Igbiighi 32 - Ạḍinya Iigbia

Arughunughun dị orugh ạga emitenom erumuḍio phọ ạJodan

¹ Awe eghun phọ aRuben rꞌawe eghun phọ ạGad, bịdi kụ ụmoogh ḍita ịnam. Kụ bịdi ọmiin mọ ade phọ aJazer rꞌade phọ ạGiliad ẹnighe ḍịo ịnam-otu.

² Kụ ọghi ọḅeni Mozis rꞌẸliazar oyil ạrikia phọ rꞌikpolom awe phọ mọ,

^3-4 “Rạmha phọ ịpe Ọmoogh-we phọ aphiemi bọ esomanan aḍita awe phọ Ịzirel — Atarot, Dibon, Jazer, Nimra, Hesbon, Eliale, Sibma, Nebo rꞌaBion — ade phọ ẹnighe ḍịo ịnam-otu, kụ abutelhedom mọ anyina ọmoogh ịnam-otu dị eḍiza.

⁵ Eru mạar dị nyina ịphomoghian ni iyoor kụ ẹmoogh ghụsan esi ayoor, pọ ịngo butelhedom mọ anyina de phọ ạḍien eḍighi ẹmoogh ḍịo ayoor; kị́pham iyoor ẹḅeenyom Ọphiiny ạJodan.”

⁶ Kụ aMozis apuru we eghun phọ ạGad rꞌawe eghun phọ aRuben mọ, “Abumor phọ anyina rọki ẹpe ẹgham kụ nyina kẹtologhu sịen?

⁷ Esi ika kụ ẹdi nyina rẹpue bọ ologhi awe phọ Ịzirel mọ bịdi kụḅeeny Jọdan usi ẹpe ade phọ Ọmoogh-we phọ ạngo bọ bịdi.

⁸ Ọdo phọ ịphen kẹn kụ ịdi ạburude phọ anyina oḍighi bọ ẹpe Kades Bania mem mọ mị arom bọ bịdi mọ ọghi ọmiin de phọ.

⁹ Bịdi rọghi rosi ẹpe Eḍiiny Eskol roḅula bịn ọphue ologhi awe phọ Ịzirel, mọ bịdi kụki ẹpe ade phọ Ọmoogh-we phọ ạngo bọ bịdi.

¹⁰ Kụ ẹghagh ologhi Ọmoogh-we phọ egina amem mọ, kụ ọdi aghunya mọ,

¹¹ ‘Alephiri ạnmuny phọ bụphe ọḍua bọ ẹpe Ijipt omite, emiigh bụlo mọman ịyaldi ạsia kụ ẹghiom ạnyu, rꞌoniin ọnyo ạbidi lọ kasi ẹpe ade phọ mị aghunya bọ ọngo Ebraham rꞌẠizik rꞌạJekob ólho, ịdi eḍighi bọ bịdi ụ́sighe ophooph ologhi kụ rụdapham bọ ịmi.’

¹² Omuton Kẹleb ọony phọ aJefune ọlo aKenizait rꞌaJosua ọony phọ ạNon bịn, ịdi eḍighi bọ bịdi ọsighe ni ophooph ologhi kụ rọdapham bọ Ọmoogh-we phọ.

¹³ Kụ Ọmoogh-we phọ ạghagham ologhi we phọ Ịzirel, kụ aḍighi ịdi bịdi oyeela yogh sịphe ẹdala phọ inyadi ạsia, tụtu ophiemi oomo oghiil phọ ọpo aḍighi bọ ịpe ị́nighe bọ risigh ọdi.

¹⁴ Kụ nyịidipho nyina meḅetenu kẹn rẹdaph ịpe ạburude phọ anyina oḍighi bọ, bịn ẹmaraghi lephiri ạnmuny ạsipioghom bịn rọbughiom ghan ọghagh ologhi Ọmoogh-we phọ esi Ịzirel.

¹⁵ Eru mạar dị nyina ẹwile ọdaph ọdi, pọ ọdi kạḅile kẹn ạḅitonaan oomo aḍita awe phọ ạbuen sịen ẹdala phọ, kụ nyina epiemi bịdi.”

¹⁶ Kụ bịdi ọghi ọteeny Mozis kụ ọḅeni mọ, “Meera yoor oghonyom rạna riisi ịlo iyool-ịga phọ ayoor, ọloghoḍi rạmha ẹkpar ịlo ịbam ạnmuny phọ ayoor.

¹⁷ Kụ yoor ọnyaaghian ni ịlo ẹgham mọ oḍiemiom awe phọ Ịzirel tụtu yoor ọsighe bịdi osiemi ẹpe rọki bọ. Kụ ọlo ịbam ạnmuny phọ ayoor kotugh ni ẹpe ạramha ẹkpar phọ yoor ọloghoḍi bọ loor esi ạbuphe ọmoogh bọ de phọ.

¹⁸ Yoor kóḅula ẹphen aruutu phọ ayoor, tụtu tọrobo ọlo Ịzirel maphin bin ẹmoogh mụo ọdi.

¹⁹ Yoor kọ́ḅaram rꞌạbidi, ópinogh asibin ẹmoogh ẹpe ẹḅeenyom ọphiiny phọ ạJodan ẹghiom risigh, ịdi eḍighi bọ ẹmoogh ẹlo ayoor imeelom iyoor ẹphen ọman phọ ạJodan, ẹpe erumuḍio phọ remite ghan bọ.”

²⁰ Kụ aMozis ạḅeni bịdi mọ, “Eru mạar dị nyina keḍighi ni ịphen nyina rẹkaaph bọ, pọ ịnyaaghian ni egbodo Ọmoogh-we phọ ẹghi ẹgham mọ.

