Igbiighi 24 - Ạḍinya Iigbia

¹ Ịphen phọ reten bịn ạBelam alegheri ni mọ ẹḅeeraan ni Ọmoogh-we phọ ọseph Ịzirel kụ ọdi ọ́ghi opuru aḍipuru, ịdipho dị aḍighi ghan bọ ịpheri phọ amem mọ. Ọdi asomeri risigh ọdi ẹpe ẹdala phọ,

² ạḅarion riḍien ọdi kụ aphogh, kụ ạmiin we Ịzirel dị orughogh, bụo eghun rꞌeghun ẹlo ạbidi. Kụ uwaloor phọ Ẹnaan aḍigh loor ọdi,

³ kụ ọdi ạmiin ịmiin phọ ịphen ạghaaph amitiom mọ, “Ḍịen kụ adom ạBelam ọony phọ aBior. Ịphen kụ ikpo ọnhu oye dị ọḅarion bọ riḍien phọ ọdi,

⁴ Oye dị rạnaghan ghan ịpe Ẹnaan rẹkaaph bọ, Rꞌariḍien dị onaan kụ mị ạmiin Ịmiin dị ẹḍua kꞌẸnaan Oomo Ịikpo

⁵ Jẹkob, arugbogo phọ ạna ẹnighe ịikia. Ịzirel, mịin ịdi amarugh phọ ạna ẹnighe.

⁶ Ịdipho ade lọ eḍiinyaan edi kꞌẹpe egher, Ịdipho oghoony lọ odi ọgbal ọphiiny, Ịdipho ạḍinya ẹepho lọ Ọmoogh-we phọ kụ ạzuph, Ịdipho ọsaga lọ atuman mụum.

⁷ Ạmuum kakilogh ghan ologhi ạsigbagba akuru phọ ọdi amite, Kụ ịizupha phọ ọdi kẹtol ghan ologhi ạmuum. Ọdaam mọ ọdi kapoph apu Ạgag, Ọmar phọ ọdi kọbughe ni.

⁸ Ẹnaan ẹsighe nyọdi ẹpe Ijipt emitiom. Ọdi ạmoogh ịnyaam ịdipho ạraphaal ạnam eḍum. Ọdi kạba ni oomo ạramha phọ ịpe ẹlhogh bọ nyọdi ḍien, Abunughi ịḅarara phọ ạbidi Kụ ạsighe ịkpina phọ ọdi ạtaḅal bịdi akpurion.

⁹ Eelhe phọ Ịzirel ẹkigh ịdipho ạnam-dịka; Ẹmina eḅoorian ịdipho ẹya ạnam-dịka. Ạnhian kụ katue ạpam nyọdi apoophe? Ạḍiseph ẹrolonaan tọrobo oye lọ ạseph nyịna. Itulughian ẹrolonaan oye lọ arulughi nyịna.”

¹⁰ ẠBelak aḅugh ḍịghaagh rꞌophin ologhi kụ ạḅeni Bẹlam mọ, “Mị ụmagh nyịna mọ tue asu ọkaraph ọnhu bụmulogh-ḍien phọ ạmi, kụ sịen ịraar amem nạ ạḅile ghụn ạngo bịdi ḍịseph.

¹¹ Nyịidipho ụgua, nụun agheel ẹpe nạ ạḍua bọ kụ aru. Mị ụḅem mọ mị mughueni ni nyịna, kụ Ọmoogh-we phọ makikima nyịna ọmoogh arughuenian.”

¹² ẠBelam ạḅeni Bẹlak mọ, “Mịna ụḅeni ḍịen rụukpaany phọ nạ arom bọ mọ oru ụmagh ịmi mọ,

¹³ ‘Ghạlamo ạBelak kụngo ịmi oomo asilva rꞌagol sịphe ogiga phọ ọdi, mị kápel ịpe Ọmoogh-we phọ ụḅeni bọ ịmi aḍighi ịlo ologhi ạmi, mꞌigey mꞌịkaraph. Ịpe Ọmoogh-we phọ ạghaaph bọ kụ ịdi mị kạtuugh ạkaaph.’”

Ekureriom oomo ịmiin phọ ạBelam

¹⁴ ẠBelam ạḅeni Bẹlak mọ, “Nyịidipho, mị rakeel kꞌayoor. Kụ tụtu mị rạḍua, mị kạḅeni nyịna ịdi awe Ịzirel koḍighi we phọ ạna, ḍio-pọ.”

¹⁵ Kụ ọdi ạmiin ịmiin phọ ịphen ạghaaph amitiom mọ, “Ḍịen kụ adom ạBelam ọony phọ aBior, Ịphen kụ ikpo ọnhu oye dị ọḅarion riḍien phọ ọdi,

¹⁶ Oye dị rạnaghan ghan ịpe Ẹnaan rẹkaaph bọ, Oye dị ạar olegheri ịyaar kꞌẸnaan Aapaany phọ, Kụ ạar olegheri ịyaar dị ạḍua kꞌEgbogh Ẹnaan. Rꞌariḍien dị onaan kụ mị ạmiin Ịmiin dị ẹḍua kꞌẸnaan Oomo Ịikpo.

¹⁷ Mị apogh ạkiom ghisigh Kụ mị ạmiin eelhe phọ Ịzirel. Ẹenaan kekon ni kꞌạJekob; ịkpara ọdaam kemite ni Ịzirel Dị kẹgurogh bụo ạrumhu phọ ạMoab, Kụ ekuphogh oomo awe phọ ạSet.

¹⁸ Ọdi kạkpar apu mụlogh-ḍien ọdi ẹpe Idom Kụ ạsighe rere ạbidi aḍighi ruphua ọdi, Mem dị Ịzirel kụ ọkpar ropu.

¹⁹ Eelhe phọ Ịzirel kẹezeghiom bịdi ude Kụ epiemi bụlo osugha sịphe ạramha phọ.”

²⁰ Uḍien kụ ẹdi ạBelam ạmiin Ạmalekait, kụ ạmiin ịmiin phọ ịphen ạghaaph amitiom mọ, “Ạmalek kụ ẹḅel ẹmha esi ạramha phọ, Kụ ruukuna phọ kopiemi ni nyọdi.”

²¹ Kụ ạBelam akiton aphogh bụo aKenait, kụ ạmiin ịmiin phọ ịphen ạghaaph amitiom mọ, “Mọlhogh ni otu phọ ạna ạnyu aḍighiigh, Ọḅile ọkparami marugh phọ ạna.

²² Kụ ọlo, amem ketu ni dị kopiemi bụo aKenait Mem dị Asiria misiphi inyina ogheelom.”

²³ Kụ ạBelam ạmiin ịmiin phọ ịphen ạghaaph amitiom mọ, “Bụen ạbughen awe ookpomoghan bọ ạga ephunom mọ?

²⁴ Awe ẹekpara ekpeḍien kọzoghi Sạipros kụ otu. Bịdi koogulemi Asiria rꞌEber, Kụ bịdi rꞌaloor kope kꞌagee-pọ.”

²⁵ Kụ ạBelam aakolobian kụ aḅula ẹmha, kụ ạBelak ạghi ḍịo ọdi.