali dị koḍighinom ịyaar aghuḍum. Ị́kpianaan nyọdi ọloghom mụnum rꞌịnsens ịdi eḍighi bọ ẹphen phọ ẹkia ọghagh ologhi, ẹkia olegheriom ịlo eru igey rꞌịkaraph.

¹⁶ “Oyil ạrikia phọ kạpam ạnir phọ aḍur ạabemi ạmeremi egbodo Ọmoogh-we phọ.

¹⁷ Oyil ạrikia phọ kạsighe mụum iigbia phọ sịphe ologhi ọnyoki kụ akpoph ẹnum ophugh sịphe ude Ogbogo Ạdol Ọmoogh-we phọ, ạsighe ạlogh ologhi ạmuum mọ.

¹⁸ Kụ ọdi ạakpo sịlaal ạnir phọ kụ ạsighe ịgbieneen ịbiakpa abali phọ ạlogh rạghaagh ạnir phọ. Sịphe ạraghaagh phọ ọdi, oyil ạrikia kạpam okiki amughiḍim ạmuum dị kạsighe itonyonaan ạngo.

¹⁹ Kụ oyil ạrikia phọ ạkalaminaan ạnir phọ ịyo, kụ ạḅeni ạnir phọ mọ, ‘Eru mạar dị nạ rꞌoye phọ esi kọ̋rolan ghan, mụghumo nạ kọ̋gbatanaan ghan olhom mọ ạna ọghi ọopuan loor rꞌọnon oye omuton olhom mọ ạna bịn, pọ nạ rꞌighuḍum, ịyo ạmuum eghiḍim mọ ạmuen nyịna kúkuugh.

²⁰ Eru mạar dị nạ mạwile ghan ni olhom mọ ạna ạghi ọnon oye rꞌạna ẹrolan esi ạapuan loor omuton olhom mọ ạna bịn,

²¹ pọ Ọmoogh-we phọ asu nyịna ọkaraph ọghor ịdi eḍighi bọ nạ maghir ịyo sịen ogbo awe phọ ạna, nạ ọ́ḅophan mun rꞌawe phọ ạna kụ oomo ịlha phọ ạna kẹḅoroghu kụ aloor phọ ạna ebuphogh kụ nạ ạwoghian.

²² Ạmuum mọ ạmuen aḍighi ịdi ọkuruḅaka ạna kạwoghian rꞌịdi ipholophool ạna kẹekpurughan.’ “Ạnir phọ kạḅem mọ, ‘Ẹrol li ịdipho. Ẹrol li ịdipho.’

²³ “Kụ oyil ạrikia phọ kạsighe ọkaraph ọghor phọ ọphon phọ ạge loor ạḍinya, kụ ạsighe aatol ologhi amughiḍim ghiḍim ạmuum mọ.

²⁴ Tụtu ọdi kạḅeni ạnir phọ mọ ạphughol mughiḍim ghiḍim ạmuum dị kạngo nyọdi eephina,

²⁵ oyil ạrikia phọ kạsighe ịbiakpa abali phọ sịphe ạraghaagh ạnir phọ, ạpam amitiom mụdi ọḅogh rọngo Ọmoogh-we phọ kụ aseere sịphe enmeny phọ.

²⁶ Kụ oyil ạrikia phọ kạsighe eekpopha ạḍighaagh, ịlo ọsighe ghan ọotughenam, kụ aguom nịan sịphe enmeny ạrikia phọ. Ruukuna phọ, ọdi ạmiin mọ ạnir phọ ạphughol li mụum mọ.

²⁷ Kụ eru mạar dị ạnir phọ mạapuan loor esi olhom mọ ọdi, pọ ạmuum ịyo phọ kaḍiku ni loor ạnir phọ, kụ ạngo nyọdi elhom eephina, ọkuruḅaka ạnir phọ kạfughughu, ḅịle kẹn ipholophool phọ ọdi ẹḍua. Aḍien phọ ọdi keḍighi ọkpagha esi awe phọ ọdi.

²⁸ Eru mạar dị ạraghaagh ạnir phọ ẹḅaal li, pọ erugh megheel nyọdi, pọ ạnir phọ katue ni ạmaraghi nmụny.

²⁹ “Ọphon phọ ologh ọghagh ologhi, mem dị ạnir dị mạal li ilhom kụ ạwile olhom mọ ọdi kụ agheel kꞌọnon oye dị útu olhom mọ ọdi kụ ạapuan loor.

³⁰ Mem dị ọkaraph ologhi aḍigh ologhi oye, kụ rạkagham ologhi ạnir phọ ọdi, kụ ạsighe ạnir phọ ạghi ạmeremi egbodo Ọmoogh-we phọ, pọ oyil ạrikia phọ ạghal oomo phọ ịphen phọ ạḅam ẹmhu ạnir phọ.

³¹ Oye phọ mạar ọ́piom akpetenaan ni ịkaraph; ịkaraph ạnir phọ ọḅam ẹmhu ạnir phọ.”