Igbiighi 35 - Ạḍinya IigbiaẠramha phọ ọngo bọ bụo kꞌaLivai 1 Ọmoogh-we phọ ạḅeni Mozis ẹpe ạḍiyaghaghaany ade phọ ạMoab ẹpe ẹḅeenyom mọ ạJodan dị ọḍua Jeriko rotu 2 mọ ạto ạḅeni we phọ Ịzirel mọ, “Ịsighe sịphe abin ẹmoogh phọ anyina ẹngaani bụo kꞌaLivai phọ rạmha ịlo bịdi kotughogh, ẹsighe de lọ bịdi kọmoogh ịyaar olhe; de phọ ạḍiphe ekoom bọ rạmha phọ ẹngo bịdi. 3 Ạramha phọ eḍighi ịlo ạbidi bịdi orughogh; ade phọ etuman ekoom bọ ẹmoogh riisi ịḅal ịlo ạsinam rꞌoomo ịpheri ịnam mọ ạbidi. 4 Arere ịḅal ịnam ekoom bọ rạmha phọ kọngo bọ bụo kꞌaLivai, emiigh sịphe iikpe ẹmha phọ kụ ẹsighe rẹki ẹman 450 akuḅu ekitonom. 5 Inya phọ ạraghaagh ade phọ eeleeny ni ḍịdoony rꞌẹreghe ẹman 900 akuḅu, kụ ẹmha phọ ẹrol ogbo phọ. 6 Sịphe ạramha phọ ịpe nyina kẹngo bọ bụo kꞌaLivai, nyina kẹson odiiny ạramha oḍigh aḍibuo lọ oye aghiigh matuman ọdi kasuma ghan akeel. Ịḅar kẹn inyadi rꞌịyal ịnon ạramha ẹloghom ẹngo bịdi. 7 Oomo ạramha phọ nyina kẹngo bọ bụo kꞌaLivai kẹman bọ inyadi rꞌọphaanya ạramha, ọḅaram rꞌarere ịḅal ịnam mọ ạbidi. 8 Ạramha phọ ịpe nyina kẹsighe bọ esi arughunughun phọ Ịzirel keḍighi ịduon: eghun lọ ephin mugbogh abin, ọgbatan sịphe ẹminighan eghun lọ ephin mụbam abin, ọgbatan ẹnum abin. Ịtuugh ịdipho odiemi bọ bịdi kụ ẹgbarion ẹngo bụo kꞌaLivai phọ.” Ạramha oḍigh aḍibuo ( Dutoronomi 19.1-13 ; Josua 20.1-9 ) 9 Ọmoogh-we phọ ạghaaph ạḅeni Mozis 10 mọ ạḅeni we phọ Ịzirel mọ, “Mem dị nyina mẹḅeeny Ọphiiny ạJodan ephun ẹghi esi ẹpe ade phọ aKenan, 11 ịgbatan eseere gem rạmha dị keḍighi rạmha dị koḍigh ghan ḍibuo ọphelaam ẹmhu, ịdi oye lọ ạsighe elegheri kụ aghiighom matuman ọdi kasuma ghan akeel. 12 Ạramha phọ ịpe phọ eḍighi esi anyina rạmha dị oye lọ aghiigh oye kạpela ghuḍum mọ ọdi atene, ọbo ọnyo asiya lọ rạwa oḅulemian kakiigh ghan bọ nyọdi ekperenom. Oye lọ ạko enu kokiigh emuton dị ọdi mạmeera erugh ịiruen kụ osoph ḍighiton phọ ophume. 13 Esi ạramha phọ ịpe nyina kẹngo bọ bụo kꞌaLivai, ịsaḅar odiiny ạramha eseere gem mọ eḍighi rạmha ọphela aghuḍum otene, 14 ịraar ạramha ạga emitenom erumuḍio phọ ẹpe Jọdan, ịraar ẹpe ade phọ aKenan. 15 Tọrobo oye, mꞌọlo ịsiphe awe phọ Ịzirel mꞌooruen mꞌọlo rꞌanyina erughan, tọrobo oye lọ ạsighe elegheri kụ aghiighom oye, pọ asuma ghan agheel nyeniin ẹpe phọ. 16 “Kụ ọlo, eru mạar dị oye ạsighe okuron kụ ạguroghom oye kụ oye phọ amugh, pọ ọdi ọokom-enu, pọ ikiigh nyọdi egina amem. 17 Eru mạar dị oye ạsighe ikpo kụ aroḅol oye kụ oye phọ amugh, pọ ọdi ọokom-enu, pọ ikiigh nyọdi egina amem. 18 Eru mạar dị oye ạsighe ọkolhom kụ ạguroghom oye kụ oye phọ amugh, pọ ọdi ọokom-enu, pọ ikiigh nyọdi egina amem. 19 Ọnyo asiya ọpo oghiigh kụ aghiigh ghan ọokom-enu phọ tọrobo esi lọ ạmiin. 