Igbiighi 3 - Ạḍinya Iigbia

Ạnmuny phọ Eeron

¹ Bụen kụ oghiil Eeron rꞌaMozis ḍio phọ ạḍiphe Ọmoogh-we phọ rꞌaMozis ọghaaphan bọ sịphe Eegum aSainai.

² Ịphen kụ asiḍien ạnmuny Eeron: Nạdab kụ ọkpana, Abihu, Ẹliazar rꞌItamar.

³ Bụen kụ ạnmuny phọ Eeron ạsighe bọ mụnum-ịko ạsagharan ẹmhu phọ; bịdi kụ umunughan ọphinyon ghan ạrikia.

⁴ ẠNadab rꞌAbihu umugh egbodo Ọmoogh-we phọ mem dị bịdi ọsighe ḍiiruen ạnian kụ ọghimom risigh Ọmoogh-we phọ ẹpe Eegum aSainai, kụ bịdi nmụny ụ́mar. Kụ Ẹliazar rꞌItamar kụ ụḅile ghan ọphinyon rịkia risigh Eeron ọde phọ ạbidi.

Ọma bụo kꞌaLivai mọ okumuan ghan ọngo bụpinyon rịkia phọ

⁵ Ọmoogh-we phọ ạghaaph ạḅeni Mozis mọ,

⁶ “Sịghe eghun phọ aLivai, ạsighe ạghi atumeriom ạmeremi bịdi risigh Eeron oyil ạrikia phọ bịdi ọdaph nyọdi oḍighi iiḍighi ịsiphe Ogbogo Ạdol phọ ạmi.

⁷ Bịdi kụ ạbudi koḍighinaan ghan nyọdi rꞌoomo aḍita awe phọ Ịzirel oḍighi phọ ịsiphe Ogbogo phọ.

⁸ Bịdi kụ ạbudi kopogh ghan oomo ạraraar ịsiphe Ogbogo phọ; bịdi ọdaph ghan eḍighinom awe Ịzirel phọ kụ oḍighi ghan iiḍighi ịsiphe Ogbogo phọ.

⁹ Ḅọgh bụo kꞌaLivai phọ ạngo Eeron rꞌạnmuny phọ ọdi.

¹⁰ Kụ ạma Eeron rꞌạnmuny phọ ọdi mọ bịdi oḍighi ghan iiḍighi ariil ạrikia phọ. Kụ ooruen lọ ạghi ạabeeph sịphe phọ, pọ ikiigh ghan.”

¹¹ Kụ Ọmoogh-we phọ ạghaaph ạḅeni Mozis mọ,

^12-13 “Mị mạsighe bụo kꞌaLivai phọ ạgbatan gem sịphe awe phọ Ịzirel, ạasa bịdi mọ oḍighi bụo ạmi. Ḍio phọ ạḍiphe mị ạze bọ oomo ịkpana ạnmuny phọ Ijipt, mị ụlogh ni ọku oomo ịkpana ạnmuny phọ Ịzirel rꞌoomo ịnam mọ ạbidi, mọ oḍighi bụo ạmi. Nyịidipho mị mạsighenom bụo kꞌaLivai phọ dịadi oomo ạbuḅel ạnmuny phọ ạbuphe oghughuron bọ eghun ẹmaria sịphe aḍita ạnmuny phọ Ịzirel. Bịdi ghụn kụ moḍighi bụo ạmi. Mị kụ Ọmoogh-we phọ.”

Ogbi weye eghun phọ aLivai

¹⁴ Kụ Ọmoogh-we phọ ạghaagh ạḅeni Mozis ẹpe ẹdala phọ aSainai mọ,

¹⁵ “Gbi eghun phọ aLivai, ọto rꞌopolo, ọto rꞌọto kꞌạburude phọ ạbidi, tọrobo olephiri ọony lọ mạman oniin ụnwanyu kụ ẹghiom risigh.”

