Igbiighi 23 - Ạḍinya Iigbia

¹ Kụ ạBelam ạḅeni Bẹlak mọ, “Ụkaanaan ịmi sịen oḍual arenmeny ạrikia, kụ ạsighe oḍual ugheel ilephiri ạsinam rꞌoḍual idughuna uruom ịmi.”

² ẠBelak ạtuugh ịpe ạBelam ạḅeni bọ nyọdi aḍighi, kụ ọdi rꞌạBelam ọsighe ḍiniin onyugheel ạnam rꞌoniin odughuna tọrobo enmeny, oḍighinom ịyaar aghuḍum.

³ Kụ ạBelam ạḅeni Bẹlak mọ, “Mẹera sịen ịigaany ẹkia oguom ạnian phọ ạna, kụ mị kạki apogh mụghumo Ọmoogh-we phọ katu ni uzuan ịmi. Mị kạḅeni nyịna tọrobo ịlo dị uḍeenaan ịmi.” Kụ ogina ọdi ạghi ạsiiny ạnyu eegbolom.

⁴ Kụ Ẹnaan eru ẹteeny Bẹlam. Kụ ạBelam ạḅeni nyọdi mọ, “Mị mạkan oḍual phọ arenmeny ạrikia phọ, kụ mị ạsighe ḍiniin ạnam rꞌoniin odughuna esi esi, ạphighironom ẹkia.”

⁵ Ọmoogh-we phọ ạḅeni Bẹlam ịlo ọghaaph kụ arom nyọdi ạghiom Bẹlak ọḅeni ọdi dom mọ.

⁶ Kụ ọdi aḅula kụ ạmiin dị ạBelak rꞌoomo ikpolom awe phọ ạMoab ọmeregha sịphe ịigaany ẹkia oguom ạnian phọ.

⁷ Ịphen phọ ịmiin dị ạBelam ạmiin: “ẠBelak ọdaam mọ ạMoab mụmagh ịmi Ẹpe Sịria, ẹpe aruugum emitenom erumuḍio phọ, Mọ mị utu usu Jẹkob ọkaraph ọnhu, utulughi Ịzirel.

⁸ Mịna kạtu ika kụ asu bọ ọkaraph ọnhu oye dị Ẹnaan ọkaraph ọnhu ísu? Mịna kạtu ika kụ ạkaaph bọ ịlo emeel mem dị Ọmoogh-we phọ kọ̋ghaaph.

⁹ Sịphe asighiigh ạnyu phọ kụ ẹdi mị ạmeera kụ ạmiin bịdi, Mị odi ẹpe ạnyu aroogbolom mọ kụ apogh ghan bịdi. Bịdi awe phọ dị otugh ḍịo ạbidi gem, Kụ úgbiom mọ bịdi ạbuo areelhe phọ ịphen.

¹⁰ Ẹemara ẹemara Ịzirel ọkigh ịisaar, Oḍiza ọpughan dị kogbi. Bịle mị amugh ḍuugh oye aruukuan, Aruukuna aghuḍum ạmi ẹrol aani ịdipho ịpe ọdi.”

¹¹ Kụ ạBelak ạḅeni Bẹlam mọ, “Ịphen phọ nạ uḍighi bọ ịmi ịghen? Mị ụsighe nyịna aru mọ su ọkaraph ọnhu bụmulogh-ḍien phọ ạmi, kụ ịdi nạ aḍighi ọngo ạbidi ḍịseph.”

¹² Kụ ọdi ạphagharanaan nyọdi mọ, “Mịna kụ́daph ịpe Ọmoogh-we phọ ụḅeni bọ ịmina kụ ạghaaph?”

Ịmiin ạBelam dị emuneniom ịyal

¹³ Kụ ạBelak ạḅeni nyọdi mọ, “Tue ụdaph ịmi aru ẹnon esi, esi dị nạ kạtol kụ ạmiin buniin awe Ịzirel. Nạ rạmiin ghan bụen utuman bọ iyira bịn; nạ kọ̋miin oomo phọ ạbidi. Kụ ạrol sịphe phọ usuanaan ịmi bịdi ọkaraph ọnhu.”

