Igbiighi 36 - Ạḍinya Iigbia

Erua ạnmariir ilhom

¹ Bụo ạrumhu aruutu ịsiphe ọto phọ ạGiliad, ọony phọ aMakir rꞌọony oko phọ ạManase ọony phọ ạJosef, ọghi ọteeny Mozis rꞌabugbogh ạburude phọ Ịzirel,

² kụ ọghaaph ọḅeni nyọdi mọ, “Ọmoogh-we phọ ạto ni ịto ạngo nyịna phọ ọpo ụmoogh bọ iyoor, ịpe awe phọ Ịzirel koḍighi bọ kụ ọmoogh rere phọ, mọ ọsa ẹlhel; kụ Ọmoogh-we phọ ạḅile ạto ịto ạngo nyịna phọ ọpo ụmoogh bọ iyoor, mọ sịghe bin phọ aZelofahad ọony onhiin phọ ayoor ạngo nmạnyaan phọ ọdi.

³ Kụ eru mạar dị bịdi ạal olhom dị aḍighi ọlo ẹnon eghun sịen awe phọ Ịzirel, pọ mọ ọsighe ni bin ẹmoogh phọ nyẹpe eru bọ ẹlo ạburude phọ ayoor ọḅaranaan eghun phọ ẹpe ọnyani phọ ạal bọ.

⁴ Kụ rẹteeny mem ẹyaal ọmoogha aloor awe phọ Ịzirel, pọ ạar bin ẹmoogh phọ ọdi oḅulemi ọngo sịphe ọdi ạḍua bọ kụ amite. Ịduon kụ ịdi kọsighe ẹmoogh ạburude phọ ayoor sịphe eghun phọ ayoor.”

⁵ AMozis ạdaph ịpe Ọmoogh-we phọ ạghaaph bọ kụ ạto ạngo we Ịzirel kụ ạḅem mọ, “Ịphen bụo eghun ạnmuny phọ ạJosef ọghaaph bọ kụ ịne ni.

⁶ Ọmoogh-we phọ ạtuan nmạnyaan phọ aZelofahad kụ ạto bọ ịduon phọ: oye lọ ạḅeeraan bịdi kụ ọdi bịdi kọbal ghan sịphe eghun phọ ạbidi bịn.

⁷ Mọ abin ẹmoogh awe phọ Ịzirel kị́ḍua ghan eghun eten eghun.

⁸ Tọrobo ọnyani lọ aphin aani bin ẹmoogh phọ sịen arughunughun phọ Ịzirel, pọ ọdi ạal ilhom sịphe ạriikpigh eghun ọde phọ ọdi, bịn eḍighi ịdi tọrobo oye sịphe arughunughun phọ Ịzirel kạpamanam bin ẹmoogh ọde phọ ọdi,

⁹ ọbo kọsighe ghan bọ ẹmoogh eniin eghun ọngo ẹnon eghun. Tọrobo eghun ẹpham ghan ẹmoogh nyẹpe eghun phọ ạbidi.”

¹⁰ Kụ ạnmanyaan phọ aZelofahad ọdaph ịtooghi phọ Ọmoogh-we phọ ạto bọ kụ oḍighi.

¹¹ AMala, Tirza, Hogla, Milka rꞌaNoa, ạnmanyaan phọ aZelofahad, ạalogh nmụny dị abumor ọde phọ ạbidi kụ ọmaraghi.

¹² Bịdi ạalogh ilhom sịphe ạriikpigh ạnmuny phọ ạManase ọony phọ ạJosef, kụ abin ẹmoogh phọ ạbidi ạrol sịphe eghun ọde phọ ạbidi.

¹³ Ịphen phọ kụ ịtooghi rꞌeḍighinom ịyaar dị Ọmoogh-we phọ ạtooghi ạngo Mozis ịlo awe phọ Ịzirel, ẹpe ạḍiyaghaghaany ade phọ ạMoab ẹḅeenyom Ọphiiny ạJodan dị ọḍua Jeriko rotu.