¹⁶ Kụ aMozis ạdaph ịpe Ọmoogh-we phọ ạḅeni bọ nyọdi kụ ạtuugh agbi bịdi.

^17-20 ALivai ạmar ịraar ạnmuny: Gerson, Kohat rꞌaMerari. Bụen phọ kụ ạburude aropolo phọ ịphen phọ. AGerson ạmar ịyal ạnmuny: Libni rꞌaSimei. AKohat ạmar inya ạnmuny: Ạmram, Izhar, Hẹbron rꞌỤziel. AMerari ạmar ịyal ạnmuny: Mahli rꞌaMusi. Bụen phọ kụ ạburude aropolo phọ ịphen phọ.

²¹ Sịphe ọto aGersonait, ọto kꞌaLibni rꞌọto kꞌaSimei.

²² Awe dị ogbi bọ sịphe kꞌạbidi, emiigh olephiri ọony lọ mạman oniin ụnwanyu kụ ẹghiom risigh, ụman 7,500 awe.

²³ Amarugh mụo ọto phọ ọphon ạrol ghan ẹpe ebughotu Ogbogo phọ, ẹpe erumuḍio phọ remeel ghan bọ.

²⁴ Sịphe ọto phọ aGersonait, Eliasaf ọony phọ ạLael kụ aḍighi okumoor oye.

²⁵ Oḍighi ọlo ạbuo aGersonait ophogh ghan Ogbogo phọ, rꞌikpereghiom mọ, rꞌarukpe phọ ọkpooghi bọ rꞌạsikan ịsiphe ọnhu-aḍibuo Ogbogo phọ,

²⁶ rꞌarukpe ịsiphe oghoony phọ, rꞌarukpe ịpe ọkpooghi bọ sịphe ọnhu-aḍibuo oghoony phọ, etuman Ogbogo phọ rꞌenmeny ạrikia phọ ekitonom rꞌisiineeny iḍigh phọ ịpe roḍighinom ghan bọ iiḍighi ịsiphe phọ.

²⁷ Sịphe ọto aKohatait, ọto kꞌẠmram, rꞌọto kꞌIzhar, rꞌọto kꞌạHebron rꞌọto kꞌỤziel.

²⁸ Awe dị ogbi bọ sịphe kꞌạbidi, emiigh olephiri ọony lọ mạman oniin ụnwanyu kụ ẹghiom risigh, ụman 8,600.

²⁹ Amarugh mụo ọto phọ ọphon ạrol ghan ẹpe ạḍighaagh esoorom Ogbogo phọ.

³⁰ Sịphe ọto phọ aKohatait, Elizafan ọony phọ Ụziel kụ aḍighi okumoor oye.

³¹ Oḍighi ọlo ạbuo aKohatait, ophogh ghan Igbe Ịyo phọ, ịdaabili phọ, ireeny ịtozi phọ, arenmeny ạrikia phọ rꞌạraraar iiḍighi phọ ịsiphe Ạdol Iigbia phọ rꞌịpe bịdi roḍighinom bọ oḍighi bọ rꞌạsikan ịsiphe ọnhu-aḍibuo Ẹphan phọ.

³² Ẹliazar ọony phọ Eeron oyil ạrikia phọ kụ aḍighi uwo ẹmhu ạbuo aLivai. Ọdi kụ ạtooghi ghan ạngo bụphe oḍighi bọ oḍighi ịsiphe Ạdol Iigbia phọ.

³³ Sịphe ọto phọ aMerari, ọto kꞌaMali rꞌọto kꞌaMusi.

³⁴ Awe dị ogbi bọ sịphe kꞌạbidi, emiigh olephiri ọony lọ mạman oniin ụnwanyu kụ ẹghiom risigh, ụman 6,200 awe.

³⁵ Amarugh mụo ọto phọ ọphon ạrol ghan ḍịghaagh ephunom Ogbogo phọ. ẠZuriel ọony phọ Abihel kụ aḍighi okumoor oye.