²¹ Tọrobo ọnyo anyina lọ mạnyaaghian ịlo ẹgham mọ ạḅeeny ghan ọphiiny phọ aphun egbodo Ọmoogh-we phọ, tụtu ọdi aphorogh bụmulogh-ḍien phọ ọdi ọḍuaghu risigh ọdi,

²² kụ ade phọ eḍigh ḍịghaagh anyina. Kụ reten kụ nyina eḅula, bịn erugh inyina íphum mun esi Ọmoogh-we phọ rꞌarisigh awe Ịzirel. Pụruku ade phọ ạḍien ạga emitenom erumuḍio phọ ạJodan keḍighi bin ẹmoogh mụo anyina egbodo Ọmoogh-we phọ.

²³ Kụ eru mạar dị nyina ịphen phọ íḍighi, pọ nyina meḍighi ịkaraph esi Ọmoogh-we phọ, pọ ilegheri mọ ịkaraph phọ anyina kịwa ni inyina emitiom.

²⁴ Ịloghoḍinaan ni rạmha ẹkpar ịbam ạnmuny phọ anyina, eghoony yogh riisi iyool-ịga phọ anyina, kụ ẹdaph ịpe ẹḍua bọ rụnhu phọ anyina emite eḍighi.”

²⁵ Awe eghun phọ ạGad rꞌawe eghun phọ aRuben ọḅeni Mozis mọ, “Abutelhedom mọ ạna kọtuugh ni ịpe ọpo ụmoogh bọ iyoor ụḅeni bọ iyoor kụ oḍighi.

²⁶ Ịbam ạnmuny phọ ayoor rꞌạnmariir phọ ayoor, iyool-ịga phọ rꞌạsinam mọ ayoor ẹrol sịphe ạramha phọ ạGiliad.

²⁷ Abutelhedom mọ ạna, tọrobo oye kạnyaaghian ni ịlo ẹgham mọ ạḅeeny ọphiiny phọ ạJodan apun egbodo Ọmoogh-we phọ, abe ẹgham mọ, ịdipho oye phọ ụmoogh bọ iyoor mạḅem bọ.”

²⁸ Kụ aMozis ạtuan bịdi kụ ạto ịto ạngo Ẹliazar oyil ạrikia phọ rꞌaJosua ọony phọ ạNon rꞌabugbogh ạburude sịphe arughunughun phọ Ịzirel.

²⁹ Kụ aMozis ạḅeni bịdi mọ, “Eru mạar dị awe eghun phọ ạGad rꞌawe eghun phọ aRuben, tọrobo oye lọ mạnyaaghian ịlo ẹgham mọ, egbodo Ọmoogh-we phọ, kịdaph ni inyina ẹḅeeny ọphiiny phọ opun ẹpe Jọdan tụtu ade phọ eḍigh ḍịghaagh anyina, pụruku kọngo bịdi de phọ ạGiliad eḍighi bin ẹmoogh mụo ạbidi.

³⁰ Kụ eru mạar dị bịdi inyina ị́daph ịḅeeny ẹpe Jọdan, ụ́nyaaghian ịlo ẹgham, pọ bịdi rꞌanyina kụ kẹḅophoghan epinogh sibin ẹmoogh phọ ẹpe ade phọ aKenan.”

³¹ Kụ awe eghun phọ ạGad rꞌawe eghun phọ aRuben ọphagharanaan mọ, “Ịpe Ọmoogh-we phọ ạḅeni bọ butelhedom mọ ọdi, ịpe phọ kụ ịdi yoor kọtuugh ni oḍighi.

³² Yoor kọnyaaghian ni ịlo ẹgham mọ egbodo Ọmoogh-we phọ, ọdaph ọki osi ẹpe ade phọ aKenan, kụ abin ẹmoogh phọ mụo ayoor ịrolonaan ni iyoor ạga emitenom erumuḍio phọ ẹpe ạJodan.”

³³ Kụ aMozis ạsighe oomo ạramha eelhe aSihon ọdaam mọ Ạmorait rꞌeelhe ạOg ọdaam mọ ạBasan ạngo eghun ạGad rꞌeghun phọ aRuben rꞌẹkpigh eghun phọ ạManase.

³⁴ Awe eghun phọ ạGad ọḅile odoghoḍi rạmha ẹkpar phọ ịphen: Dibon, Atarot, Aroer,

³⁵ Atarot Sofan, Jazer, Jogbeha,

³⁶ Bẹt Nimra rꞌạBet Hạran. Kụ oghoonyogh rạmha phọ rꞌaruutu iyool-ịga phọ.

³⁷ Awe eghun phọ aRuben ọḅile odoghoḍi rạmha ẹkpar phọ ịphen: Hesbon, Eliale, Kiriataim,

³⁸ Nebo, Baal Mion (onme ḍien ẹmha phọ ẹphen) rꞌaSibma. Ooghologh ịnon asiḍien rạmha phọ ịpe bịdi ọḅile bọ ọloghoḍi.

³⁹ Awe ẹkpigh phọ aMakir ọony phọ ạManase ọghi oruphiom Gịliad ọsighe ophorogh bụo Ạmorait phọ orugh bọ ẹpe.

⁴⁰ AMozis ạsighe Gịliad ạngo ọto phọ aMakir kụ bịdi orugh ẹpe.

⁴¹ AJair ọlo eghun phọ ạManase ạghi ạsighe ịbam ạramha kụ aghol mọ aHavot Jair.

⁴² Kụ aNoba ạghi ạsighe ịbam ạramha phọ eko bọ ekitonom Kenat kụ anme ḍien aghol mọ aNoba, aḍien phọ ọdi.