Igbiighi 33 - Ạḍinya Iigbia

Erelhe phọ ọḍua bọ Ijipt osi Mọab

¹ Ịphen phọ asimarugh phọ ịpe awe phọ Ịzirel orughogh bọ mem erelhe phọ ạbidi emiigh kꞌamem mọ bịdi ọḍua bọ ẹpe eelhe phọ Ijipt omite, rꞌawe ẹgham mọ ạbidi. AMozis rꞌEeron kụ urelhiom bọ bịdi.

² Ọmoogh-we phọ ạto ạḅeni Mozis mọ ạgeeghi siḍien ariisi phọ bịdi odoghoḍi ghan bọ rugbogo phọ orughogh sịphe.

³ Mem dị ọḅel ụnwanyu phọ mạman ḍioph rꞌoogh aḍughul-otu, rolhe ẹḅel ẹyaal ọphel-otene phọ rẹḅaal, kụ awe phọ Ịzirel oḅetenu ọḍua ẹpe Rameses rꞌaḍilom ạḍighaagh esomanan oomo awe phọ Ijipt

⁴ dị roḍiighi oomo ịkpana ạnmuny phọ ạbidi Ọmoogh-we phọ ạze bọ, esi oḍeenaan mọ ọno kụ ạmoogh ịikpo apu rụmugh phọ Ijipt.

⁵ Awe phọ Ịzirel ọḍua sịphe Rameses, ọghi osi Sukot kụ odoghoḍi rugbogo orugh.

⁶ Kụ bịdi ọḍua sịphe Sukot, ọghi osi Etam kụ orugh sịphe eekuna ẹdala ịisaar phọ.

⁷ Kụ bịdi ọḍua sịphe Etam, kụ oḅula ọman okiton ẹpe Pi Hahirot ḍịghaagh emitenom erumuḍio phọ Baal Zefon, ọtol ropogh Migdol kụ orugh sịphe.

⁸ Kụ bịdi ọḍua sịphe phọ dị ọrol ropogh Pi Hahirot kụ ọḅeeny Ọphiiny Igbilha phọ ophun ọghi osi ẹpe ẹdala phọ. Bịdi orelhe bọ sịphe ẹdala ịisaar phọ aShur ịraar aḍio kụ ọghi osi Mara kụ orugh sịphe.

⁹ Kụ bịdi ọḍua sịphe Mara ọghi osi Ẹlim; kụ sịphe Ẹlim ḍioph rꞌịyal ạrunhu adir rꞌoḍualdi iizin alhe edi, kụ bịdi orugh sịphe.

¹⁰ Kụ bịdi ọḍua sịphe Ẹlim ọghi osi oogbom Eḍiiny phọ aSuez, kụ orugh sịphe.

¹¹ Kụ bịdi ọḍua sịphe oogbom Eḍiiny phọ aSuez ọghi osi ẹpe ẹdala ịisaar phọ ạSin kụ orugh sịphe.

¹² Kụ bịdi ọḍua ẹdala ịisaar phọ ạSin phọ ọghi osi Dofka kụ orugh sịphe.

¹³ Kụ bịdi ọḍua Dofka ọghi osi Alus kụ orugh.

¹⁴ Kụ bịdi ọḍua Alus ọghi osi Refidim kụ orugh sịphe. Kụ ạmuum lọ awe phọ kọpughol ọ́rol.

^15-37 Ọḍua Refidim ọghi osiemi Eegum aHor, asimarugh phọ ịphen: Ẹdala aSainai phọ, Kibrot Hataava, Hazerot, Ritma, Rimon Pẹrez, Libna, Risa, Kehelata, Eegum aSefer, Harada, Makhelot, Tahat, Tera, Mitka, Hasmona, Moserot, Bẹne Jaakan, Hor Hagidgad, Jotbata, Abrona, Ezion Geber, Ẹdala aZin, (pọ Kades) rꞌEegum aHor ẹpe eekuna ade phọ Idom.

^38-39 Kụ Eeron oyil ạrikia phọ ạdaph ịpe Ọmoogh-we phọ ạḅeni bọ nyọdi kụ ạsiiny ạnyu Eegum aHor, kụ ạrol sịphe ạnyu phọ amugh. Mẹman inyadi ạsia awe phọ Ịzirel ọḍua bọ ẹpe eelhe phọ Ijipt omite, ḍịḅel aḍughul-otu oogh ụnwanyu ạlha phọ. Eeron ạman bọ oniin okuron ịyaldi rꞌịraar ạsia mem mọ ọdi amugh bọ ẹpe Eegum aHor.

⁴⁰ Arad ọdaam mọ aKenan arugh bọ ẹpe ạḍighaagh esoorom ade phọ aKenan ạnaghan ni mọ awe phọ Ịzirel rotu.

^41-49 Asimarugh phọ ạbidi, emiigh Eegum aHor ẹghi esiemi ḍịyaghaghaany ade phọ ạMoab, ịphen: Zalmona, Punon, Obot, Iye Abarim ẹpe ọku ade phọ ạMoab, Dibon Gạd, Almon Diblataim, Aruugum Abarim mọ ọtol ropogh Eegum aNebo, ḍịyaghaghaany ade phọ ạMoab ẹpe ẹḅeenyom ọphiiny phọ ạJodan dị ọḍua Jeriko rotu, ịbaay ạBet Jesimot rꞌEḍiiny Akasia.

Ạraraar dị ẹkpe olegheri tụtu kọḅeeny ọphiiny phọ ạJodan

⁵⁰ Ọmoogh-we phọ ạḅeni Mozis ẹpe ḍịyaghaghaany ade phọ ạMoab ẹpe ẹḅeenyom mọ ạJodan etuman bọ Jeriko mọ,

⁵¹ “Kạaph ạḅeni we phọ Ịzirel mọ, ‘Mem dị nyina metenom Jọdan ọghi osi ẹpe ade phọ aKenan,

⁵² iporogh oomo ạbuo ade phọ, bụphe orugh bọ sịphe ade phọ, bịdi ọḍuaghu. Ẹphueghi egbonyon oomo phọ asighiigh phọ ịpe bịdi ọkaaghi bọ ọghighemian siloor, rꞌoomo ịkaaghineen ạrumugh phọ ạbidi, ḅịle rꞌoomo ariisi ooseeny aruru phọ ạbidi.

⁵³ Ẹkar ẹsighe de phọ ẹmoogh, erugh sịphe ade phọ, ịdi eḍighi bọ mị mịngaani inyina de phọ eḍighi ḍịo anyina.

⁵⁴ Ịsa ịlhel kụ ephogh ediom sibin ẹmoogh de phọ ẹdaph rughunughun rꞌạriikpigh phọ anyina. Ẹkpigh lọ ẹbugh ephin mugbogh abin, ẹkpigh lọ eghom ephin mụbam abin; tọrobo ẹkpigh lọ ẹlhel phọ emeelom, pọ esi phọ ẹpe ẹlo ẹkpigh phọ ẹpe. Ịdaph bụrude phọ anyina kụ ẹmoogh.

⁵⁵ Kụ eru mạar dị nyina íporogh bụo ade phọ ịsighiogh sịphe ade phọ bịdi ọḍuaghu, pọ bụphe kosugha bọ koḍighi ni ịka rꞌiitoor esi anyina, kụ ịiḅaghami ghan inyina sịphe ade phọ nyina ketugh bọ.

⁵⁶ Nyina bịdi íporogh ọḍuaghu, pọ mị kiphiemi ni inyina ịdipho mị aguan bọ ophiemi ạbidi.’”