¹⁴ Kụ ọdi ạpham nyọdi ạghi asiom ẹpe ozo phọ aZofim ẹpe ạnyu Eegum aPisga. Sịphe phọ kẹn ọdi ạkan oḍual arenmeny ạrikia, kụ ạsighe ḍiniin aḍilephiri ạnam rꞌoniin odughuna esi esi, aḍighinom rạraar aghuḍum.

¹⁵ ẠBelam ạḅeni Bẹlak mọ, “Mẹera sịen ịigaany ẹkia oguom ạnian phọ ạna; mị kạki ẹpe risigh azuan Ọmoogh-we phọ.”

¹⁶ Ọmoogh-we phọ aru ạteeny Bẹlam kụ arom nyọdi ạghiom Bẹlak ọḅeni ọdi dom.

¹⁷ Kụ ọdi aḅula kụ ạmiin dị ạBelak rꞌoomo ikpolom awe phọ ạMoab ọmeregha sịphe ịigaany ẹkia oguom ạnian phọ, kụ ạBelak apuru nyọdi mọ, “Ọmoogh-we phọ ạḅeni nyịna ika?”

¹⁸ Ịphen phọ ịmiin dị ạBelam ạmiin: “Tue, Bẹlak ọony aZipor Kụ ạnaghan ịdi mị kạkaaph.

¹⁹ Ẹnaan ị́kigh ịdipho awe dị rọgba ọkpe; Ọdi kọ́ony oye dị kanme ologhi ọdi. Tọrobo ịlo ọdi aguanaan, ọdi kaḍighi ni.

²⁰ Mụḅeni ịmi ọngo ạḍiseph Kụ mem dị Ẹnaan ẹseph, mị kạ́aḅemion.

²¹ Mị ạnuun ni ạmiin mọ ịpe aghisigh phọ Ịzirel kétuom ẹkaraph elhor mꞌịiḅaghami Ọmoogh-we phọ Ẹnaan phọ ạbidi odianaan ni rꞌạbidi; Bịdi ogbeelom mọ ọdi kụ ọdaam ạbuno.

²² Ẹnaan mẹsighe bịdi emitiom ẹpe Ijipt; Ọdi ạmoogh ịnyaam ịdipho ạraphaal ạnam eḍum.

²³ Ẹgba ịiḍaany ílho, ạghama ólho dị kopoghom eelhe Ịzirel. Nyịidipho awe kọkaaph ịlo Ịzirel, ‘Ịmiin ịdi Ẹnaan meḍighi.’

²⁴ Eelhe phọ Ịzirel ẹkigh ịdipho ẹya ạnam-dịka. Bịdi ooguna loor ịdipho ạnam-dịka, dị képooghian tụtu mẹphanyi ẹtaalom ịgbalapuur, tụtu ọdi ạphughol ịḅaal ạbuphe ọdi mạze bọ.”

²⁵ Kụ ạBelak ạḅeni Bẹlam mọ, “Nạ ómeera ósu we Ịzirel ọkaraph ọnhu, kụ kꞌeekuna phọ kạ́ngo bịdi ḍịseph.”

²⁶ ẠBelam ạphagharanaan Bẹlak mọ, “Mịna kọ̋ḅeni ḍịen nyịna mọ oomo ịpe Ọmoogh-we phọ ạghaaph bọ, mịna kạtuugh ịpe phọ kụ aḍighi?”

Ịmiin ạBelam dị emuneniom ịraar

²⁷ ẠBelak ạḅeni Bẹlam mọ, “Tue ụdaph ịmi aru ẹnon esi, ạgama kẹḅeeraan Ẹnaan mọ nạ usuanaan ịmi we phọ ạbuen ọkaraph ọnhu.”

²⁸ Kụ ọdi ạpham nyọdi ạghi asiom ẹpe ạnyu Eegum aPior, ẹpe esomanan ẹdala phọ.

²⁹ Kụ ạBelam ạḅeni nyọdi mọ, “Ụkaanaan ịmi sịen phọ oḍual arenmeny ạrikia, kụ ạsighe oḍual ilephiri ạsinam rꞌoḍual idughuna ụngo ịmi.”

³⁰ ẠBelak ạtuugh ịpe ạBelam ạḅeni bọ nyọdi aḍighi, kụ ạḅile ạsighe ḍiniin aḍilephiri ạnam rꞌoniin odughuna tọrobo enmeny, ạphighironom ẹkia.