Igbiighi 31 - Ạḍinya Iigbia

Ẹgham iigbia phọ oruphiom bọ weye ạMidia

¹ Ọmoogh-we phọ ạḅeni Mozis mọ,

² “Ịliom we phọ ạMidia loor ịpe bịdi oḍighi bọ we phọ Ịzirel. Nạ rọlhiom bịdi rọman nạ mamugh.”

³ Kụ aMozis ạḅeni we phọ Ịzirel mọ, “Ịki sịphe ogbo aḍita awe phọ, ẹson we bịdi ọnyaaghian ịlo ẹgham, ọghi ozuom ẹgham bụo ạMidian phọ, ẹlhiom bịdi ghẹlhe Ọmoogh-we phọ.

⁴ Tọrobo eghun Ịzirel ọsighe ghan oniin ọonir awe dị kọki bọ ẹgham mọ.”

⁵ Kụ ọson we dị ọman ḍioph rꞌịyal ọonir omitiom bọ tọrobo eghun awe, oniin ọonir awe.

⁶ Kụ aMozis arom bịdi mọ ọghi oruphe ẹgham, ọḅaram uwo ẹmhu ạbuo ẹgham mọ ạFinehas ọony phọ Ẹliazar oyil ạrikia phọ dị ạpham oomo ạraraar iigbia phọ rꞌaruuḍue dị kopula ghan kụ emoogh we phọ.

⁷ Kụ bịdi ọghi eenaan rꞌạbuo ạMidian phọ, ịdipho Ọmoogh-we phọ ạto bọ ạḅeni Mozis, kụ ọze oomo alephiri ạnmuny phọ ạbidi ọmadan.

⁸ Bịdi ọze oogh ạbudaam mọ ạMidian: Evi, Rekem, Zur, Hur rꞌaReba. Ughiighom ni Bẹlam ọony phọ aBior.

⁹ Kụ awe phọ Ịzirel ọsighe nmạriir rꞌịbam ạnmuny phọ ạMidian ọḍuanam, kụ ookoroghi oomo phọ ạsinam mọ rꞌiyool-ịga phọ bịdi ọmoogh bọ ọsighiogh, ọphueghi oomo phọ ẹelha phọ.

¹⁰ Ọsuughi nịan oomo ạramha rꞌarugbogo rꞌarubughotu ạbidi ophiemi.

¹¹ Kụ bịdi ookoroghi oomo igeny aruphua phọ, ịnam rꞌạbuo ikoli ẹgham mọ ọsighiogh.

¹² Kụ bịdi ọpham we phọ bụphe bịdi osiphi bọ rꞌoomo ạraraar phọ ịpe bịdi ọsighiogh bọ oruomonaan Mozis rꞌẸliazar oyil ạrikia phọ rꞌaḍita awe phọ Ịzirel ẹpe ạḍiyaghaghaany ade phọ ạMoab ẹpe ẹḅeenyom ạJodan dị ọḍua Jeriko kụ rọki.

Aweye ẹgham mọ otigheel

¹³ AMozis, Ẹliazar rꞌikpolom awe phọ Ịzirel omiteghu rugbogo phọ ọghi ozuan bịdi eten.

¹⁴ Kụ aMozis ạghagham ologhi bụo ạrumhu ạtorobo ẹku awe ẹgham mọ, bụphe rọtooghi ghan bọ kọngo sụmuunir ạbuo ẹgham mọ, rꞌạbuphe rọtooghi ghan bọ kọngo rukuron ạbuo ẹgham mọ, ọḍua bọ ẹgham mọ origheel.

¹⁵ Kụ aMozis apuru bịdi mọ, “Uḍighi ika kụ nyina ị́ze bọ oomo ạnmariir phọ ạbidi?

¹⁶ Ịmaar ẹetughian. Ọdo ạnmariir phọ ạbuen kụ ụkom bọ we phọ Ịzirel mọ ọsighe oroma phọ ạBelam kụ ọtuan bọ ọpioman bọ esi Ọmoogh-we phọ kụ ẹzegh imananaan emite bọ ẹpe Pior, tụtu ẹepoph phọ esoorom bọ bịdi.