³⁶ Oḍighi ọlo ạbuo aMerari, ophogh ghan ịḅaghaghaam Ogbogo phọ, ịkasiom mọ, ạroko phọ, aruwol phọ rꞌoomo ạraraar phọ roḍighinom ghan bọ oḍighi sịphe,

³⁷ rꞌoomo ạroko phọ oghoonyom bọ oghoony phọ okitonom, ịkasiom mọ, ịkomom mọ rꞌisiileeny iḍigh phọ.

³⁸ Amarugh mụo aMozis rꞌEeron rꞌạnmuny ọdi ạrol ghan rapogh Ogbogo phọ ẹpe erumuḍio phọ remite ghan bọ. Oḍighi ọlo aMozis rꞌEeron rꞌạnmuny phọ ọdi, ophogh ghan ịpe roḍighinaan bọ we phọ Ịzirel ịsiphe Ạdol Iigbia. Ooruen lọ arelhe ạabeeph sịphe, pọ ikiigh ghan.

³⁹ Ọdaph ịpe Ọmoogh-we phọ ạto bọ ạḅeni, bụo eghun phọ aLivai dị aMozis agbi bọ, ọto rꞌopolo, emiigh olephiri ọony lọ mạman oniin ụnwanyu kụ ẹghiom risigh, ụman 22,000 awe.

Ọsighenom bụo kꞌaLivai dịadi ịkpana ạnmuny phọ

^40-41 Ọmoogh-we phọ ạḅeni Mozis mọ, “Oomo ịkpana ạnmuny Ịzirel bụo ạmi. Gbi bịdi ạgeeghi siḍien phọ ạbidi ịlo ẹman, emiigh bụlo mọman oniin ụnwanyu kụ ẹghiom risigh. Ụsighenaan ịmi eghun phọ aLivai bịdi ạbuo ạmi. Mị kụ Ọmoogh-we phọ. Kọsighenom sịnam mọ bụo aLivai ọmoogh bọ dịadi ịdi kụ ịkpana ạnmuny ịnam mọ, oḍighi ịlo ạmi.”

⁴² Kụ aMozis ạdaph ịpe Ọmoogh-we phọ ạḅeni bọ nyọdi kụ ạtuugh agbi oomo ịkpana ạnmuny phọ,

⁴³ emiigh bụlo mọman oniin ụnwanyu kụ ọghiom risigh. Ogbi bọ bịdi ọman bọ 22,273 awe.

⁴⁴ Ọmoogh-we phọ ạghaaph ạḅeni Mozis mọ,

⁴⁵ “Sịghenom bụo aLivai phọ dịadi bịdi kụ ịkpana ạnmuny sịphe oomo awe phọ Ịzirel, ạsighe ịnam mọ bụo aLivai phọ ọmoogh bọ dịadi ịdi kụ ịkpana ịnam mọ oomo awe phọ Ịzirel ọmoogh bọ. Mị kụ Ọmoogh-we phọ.

⁴⁶ Bụdi kọtagharan ọsighe 273 sịphe ịkpana ạnmuny phọ awe phọ Ịzirel opeeliom bọ bụo kꞌaLivai phọ.

⁴⁷ Nạ kạboor ghan bọ oogh ipoḍi asilva ẹmhu oye; ọdaph ọkaraghi aḍiigbu ipoḍi asilva ịsiphe Ạdol Iigbia phọ.

⁴⁸ Kụ ạsighe ikpoki phọ ịpe kọtagharanam bọ bụphe opeeliom bọ ọto kꞌaLivai ạngo Eeron rꞌạnmuny phọ ọdi.”

⁴⁹ AMozis ạtuugh ịdipho kụ aḍighi, kụ ạsighiogh

⁵⁰ 1,365 ipoḍi asilva phọ,

⁵¹ kụ ạngo Eeron rꞌạnmuny phọ ọdi.