20 “Eru mạar dị oye ạsighe mụlogh-ḍien kụ azuom oye aghiigh; iini ạbona esi kụ azuom oye aghiigh; 21 iini akuphogh oye kụ aghiigh; pọ ikiigh ghan ni oye phọ ọpo, ọdi ọokom-enu. Ọnyo asiya ọpo oghiigh bọ kụ aghiigh ghan ọokom-enu phọ. Rọghi rọteeny ọokom-enu phọ bịn aghiigh ni nyọdi. 22 “Kụ ọlo, eru mạar dị oye ụ́tuan ẹpomoghian ekperenom bịn kụ aḍighi oye ịyaar aghiigh; iini ọ́bona esi kụ ạgur aghiigh; 23 kẹn óroph ekpo dị emeelom oye kekiigh; ọdi oye phọ ọ́miin kụ emeelom oye phọ kụ oye phọ amugh, dị ịyaar ụ́ugbanaghian ḅịle kẹn óosophoghian nyọdi oḍighi ịyaar; 24 pọ aḍita ookpomoghan phọ ọdaph iilogh phọ ịphen osoph ọoruen okeelemi oye phọ aghiigh bọ matuman phọ ọdi kụ opume nyọpo rạle bọ ghẹlhe ịḅaal ọnyo asiya phọ ọdi. 25 Aḍita ạbuo ookpomoghan phọ ọotoghion elegheri oye phọ aghiigh bọ matuman phọ ọdi ọphel ọsighe esi ọpo rạle bọ ghẹlhe phọ oghiigh bọ ọnyo asiya phọ ọdi, ọsighe nyọdi oḅulemi ẹpe ẹmha phọ ọdi aḍigh bọ ḍibuo, ọdi arugh ẹpe phọ tụtu oyil abiil phọ amugh. 26 Eru mạar dị ọokom-enu phọ ạḍua atenom ọku ẹpe ọdi asuma agheel aḍigh ḍibuo, 27 kụ ọnyo asiya ọpo oghiigh bọ ạwa ọokom-enu phọ ạmiin kụ aghiigh, pọ oḅulemian phọ ọphon kózu ịḅaal, 28 ịdi eḍighi bọ oye phọ aghiigh bọ matuman phọ ọdi mụtol ẹpe ẹmha phọ ọdi asuma bọ agheel aḍigh ḍibuo phọ tụtu oyil abiil phọ mamugh. Oyil abiil phọ romugh bịn mẹteeny mem dị ọdi katigheel sịphe abin ẹmoogh phọ ọdi atugh. 29 Ịtooghi phọ ịphen kụ ịdi nyina kẹsighe ghan kụ eegboom ịiruen, oghiil atum oghiil phọ anyina, tọrobo esi lọ nyina erugh.” 30 “Ọokom-enu lọ erugh aḍuugh mephum, ikiigh ghan ni. Kụ olọ ạsiagba oniin oye dị ọmiin aani bịn ị́gbaanyan, ẹḍua ịyal awe kụ ẹghiom ạnyu. 31 Oghiigh ghan ni ọokom-enu. Erugh aḍuugh phọ rọ́taam ghan ikpoki. 32 Ímeera ghan mọ ọokom-enu dị asuma agheel ẹmha aḍigh ḍibuo ạkpeeghi ikpoki bịn arigheel mem dị oyil abiil phọ kőmugh. 33 Nyina emeel eḍighanaan, pọ nyina mẹepu de nyina edi bọ. Ozu ịḅaal rạapu ghan de phọ; tụtu ọokom-enu phọ omugh, pọ kótue oḅoor de phọ ozu bọ ịḅaal phọ. 34 Kẹ́epu ghan de phọ nyina erugh bọ, ịdi eḍighi bọ mị kụ Ọmoogh-we phọ kụ mị atugh igbo awe phọ Ịzirel.” |
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
Nigeria Bible Translation Trust