¹⁷ Esi ịduon phọ, ịze oomo ịbam alephiri ạnmuny phọ rꞌoomo ạnmariir lọ rꞌoye mọrolan ghan esi.

¹⁸ Kụ ẹwile eseerian oomo arisina rꞌạnmariir dị oye kọ̋ka, ị́ze ghan.

¹⁹ Tọrobo ọnyo anyina lọ aghiigh oye, rꞌọlo ạḅogh oḍim, pọ ạḍua sịen arugbogo phọ, ạghi arugh ẹnon ekpisi oḍual aḍughul-otu. Ẹman ịraar aḍughul-otu, nyina rꞌạbuen nyina esiphi bọ ekori eselemian siloor anyina, kụ remunughan oḍual aḍughul-otu phọ kụ ẹḅile kẹn eselemian siloor anyina.

²⁰ Tọrobo ịyaar anyina, mꞌarukpe mꞌozu ẹnam, mꞌẹlo ọsighe suphuugh ạrutu-ịga kụ oḍighinom, mꞌẹlo oreeny, pọ iselemian loor, ọbo ịkaraph phọ ạbidi ẹḍua loor anyina.”

²¹ Ẹliazar oyil ạrikia phọ ạḅeni we phọ ọḍua bọ ẹgham mọ origheel mọ, “Ịphen phọ kụ ịtooghi dị Ọmoogh-we phọ ạto ạngo Mozis.

²² Omuton gol, silva, enaba, okuron, ạmama rꞌạleezu bịn;

²³ tọrobo ịyaar dị ạnian kéle, pọ eten ologhi ạnian, bịn meselemian loor.

²⁴ Kụ rẹman oḍual aḍughul-otu eetologh oomo arukpe phọ anyina. Reten bịn nyina meseleman, kụ egbi ogheel ẹpe arugbogo phọ.”

Ịdi kodi we phọ osiphi bọ rꞌạraraar phọ owum bọ

²⁵ Ọmoogh-we phọ ạḅeni Mozis mọ,

²⁶ “Gbi oomo ạraraar phọ owum bọ ẹpe ẹgham mọ ọpham bọ orighelom, nạ rꞌẸliazar oyil ạrikia phọ rꞌabugbogh ạburude awe phọ. Agbi we ikoli phọ rꞌịnam mọ.

²⁷ Ạsighe rạraar phọ owum bọ ẹpe ẹgham mọ adi ịyal abin: abin mụo ạbuphe ọghi bọ ẹgham mọ rꞌabin mụo ạbueri awe phọ.

²⁸ Ịgbatan sịphe abin ạbuo ẹgham mọ osogh ọlo Ọmoogh-we phọ. Bụphe ọghi bọ ẹgham mọ bin kụ kosogh, oniin esi oogh okuron: we, sịnam, ịnam adool, iyool-ịga rꞌạrutu-ịga phọ.

²⁹ Ngọ ịphen phọ Ẹliazar oyil ạrikia phọ; ọdi aḍighi mụukia abin Ọmoogh-we phọ.

³⁰ Bin ạbueri awe phọ Ịzirel ạgbatan osogh ọlo Ọmoogh-we phọ ịduon: oniin esi ooghdi; we, sịnam, ịnam adool, iyool-ịga rꞌạrutu-ịga phọ ạngo bụo kꞌaLivai, bụphe ropogh bọ oomo ạraraar phọ edi bọ sịphe Ogbogo Ọmoogh-we phọ.”

³¹ AMozis rꞌẸliazar oyil ạrikia phọ ụtuugh ni ịpe Ọmoogh-we phọ ạghaaph bọ ạḅeni Mozis oḍighi.

^32-35 Ịphen phọ ạraraar dị esugha esi ạraraar phọ ịpe ạbuo ẹgham mọ owum bọ ọpham orighelom: 675,000 iyool-ịga rꞌạrutu-ịga, 72,000 ạsinam, 61,000 ịnam adool, ra 32,000 ạnmanyaan bụdi oye rꞌạbidi esi kọ̋rolan ghan.

^36-40 Abin mụo ạbuo ẹgham mọ: 337,500 iyool-ịga rꞌạrutu-ịga (ịpe osogh bọ ịlo Ọmoogh-we phọ ẹman bọ 675 iyool-ịga rꞌạrutu-ịga); 36,000 ạsinam (ịpe osogh bọ ịlo Ọmoogh-we phọ ẹman bọ 72 ạsinam); 30,500 ịnam adool (ịpe osogh bọ ịlo Ọmoogh-we phọ ẹman bọ 61 ịnam adool); 16,000 ạnmanyaan bụdi oye rꞌạbidi esi kọ̋rolan ghan (bụphe osogh bọ ịlo Ọmoogh-we phọ ọman bọ 32 ạnmanyaan).

⁴¹ Kụ aMozis ạsighe bin osogh phọ mụphe Ọmoogh-we phọ kọpighironom bọ oḅio-giph phọ oyil ạrikia phọ ịdipho Ọmoogh-we phọ ạto bọ ạḅeni nyọdi.

^42-46 Abin mụo ạbuo ẹgham mọ rꞌabin mụo ạbueri awe phọ iniin: 337,500 iyool-ịga rꞌạrutu-ịga; 36,000 ạsinam; 30,500 ịnam adool; 16,000 ạnmanyaan dị oye kọ̋ka.

⁴⁷ Sịphe abin mụo ạbueri awe phọ, aMozis ạsighe ịlo osogh ọlo Ọmoogh-we phọ, oniin esi ooghdi: we, sịnam, ịnam adool, iyool-ịga rꞌạrutu-ịga phọ, ạngo bụo kꞌaLivai bụphe ropogh bọ rạraar iigbia ịsiphe Ogbogo Ọmoogh-we phọ.

⁴⁸ Kụ bụo ạrumhu awe ẹgham bụphe rọtooghi ghan bọ kọngo sịmuunir, rꞌạbuphe rọtooghi ghan bọ kọngo rukuron ạbuo ẹgham mọ, ọghi ọteeny Mozis,

⁴⁹ kụ ọḅeni mọ, “Yoor abutelhedom mọ ạna mogbi we ẹgham mọ odi bọ eeḍian ayoor, kụ oye óphe sịphe aḍita phọ ayoor.

⁵⁰ Kụ yoor mọsighe ịinua ọphighironom ẹkia phọ otu ọngo Ọmoogh-we phọ. Tọrobo ọnyo ayoor ạpam ni rạraar lọ ọdi awum ẹpe ẹgham mọ atumom, gol, ịgbogolo, rạla, reme, reḅeri-sụa, ịkuta orum, ịdi kọpighironom ẹkia ọtagharanam aruwaloor phọ ayoor oḍigh ḍibuo Ọmoogh-we phọ.”

⁵¹ AMozis rꞌẸliazar oyil ạrikia phọ ạanyi bịdi ịinua phọ ịpe ọsighe bọ gol kụ ọlhemom bọ.

⁵² Kụ oomo ịpe bụo ạrumhu ạbuo ẹgham mọ ọpham bọ orumom ọphighironom ẹkia ọngo Ọmoogh-we phọ ẹman bọ ịyal okuron igbogh ịtoom ẹemor.

⁵³ Oopho awe ẹgham mọ useerian ni oomo ạraraar phọ ịpe bịdi owum bọ ọpham orighelom, uwo ịlo ọdi rꞌịlo ọdi.

⁵⁴ AMozis rꞌẸliazar oyil ạrikia phọ ạanyi gol phọ rạghaagh ạbuphe rọtooghi ghan bọ kọngo sụmuunir ạbuo ẹgham mọ, rꞌạbuphe rọtooghi ghan bọ kọngo rukuron ạbuo ẹgham mọ, kụ ọsighe ọghi ọlogh ologhi Ogbogo phọ, ịlo Ọmoogh-we phọ kạsighe ạatughanam ghan we phọ Ịzirel.